Fota: instahram-akaŭnt kronospan_by

Fota: instahram-akaŭnt kronospan_by

Infarmacyi pra trahiedyju ŭ miedyjnaj prastory było niašmat: ab incydencie paviedamlaŭ milicejski telehram-kanał «Zvarotny bok». Praŭda, u publikacyi śćviardžałasia, što zahinuły pahrebavaŭ praviłami techniki biaśpieki pry praviadzieńni ramontnych prac pahruzčyka. Ale śledstva pryjšło da inšych vysnoŭ.

Žonka rabočaha, jakoha adpravili ŭ turmu z-za hetaha incydentu, ciapier vyrašyła źviarnucca da Łukašenki — i navat zaviała dla hetaha akaŭnt u tyktoku. Šmatdzietnaja maci prosić biełaruskija ŭłady pačuć jaje kryk dušy.

— Majho muža asudzili z-za niaščasnaha vypadku, jaki adbyŭsia na «Kranaspanie» 9 śniežnia 2022 hoda. U toj dzień jon razam sa svaim naparnikam demantavaŭ mačtu, i hetaja mačta ŭpała na naparnika — mužčyna pamior. Va ŭsim hetym abvinavacili majho muža, dali jamu 2,5 hoda abmiežavańnia svabody z nakiravańniem va ŭstanovu adkrytaha typu.

Žančyna raspaviadaje, što ich siamja źjaŭlajecca šmatdzietnaj, samamu małodšamu dziciaci ŭsiaho hod i piać miesiacaŭ, tamu pajści pracavać jana pakul nie maje mahčymaści. Pry hetym da trahiedyi siamja paśpieła ŭziać vialiki kredyt na kvateru. Jana kaža, što sud nie ŭličyŭ hetych abstavin.

— Chaciełasia b skazać, što moj muž nikoli nie piŭ, nie kuryŭ, dobrasumlenna staviŭsia da vykanańnia svaich abaviazkaŭ. Słužyŭ terminovuju słužbu, try hady słužyŭ pa kantrakcie. Usiudy jaho charaktaryzavali vielmi stanoŭča.

Žančyna śćviardžaje, što padčas rasśledavańnia Departamienta achovy pracy byli vyjaŭleny parušeńni ŭ troch čałaviek, ale abvinavačańnie ŭ vyniku vystavili tolki jaje mužu.

− Majstar, jaki zastupaŭ razam ź imi ŭ načnuju źmienu, u siem hadzin viečara źjechaŭ — pakinuŭ svajo pracoŭnaje miesca. I nijakaha pakarańnia jon nie panios. Čamuści nam nie dazvolili pravieści śledčy ekśpierymient, kab dakazać, ad jakich mienavita dziejańniaŭ upała mačta.

Šmatdzietnaja maci taksama kaža, što ŭ jaje vielmi šmat pytańniaŭ da pakazańniaŭ śviedak, jakija nie prysutničali ŭ momant padzieńnia mačty. Jana nazyvaje ŭsie ich pakazańni hałasłoŭnymi.

— Chaciełasia b jašče skazać, što, pakul išoŭ razhlad apielacyi, rečavy dokaz — a mienavita toj samy pahruzčyk — byŭ źniščany. I za heta taksama nichto nie panios nijakaj adkaznaści. Nam prosta dali adpisku, što ŭsio dobra. Chacia ŭ mianie jość fatahrafii, jość navat śviedka, jakomu telefanavali i kazali, što treba razrezać pahruzčyk.

Za dva dni videa nabrała 20 tysiač prahladaŭ. Niechta z kamientataraŭ vyraziŭ skiepsis adnosna taho, što videa ŭ tyktoku dapamoža dastukacca da Łukašenki: «Jon u tyktoku nie siadzić!» Šmatdzietnaja maci paryravała: «Jon nie siadzić, ale ž siadziać inšyja ludzi, a sarafannaha radyjo jašče nichto nie admianiaŭ… Zhadajcie film «Jołki»».

U nastupnym videa žančyna ŭdakładniaje:

— Tam nie było jašče pahruzčyka, jaki patrebny dla padstrachoŭki mačty — kab jana nie ŭpała. Byŭ pahruzčyk, jaki znachodziŭsia na ramoncie — jon nie moh być skarystany jak dapamožny. Ja chaču tolki taho, kab u hetaj kryminalnaj spravie sapraŭdy razabralisia, kab spraviadlivaść pieramahła. 

Šmatdzietnaja maci spadziavajecca, što znojducca ludzi, jakija zojmucca spravaj.

— Tamu što voś navat nakont źniščanaha pahruzčyka my adrazu padavali zajavu jak pra źniščeńnie rečyŭnaha dokazu — i byli adkazy, što ŭsio dobra. A kali my źviarnulisia ŭ Administracyju prezidenta da sapraŭdy pavažanaha čałavieka Volhi Ivanaŭny Čuprys i jana pastaviła hetaje pytańnie na kantrol, niešta tam zrušyłasia, niešta pačali praviarać.

Žančyna raspaviała, što ciapier jana płanuje źviartacca ŭ Viarchoŭny sud.

— Kali łaska, raźbiaryciesia, kali łaska, pačujcie. Tut siadziać dzieci, jany vielmi čakajuć tatu doma.

Čytajcie taksama:

29-hadovy miechanizatar zahinuŭ na ŭborcy burakoŭ

U Homieli naładčyk prahramna adklučyŭ 8 stankoŭ zavoda

U Minsku ruchnuŭ 50-mietrovy kran

Клас
4
Панылы сорам
10
Ха-ха
6
Ого
1
Сумна
7
Абуральна
6