Mahiła Dźmitryja Fiedasiuka. Fota znojdziena «Našaj Nivaj»

Mahiła Dźmitryja Fiedasiuka. Fota znojdziena «Našaj Nivaj»

Heta byŭ adziny vypadak, kali łukašenkaŭskim siłavikam dali ŭzbrojeny adpor. Zielcer z ružža zastreliŭ staršaha lejtenanta KDB Dźmitryja Fiedasiuka, ale zahinuŭ i sam.

Dziasiatki tysiač biełarusaŭ stali achviarami masavych represij, jakija raspačalisia ŭ 2020 hodzie.

Udzielniki ruchu za svabodnyja vybary i suprać dyktatury nie ŭžyvali zbroi, Andrej Zielcer staŭ adzinym vyklučeńniem. Ën sustreŭ bryhadu, što pryjšła da jaho ź pieratrusam, ahniom. Čamu jon pryniaŭ takoje rašeńnie, dahetul zastajecca niavyśvietlenym.

Rejd u kvateru Zielcera byŭ adnym z socień anałahičnych pieratrusaŭ letam i vosieńniu 2021 hoda. Jany supravadžalisia prapahandysckaj kampanijaj u dziaržaŭnych ŚMI, što śćviardžali, niby pratestoŭcy suprać dyktatury pierachodziać da siłavych mietadaŭ baraćby. Heta byli chłuślivyja śćviardžeńni. 

Padčas pierastrełki ŭ pakoi pobač ź Zielceram znachodziłasia jahonaja žonka Maryja Uśpienskaja, jakaja zdymała ŭvieś praces na telefon. Kadraŭ ź jaje pryłady dahetul nichto nie bačyŭ.

Toje, što adbyvałasia, zdymałasia i na inšuju kamieru ŭ pakoi.

Maryja Uśpienskaja padčas pierastrełki Andreja Zielcera z supracoŭnikami Kamiteta dziaržaŭnaj biaśpieki. Fota: kadr ź videa, apublikavanaha KDB

Maryja Uśpienskaja padčas pierastrełki Andreja Zielcera z supracoŭnikami Kamiteta dziaržaŭnaj biaśpieki. Fota: kadr ź videa, apublikavanaha KDB

Maryju Uśpienskuju abvinavacili ŭ saŭdziele ŭ zabojstvie kadebešnika, ale zamiest kałonii joj prysudzili prymusovaje lačeńnie ŭ psichijatryčnym stacyjanary da vyzdaraŭleńnia — heta aznačaje adsutnaść kankretnaha terminu skančeńnia adbyćcia pakarańnia.

Jaje sukamiernicy raskazvali, što Maryja ciažka pieražyvała toje, što adbyłosia tady ŭ kvatery.

U pary zastaŭsia 10-hadovy syn. Padčas trahiedyi chłopčyk znachodziŭsia ŭ škole, jaho zabrała babula.

Razam z tym paciarpieła i mnostva inšych ludziej. Ułady schapilisia za spravu Zielcera, kab pačać masava źniavolvać hramadzian za mierkavańnie. Pa źviestkach pravaabarončaha centra «Viasna», jak minimum 124 čałaviek byli asudžanyja pa «spravie Zielcera». Hetyja ličby, imavierna, daloka nie poŭnyja, bo nie ŭsie imiony represavanych viadomyja. U asnoŭnym byli zaviedzienyja kryminalnyja spravy za kamientary ŭ padtrymku Andreja Zielcera. Sudam było zahadana rasceńvać ich jak raspalvańnie sacyjalnaj varožaści.

U liku zatrymanych byŭ žurnalist «Kamsamolskaj praŭdy» Hienadź Mažejka — za artykuł pra Zielcera, dzie jaho znajomaja stanoŭča adhukałasia pra ajcišnika ŭ dziacinstvie. Tady ž byŭ zabłakavany sajt kp.by i spyniena dziejnaść biełaruskaj redakcyi «Kamsamołki». Mažejku aryštavali ŭ maskoŭskim aeraporcie.

«Hienadź raskazvaŭ nam, jak jaho zatrymali. Jon pajechaŭ u Maskvu i chacieŭ adtul vylecieć kudyści. Jaho zatrymali supracoŭniki FSB u aeraporcie ŭ Maskvie. Potym zavieźli na biełaruskuju miažu i pieradali KDB Biełarusi. Rasijanie tut supracoŭničali biez usialakich pracedur», — raskazvaŭ jaho sukamiernik.

U vyniku Mažejka byŭ asudžany da troch hadoŭ pazbaŭleńnia voli nibyta za «raspalvańnie varožaści» i «abrazu Łukašenki». Svajoj viny jon nie pryznaŭ.

Hienadź Mažejka padčas suda nad im. Fota: BiełTA

Hienadź Mažejka padčas suda nad im. Fota: BiełTA

Pavarot ad aŭtarytaryzmu da tatalitaryzmu ŭ Biełarusi pačaŭsia z 2020 hoda, kali Alaksandr Łukašenka, miarkujučy pa źviestkach z učastkaŭ, razhromna prajhraŭ Śviatłanie Cichanoŭskaj, ale nie addaŭ uładu.

U krainie pačalisia masavyja pratesty suprać falsifikacyj i parušeńniaŭ zakonnaści, u adkaz łukašenkaŭcy raspačali masavyja represii. Za hety čas u krainie adbyłosia nie mienš za 50 tysiač palityčna matyvavanych zatrymańniaŭ, zaviedziena nie mienš za 12 tysiač palityčna-kryminalnych spraŭ i adkinutyja navat bazavyja normy zakonnaści i marali, sotni tysiač byli zvolnienyja z raboty pa palityčnych matyvach abo zmušanyja da emihracyi.

6 kastryčnika 2021 hoda 31-hadovaha prahramista Andreja Zielcera pachavali na Lasnych mohiłkach u minskim mikrarajonie Šabany. Cieła Andreja pryvieźli na mohiłki naŭprost z morha, bo ŭsim rytualnym załam zahadali admovicca pravodzić cyrymoniju raźvitańnia.

Kadebešnika Dmitryja Fiedasiuka, jaki zapłaciŭ žyćciom za saŭdzieł u represijach, uračysta pachavali 1 kastryčnika. Łukašenka paśmiarotna ŭznaharodziŭ jaho ordenam «Za asabistuju mužnaść». A aktyvistaŭ łukašenkaŭskich psieŭdahramadskich arhanizacyj prymušajuć prynosić kvietki i śviečki da budynka KDB u dzień jaho hibieli.

Čytajcie taksama:

Sudy nad Babarykam i Cichanoŭskim, samalot Ryanair i mihranty, razhrom ŚMI i Andrej Zielcer: hałoŭnyja ludzi i padziei 2021 hoda

Błakavańnie SIM-karty, rachunkaŭ, niemahčymaść pradać ci kupić žytło. Jak KDB zrabiŭ nievynosnym žyćcio fihurantaŭ «śpisa terarystaŭ»

Jak pracujuć boty, jakimi karystajucca hubazikaŭcy, i čamu nie varta ŭ ich pisać «dziela žartu»

Клас
9
Панылы сорам
5
Ха-ха
2
Ого
4
Сумна
17
Абуральна
99