Fota: subhakitnibhat kewiko / vecteezy.com

Fota: subhakitnibhat kewiko / vecteezy.com

Julija, 35 hadoŭ, Biełastok: «Zvaniŭ i kazaŭ, što ja atrymlivaju jaho hrošy»

«U TikTok šmat razoŭ sustrakała infarmacyju pra machlarski mietad, jaki raspaŭsiudžany ŭ Polščy. Voś sutyknułasia znutry.

Telefanuje dziadźka, kaža, što zakinuŭ hrošy na rachunak praz numar telefona. Ale vyśvietliłasia, što plamieńnik hrošy nie atrymaŭ, bo jany pryjšli da mianie: maŭlaŭ, «viarni nazad». Adkazvaju, što zaniataja, prašu źviarnucca ŭ bank i kładu telefon.

Paśla jašče sotnia zvankoŭ. Praviaraju rachunak — hrošy jość.

Čamu adrazu nie viarnuła? Pa-pieršaje, adpraŭnik moža ich samastojna zabrać, u hetym i sutnaść machlarstva: ty viartaješ «vypadkovyja» hrošy, a jon paśla adklikaje svaje pieraličeńnie. Pa-druhoje, hety numar 9 miesiacaŭ naležyć mnie. A jak jon kamunikavaŭ ź plamieńnikam i jak daviedaŭsia, što hrošy pryjšli nie jamu? Pa-treciaje, na hetym numary da mianie byŭ pan Aŭhust, bo, kali ja atrymała numar, mnie zvanili z usich sacyjalnych (i nie tolki) słužbaŭ — šukali jaho.

Takim čynam, razmova nie spracavała, i pačaŭsia hrad SMS: «Viarni hrošy, u ciabie ŭschodni akcent, a to źviarnusia ŭ mihracyjnuju słužbu, napišu ŭ palicyju». I šmat-šmat usiaho inšaha.

Adkazvaju adnym skazam: «Prašu źviarnucca ŭ bank i vyrašyć svajo pytańnie sa śpiecyjalistami».

Pacla znoŭ mora SMS, što bank nie vyrašyć pytańnia, što ja ŭtrymlivaju čužyja hrošy i h. d. Praź niekatory čas jon zajaviŭ, što napisaŭ zajavu ŭ palicyju. Da banka dajści nie zdoleŭ, a ŭ palicyju — adrazu. Dyk voś pytańnie: sustrečny zvarot pisać ci sačyć za śpiektaklem dalej?»

Andrej, 30 hadoŭ, Vilnia: «Mnie pa-čałaviečy było jaho škada»

«Ja palityčny ŭciakač. Paśla taho, jak ja trapiŭ u Vilniu, mianie prytuliła adna biełaruskaja arhanizacyja. Niejki čas ja žyŭ u ich, ale mnie treba było paralelna šukać svaju kvateru. Takija byli ŭmovy.

Na ŭsio ŭ mianie syšło dosyć šmat času, tamu što ja šukaŭ varyjant, dzie mianie adrazu zmohuć prapisać. U Litvie z takimi dakumientami davoli stroha, tamu treba było zahadzia padrychtavacca.

Na adnu z maich abjaŭ ab pošuku kvatery adhuknuŭsia mužčyna Rusłan, jaki prapanavaŭ źniać jaho kvateru. My sustrelisia, umovy byli narmalnymi, tamu damovilisia zaklučyć damovu litaralna praz dva dni.

Z hetaha momantu pačali źjaŭlacca niekatoryja «tryvožnyja zvanočki». Pa słovach haspadara kvatery, jamu patrebny byŭ čas, kab źjechać u dom, jaki jon dabudoŭvaje, tamu zajechać ja moh tolki praz tydni paŭtara. U cełym ja moh sabie heta dazvolić, tamu spakojna vyrašyŭ pačakać.

Praz ahavorany čas my sustrelisia, kab ja padpisaŭ damovu, i ja addaŭ zakład. Pry hetym zajechać u kvateru ŭsio jašče nie zmoh. U haspadara pačali źjaŭlacca niejkija pastajannyja pałomki ŭ domie, praź jakija adkładaŭsia pierajezd. To treba terminova zamianić trubu ŭ vannym pakoi, to niejki kacioł, to pačalisia pravierki, jakija taksama terminova treba było prajści, i ŭžo paśla jon moh by zastacca tam žyć.

Praź niejki čas mužčyna paprasiŭ pazyčyć jamu hrošaj. Ja daŭ jamu dadatkovyja 400 jeŭra, da hetaha daŭ zakład i sumu za dva miesiacy žyćcia ŭ kvatery. Usiaho vyjšła kala 1500 jeŭra. Mnie pa-čałaviečy było jaho škada. Dy i admaŭlacca ad varyjanta kvatery, dzie haspadar za narmalnuju sumu hatovy byŭ mianie zaadno i prapisać, mnie nie chaciełasia: u Litvie heta i praŭda redkaść.

