Alaksandr Łukašenka i Uładzimir Pucin na sustrečy ŭ Strelnie 23 lipienia 2023 hoda. Fota: «Puł piervoho»

Alaksandr Łukašenka i Uładzimir Pucin na sustrečy ŭ Strelnie 23 lipienia 2023 hoda. Fota: «Puł piervoho»

Alaksandr Łukašenka zajaviŭ, što jaho «pačali napružvać» vahnieraŭcy, bo jany chočuć na Zachad «na ekskursiju».

«Moža być, i nie varta było b kazać, ale skažu. Nas stali napružvać vahnieraŭcy. «Chočacca na Zachad. Dazvolcie nam». Kažu: vam navošta na Zachad? «Nu, schadzić na ekskursiju ŭ Varšavu, u Žešaŭ», — raskazaŭ Łukašenka na sustrečy z Pucinym. Jaho słovy cytujuć rasijskija dziaržaŭnyja infarmacyjnyja ahienctvy.

Žešaŭ (pa-biełarusku jaho nazyvajuć jašče Rašaŭ) — horad na paŭdniovym uschodzie Polščy, jaki staŭ łahistyčnym chabam dla pastavak dapamohi Ukrainie.

«Ja trymaju ich u centry, jak damovilisia, Biełarusi, nie chaciełasia b ich tudy pieradysłakoŭvać, tamu što ŭ ich nastroi drennyja. I treba addać naležnaje, jany viedajuć, što adbyvajecca vakoł Sajuznaj dziaržavy. Nu heta tak, štrych», — adznačyŭ Alaksandr Łukašenka.

Kiraŭnictva PVK «Vahnier» zajaŭlała, što ŭ Biełaruś pierabazujecca da 10 tysiač bajcoŭ hetaj kampanii.

Inicyjatyva «Biełaruski Hajun», jakaja adsočvaje pierasoŭvańni vojskaŭ u Biełarusi ŭ kantekście vajny va Ukrainie, paviedamiła ab prybyćci ŭ Biełaruś vaśmi kałon vahnieraŭcaŭ.

PVK «Vahnier» farmalna ličycca pryvatnaj vajskovaj kampanijaj, ale faktyčna była stvoranaja Hienštabam Rasii dla vykanańnia śpiecyjalnych zadač i pad vyhladam, što za hetym nie staić aficyjnaja Maskva. PVK «Vahnier» paniesła ciažkija straty padčas napadu na Ukrainu. Pavodle infarmacyi kiraŭnictva struktury, pa stanie na 20 maja z 79 tysiač najmitaŭ byli zabityja 22 tysiačy, paranienyja 40 tysiač.

Takija razhromnyja straty vyklikali bradžeńnie ŭ šerahach vahnieraŭcaŭ, jakoje vyliłasia ŭ zachop Rastova-na-Donie i sprobu pachodu na Maskvu 23—24 červienia. Rasijskija ŭłady nie zdoleli raźbić miaciežnikaŭ. Bunt skončyŭsia kampramisam, jakoha ŭdałosia dasiahnuć pry pasiarednictvie Alaksandra Łukašenki. Častkaj hetaha kampramisu staŭ pieravod vahnieraŭcaŭ u Biełaruś.

Pierad napadam Rasii na Ukrainu Alaksandr Łukašenka prahnazavaŭ, što vajna skončycca pieramohaj rasijan «za try-čatyry dni».

Alaksandr Łukašenka mierkavaŭ, što na Zachadzie bajacca vajny ź siłami ADKB.

«U Jeŭropie budzie praściej. Jany što, hetaha nie bačać? Jany razumiejuć, što bieśpierśpiektyŭna z nami vajavać, pierš za ŭsio z Rasijaj. Pakul jany tam razhornucca i pierašluć siudy niejkija vojski, my ŭžo budziem stajać kala Ła-Manša», — pahražaŭ Łukašenka 6 lutaha 2022 hoda, za dva tydni da ataki na Ukrainu.

Pravał Rasii na pieršym etapie vajny staŭ niečakanaściu dla łukašenkaŭcaŭ. Prapahanda Minska praciahvała havaryć pra niepaźbiežnaść pieramohi Rasii i aśviatlała padziei ŭ tym ža duchu, što i rasijski aficyjoz. Sam Łukašenka nie raz kazaŭ, što «Rasija nie moža prajhrać».

Клас
2
Панылы сорам
24
Ха-ха
50
Ого
4
Сумна
5
Абуральна
15