Fota Dźmitryja Ivanova

Fota Dźmitryja Ivanova

Zručnyja ŭmovy dla palotu busłoŭ — heta ŭzychodnyja patoki nahretaha ziamloj pavietra, termiki. Busły ŭ časie palotu łunajuć. Kali b jany musili pastajanna machać kryłami, to pamierli b ad źniasileńnia jašče da taho, jak pakinuli b miesca hniezdavańnia.

U kožnaj buślinaj čaradzie jość lidary, jakija vyrašajuć, kali hrupa adpravicca ŭ padarožža, i joj kirujuć. Jany — najlepšyja avijatary.

Jak ich paznać? U termičnych patokach jany ruchajucca pa bolš niestandartnych maršrutach, šukajučy najlepšyja ŭmovy dla padjomu, jak byccam vyvučajuć ich mietadam sprob i pamyłak. Tamu jany musiać časta karektavać svoj palot. Astatnija busły nazirajuć za ich palotam i padymajucca pa bolš standartnych trajektoryjach.

Maładyja busły vykarystoŭvajuć aktyŭny palot (machajuć kryłami) amal u čverć razoŭ čaściej, čym darosłyja. Heta pavialičvaje vydatki enierhii na 14%.

Jany nie kampiensujuć jaje karaciejšym palotam, daŭžejšym adpačynkam abo bolš intensiŭnym karmleńniem padčas prypynku. Akramia taho, jany mienš času nadajuć dohladu za apiareńniem — aparatam, nieabchodnym dla palotaŭ.

Matyvacyja, kab paśpiavać za vopytnymi ptuškami, macniejšaja za ŭsio astatniaje.

Kali maładyja nie paśpiavajuć, to adstajuć i dałučajucca da inšaj čarady, što adbyvajecca ŭžo ŭ pieršyja dni mihracyi. Tamu jany nie pieramiaščajucca siamiejnymi hrupami, jak pryniata ličyć.

Tym bolš z ulikam abmiežavańniaŭ jany časta vylatajuć raniej, čym bolšaja častka darosłych, startujučy ź pieršymi čarodami. Padčas pieralotu jany adstajuć ad čarodaŭ pa niekalki razoŭ, kožny raz traplajučy ŭ novyja. Latuć, sprabujučy nie adstavać ad ich. U vyniku vyžyvajuć tyja, chto najlepš dapasavaŭsia. Takim čynam vyłučajucca najmacniejšyja z najmacniejšych avijataraŭ.

Užo na pieršych chvilinach palotu možna pradkazać, jak daloka zalacić małady busieł. Toj, chto čaściej vykarystoŭvaje aktyŭny palot padčas mihracyi, budzie zimavać bližej — časta nie vylecić navat ź Jeŭropy. Tolki najlepšyja avijatary dalatajuć da Afryki.

Ale adlot busłoŭ — heta dla nas dvajnaja nahoda dla smutku. Pa-pieršaje, bo bolej nie pabačym ich na palach i łuhach až da nastupnaj viasny. A pa-druhoje, mnohich ź ich, asabliva sioletni maładniak, čakaje śmierć.

Kala 75% maładych busłoŭ hinie ŭ pieršy hod žyćcia padčas mihracyi.

Bolšaść zahinie ŭ vyniku paražeńnia elektryčnym tokam. Astatnija skončać svajo žyćcio ŭ vyniku źniasileńnia, drapiežnictva, sutyknieńniaŭ z transpartam abo buduć zabityja padčas palotu praź Siryju abo Livan.

Čytajcie taksama:

U Livanie brakańjery stralajuć busłoŭ dziela zabavy

Try biełaruskija buślanki ŭvajšli ŭ top-10 samych vialikich hniozdaŭ biełych busłoŭ u Jeŭropie

U Jeŭropie biełyja busły hniaździacca razam z čornymi i navat utvarajuć adnapołyja pary

U Biešankovičach zdarovy busieł admaŭlajecca viartacca ŭ dzikuju pryrodu. Vinavatyja ludzi

Клас
3
Панылы сорам
1
Ха-ха
1
Ого
8
Сумна
56
Абуральна
11