U takim čakańni prajšoŭ miesiac. Kali ŭ mianie źjavilisia litoŭskija dakumienty, ja adrazu zamoviŭ płaciežnuju kartu. Adras dla atrymańnia paznačyŭ toj kvatery, dzie płanavaŭ žyć. I voś niejak zachodžu ja ŭ svoj padjezd, pačynaju korpacca ŭ paštovaj skryni, kab zabrać svaju kartu, jak raptam dźviery z kvatery, u jakuju ja pavinien byŭ zasialicca, adčyniajucca — i adtul vychodzić niejkaja žančyna.

My razhavarylisia, i akazałasia, što nijakaha Rusłana, jaki «zdaŭ» mnie žyllo, tut užo doŭhi čas niama. Vyśvietliłasia, što žančyna — sapraŭdnaja haspadynia kvatery, a hety mužčyna — prosta daŭni jaje sužyciel. I padčas našaj razmovy Rusłan jakraz patelefanavaŭ mnie. Na pytańnie, što adbyvajecca i čamu pa patrebnym mnie adrasie žyvie niejkaja nieznajomka, machlar prosta kinuŭ trubku. Z taho času ja jaho nie bačyŭ i nie čuŭ.

Ja pajšoŭ u palicyju, na Rusłana zaviali spravu, ale znajści tak i nie zmahli. Akazałasia, što ja nie pieršy paciarpieły. Pa takoj schiemie jon pracavaŭ i ź inšymi emihrantami, jakija addavali hrošy, a praź niejki čas jon prosta źnikaŭ. Afierysta ŭsio jašče šukajuć, hrošy ja tak i nie zmoh viarnuć. Kvateru taksama daviałosia šukać inšuju».

Nina, 24 hady, Vilnia: «Časta telefanujuć i na ruskaj movie kažuć, što na mianie ŭziali kredyt»

«U Litvie, nakolki ja zaŭvažyła, vielmi raspaŭsiudžana machlarstva praz telefon. Pieršy raz z hetym sutyknułasia maja mama. Joj patelefanavali nibyta ź miascovaj palicyi i na čystaj ruskaj bieź jakoha-niebudź akcentu pačali pierakonvać, što jaje pašpartnyja danyja skrali i ŭ niejkim łakalnym banku na jaje ŭziali kredyt.

Pa ich zapeŭnieńni, kab dapamahčy znajści złačyncaŭ i zachavać hrošy na karcie, danyja i infarmacyju sa svajoj kartki treba było pravieryć ź imi. Atrymlivajecca taki absalutna bazavy i durny «razvod», jaki, mahčyma, dziejničaje na tych, chto tolki niadaŭna pierajechaŭ.

Mama tady vielmi spałochałasia. Heta byŭ adzin ź pieršych miesiacaŭ paśla emihracyi, tamu jana była hatovaja pavieryć u luby šantaž. Dobra, što padčas razmovy z toj «palicyjaj» vyrašyła napisać mnie i ŭdakładnić, nakolki ŭvohule kredyt na jaje imia ciapier tut mahčymy. Tolki paśla hetaha jana zrazumieła, što jaje sprabavali padmanuć.

Praź niekalki miesiacaŭ mnie telefanavali z takoj ža schiemaj. Ašukancy nazyvajuć siabie i adrazu kažuć tvajo poŭnaje imia, a jašče časta poŭnaje imia niejkaha čałavieka, jaki byccam by abakraŭ vas. Mnie z takimi pytańniami telefanavali minimum razoŭ piać.

Kali sutykaješsia z takim davoli časta, to ŭžo asabliva nie reahuješ, prosta złuješsia, što ciabie adciahvajuć ad spraŭ. Z-za padobnych «razvodaŭ» ja pierastała padymać nieznajomyja numary, kali viedaju, što nie čakaju zvanka.

My niejak abmiarkoŭvali takija afiery ź siabrami, i adzin moj pryjaciel raspavioŭ, što časam ad nudy pačynaje bałbatać z ašukancami. Niejak jon nazvaŭsia kadebešnikam — trubku kinuli na piataj chvilinie. Kali prykidvaŭsia varjatam i nios niejkuju łuchtu, žuliki pratrymalisia i taho mienš».

Čytajcie taksama:

«Ciedziačy ŭ paryžskich kaviarniach, ja časta ŭspaminaju minskich barysta». Minčuki — pra toje, čym biełaruskaje hramadskaje charčavańnie nie padobnaje na jeŭrapiejskaje

Piać biełaruskich siadzib, jakija terminova treba ŭbačyć: miesca, dzie pravodzili ekśpierymienty, i kopija karaleŭskaha pałaca ŭ Varšavie

Клас
4
Панылы сорам
3
Ха-ха
6
Ого
2
Сумна
5
Абуральна
9