Ivan Kraŭcoŭ Ivan Kravcov Ivan Kraucou

Pa słovach Ivana Kraŭcova, ciapier hałoŭnaja zadača ŭ babarykancaŭ — znajści varyjanty, jak u Biełarusi zrabić režym demakratyčnym. Skryn videa «Tok»

Navošta paśla vybaraŭ členy štaba Babaryki jeździli ŭ Maskvu

Ivan Kraŭcoŭ tłumačyć pajezdki tym, što jany chacieli razabracca ŭ situacyi: «Zaŭsiody byli čutki pra «ruku Maskvy», što Maskva choča pamianiać Łukašenku. Chaciełasia zrazumieć, ci heta tak. My ŭ pryncypie zrazumieli paśla hetych pajezdak, što heta nie tak».

Na zaŭvahu ab tym, što zhadanyja pajezdki ŭ toj čas vyhladali jak pošuk padtrymki, Kraŭcoŭ zaŭvažaje, što ŭ toj čas usie šukali padtrymku.

«U situacyi, kali Łukašenka nie idzie na pieramovy, to heta zastavaŭsia adziny scenar, kali ty niejak možaš razhajdać šali. Tady heta była raspaŭsiudžanaja reč. Cichanoŭskaja ź Vilni źviartałasia, nie viedaju, jak jaho nazvać, da prezidenta Rasii. Łatuška pisaŭ aficyjnyja listy ad Kaardynacyjnaj rady, znachodziačysia ŭ Minsku.

Na žal, heta realnaść, ad jakoj my za hetyja 30 hadoŭ nie možam adyści. My zaležnyja ad Rasii, nie samastojnyja ŭ poŭnaj miery. I heta zastavaŭsia adziny varyjant».

Na pytańnie pra toje, čamu babarykancaŭ nie padtrymali ŭ Maskvie, Kraŭcoŭ adkazvaje, što vielmi składana być bolš prarasijskim, čym Łukašenka.

«U rasijan, na moj pohlad, usio prosta. Čyj Krym? Što tam Zachad? U ciabie jość kankretnyja ideałahičnyja ček-pointy. Kali ty ich nie prachodziš, to aŭtamatyčna mienš cikavy, čym Łukašenka. Nie havoračy pra toje, što ŭ ciabie niama realnaj ułady. Pa takich ček-listach my nie prajšli».

Čamu ciapier u demakratyčnych sił Biełarusi drennyja adnosiny z Ukrainaj

Kraŭcoŭ kaža, što nie škaduje ab tahačasnaj pazicyi štaba nie krytykavać Rasiju i nie dumaje, što ciapierašniaje staŭleńnie ŭkrainskich palitykaŭ da biełaruskich demsiłaŭ źviazana z tym, što było ŭ 2020 hodzie:

«Mnie zdajecca, što heta dastatkova chitraja i vyvieranaja pazicyja. Ja liču, što va ŭkraincaŭ niama asablivaj cikavaści ŭstupać u ciesnaje ŭzajemadziejańnie ź biełaruskaj apazicyjaj. Im nie zrazumiełaja «dadanaja vartaść» ad hetaha.

Na žal, vajna prymušaje ciabie być bolš prahmatyčnym. Ty pačynaješ dumać, što tabie dapamoža vyjhrać. Tanki, bienzin, puški, rakiety. U ciabie trochi inšaja liniejka. Heta nie palityk u Luksiemburhu, jakomu važna zrabić sumiesny zdymak i pakazać, što padtrymlivaje demakratyju. U ciabie vajna, bambiać damy. Čym [biełaruskija] demakratyčnyja siły mohuć dapamahčy Ukrainie, ja nie vielmi razumieju.

Navošta demakratyčnym siłam Ukraina, mnie vielmi zrazumieła. Ukraina ciapier na viaršyni suśvietnaha paradku dnia. Kali b adbyłasia sustreča lidaraŭ biełaruskich i ŭkrainskich demsiłaŭ, heta pierad usim pavysiła b status biełaruskich demsiłaŭ, ale nijak by nie źmianiła status Ukrainy».

Pazicyja adnosna Krymu i Rasii

Ivan Kraŭcoŭ adznačaje, što jurydyčna Krym — ukrainski. Heta sučasnaja terytoryja Ukrainy. Ale de-fakta jon znachodzicca pad kiravańniem Rasii.

Vykazvajučysia ab svajoj pazicyi adnosna Pucina i Rasii, Kraŭcoŭ raspaviadaje, što nie vieryŭ, što Pucin uvarviecca va Ukrainu. Jon dumaje, što šmat chto na Zachadzie ŭ heta nie vieryŭ:

«My vosieńniu 2021 hoda jeździli ŭ Hiermaniju, Złučanyja Štaty. Heta razhladałasia vyklučna jak biazhłuzdy varyjant. Toje, što zdaryłasia, heta žach. Ja nikoli nie moh ujavić, kali raniej jeździŭ u Maskvu, što heta pieraŭtvorycca voś u takoje.

Usia reč u tym, što jany da hetaha doŭha rychtavalisia. I ciapier pačynaješ razumieć. Ja pamiataju Hruziju, 2008 hod. I vychodziać takija knihi, jak «Prajekt Rasija». I tam nacyjanał-patryjatyčnaja ideałohija, pieramiašanaja z pravasłaŭjem. Tolki ty ciapier razumieješ, jak doŭha viałasia padrychtoŭka da taho, kab pabudavać nacyjanaliscki režym. Całkam taki ahidny. Ja dumaŭ, što takoha nie ŭbaču. Ale ciapier ja heta baču. I z hetym davodzicca žyć».

Hałoŭnaja zadača babarykancaŭ

Kraŭcoŭ havoryć, što hałoŭnaja zadača ŭ babarykancaŭ — znajści varyjanty, jak u Biełarusi zrabić režym demakratyčnym.

«U biahučaj situacyi mała chto što moža zrabić. Ale ŭ nas jość vialikija aktyvy. Jość ofis Śviatłany Cichanoŭskaj. Ale pierad usim dla nas jość Babaryka, Maryja Kaleśnikava, šmat inšych cudoŭnych ludziej, jakija znachodziacca ŭ turmie. Sotni ludziej. Heta taksama vielmi vialiki aktyŭ.

Naš aktyŭ — heta ludzi. Tamu što ty robiš u situacyi, kali ty nie možaš ničoha zrabić? Ty imkniešsia nie zhubić toje, što jość, i čakaješ mahčymaści dziejničać. Jak ty budzieš dziejničać, ty nie viedaješ. Ale hetaha nichto ciapier nie viedaje. Nichto nie viedaje, kali skončycca vajna va Ukrainie, kali pamre Łukašenka i Pucin», — adznačaje Kraŭcoŭ.

Hladzicie całkam:

Клас
11
Панылы сорам
34
Ха-ха
14
Ого
1
Сумна
6
Абуральна
20

Chočaš padzialicca važnaj infarmacyjaj ananimna i kanfidencyjna?