Ilustracyjnaje fota: Naša Niva

Ilustracyjnaje fota: Naša Niva

Kolki elektramabilaŭ u Biełarusi?

Pa stanie na siaredzinu leta hetaha hoda ŭ Biełarusi naličvałasia bolš za 10 tysiač elektramabilaŭ. U ahulnym abjomie ličby nievialikija, ale pryrost zaŭvažny. Hodam raniej elektrakaraŭ było ŭ dva razy mienš, a ŭ 2020-m u krainie ich naličvałasia ŭsiaho kala 400 štuk.

Pavodle prahnozaŭ namieśnika ministra enierhietyki Dzianisa Maroza, da 2025 hoda kolkaść elektrakaraŭ u Biełarusi moža pieravysić 15 tysiač. Raście i kolkaść zaradnych stancyj, na hety momant ich naličvajecca kala 700 pa ŭsioj krainie.

Dośvied uładalnika Nissan Leaf

Ułaśnik Nissan Leaf pieršaha pakaleńnia raspavioŭ «Našaj Nivie», što ŭ jaho vypadku hałoŭnaja prablema ekspłuatacyi elektramabila — nizki zapas chodu.

«Na papiery zapas chodu ŭ Nissan Leaf składaje 160 kiłamietraŭ, ale heta vielmi daloki ad realnaha pakazčyk. Kali kuplaŭ mašynu, to batareja pakazvała 11 dzialeńniaŭ z 12, ale ŭžo tady maksimalny prabieh składaŭ usiaho 120 kiłamietraŭ, i heta ŭ letni pieryjad», — kaža Kiryła.

Pa słovach mužčyny, u maroznyja dni zapas skaračajecca da 80—90 kiłamietraŭ. 

Ilustracyjny zdymak. Fota: Getty Images/Greg Pease

Ilustracyjny zdymak. Fota: Getty Images/Greg Pease

«Na šlachu da domu možna spynicca ŭ samym niečakanym miescy»

«Mašynu davodzicca zaradžać amal kožny dzień. Ale ja žyvu ŭ pryvatnym siektary, tamu heta asabliva nie napružvaje.

Zimoj časam davodziłasia karystacca «Małankami», bo paśla taho, jak pajeździš pa spravach, na šlachu da domu možna spynicca ŭ samym niečakanym miescy. Viadoma, možna jechać z vyklučanaj piečkaj i biez muzyki, kab ekanomić zarad, ale navošta takija pakuty?», — zadajecca pytańniem Kiryła.

Mužčyna zhadvaje, što adnojčy jaho mašyna pieratvaryłasia ŭ harbuz.

«Niedzie praź miesiac paśla kupli my pajechali na Nissan na lecišča da siabroŭ, i tak atrymałasia, što zaradzić batareju na 100% nie było času. Zapas chodu byŭ kala 80 kiłamietraŭ, a darohi pa navihatary było pad 70 u abodva baki.

Paličyŭ, što chopić, ale ŭ vyniku atrymałasia, što pa darozie zajechali ŭ kramu, na vyjeździe z horada pastajali ŭ zatory, a kali treba było viartacca dadomu, na vulicy ŭžo było ciomna, treba było jechać uvieś čas z uklučanym śviatłom. U vyniku batareja całkam razradziłasia za 5 kiłamietraŭ ad domu», — pryznajecca Kiryła.

Ilustracyjny zdymak. Fota: Getty Images/Greg Pease

Ilustracyjny zdymak. Fota: Getty Images/Greg Pease

8—9 rubloŭ na 100 kiłamietraŭ

Mužčyna kaža, što ŭ Biełarusi niama prablem z ramontam i absłuhoŭvańniem elektramabilaŭ. Prynamsi, kali heta nie niejki ekskluziŭ.

«Nissan Leaf davoli staraja madel, jaje pačali vypuskać bolš za 10 hadoŭ tamu, jana tannaja i, napeŭna, tamu davoli masavaja. Za amal dva hady karystańnia prablem z mašynaj nie było. Na raschodnikach, jak i na palivie, atrymlivajecca sekanomić. U elektramabili nie treba mianiać alivu kožnyja 10 tysiač kiłamietraŭ, niama paliŭnaha filtra i h.d.

U ciopły pieryjad jeździć na im vielmi tanna, na 100 kiłamietraŭ prabiehu tracicca 8—9 rubloŭ. A voś uzimku roźnica z aŭto na palivie nie takaja vialikaja», — adznačaje mužčyna.

Tym nie mienš surazmoŭca pryznajecca, što aścierahajecca taho, što hetaj zimoj zapas chodu budzie jašče bolš ścipłym, bo batareja praciahvaje dehradavać.

«Napeŭna, z časam daviadziecca dadatkova zaradžać mašynu, pakul budu znachodzicca na pracy. U cełym zaradnych stancyj pa horadzie chapaje, ale ŭ krokavaj dasiažnaści ad pracy, na žal, niama».

Druhi aŭtamabil u siamji — dyzielny

Padsumoŭvajučy svoj dośvied karystańnia elektramabilem, mužčyna kaža, što naŭrad ci nabyŭ by sabie jaho, kali b žyŭ u šmatpaviarchovym domie.

Ilustracyjnaje fota: Getty Images / Mats Silvan

Ilustracyjnaje fota: Getty Images / Mats Silvan

«Kali ty nie žyvieš u piešaj dasiažnaści da zaradki, to elektramabil asałody tabie nie pryniasie. Prynamsi, kali heta nie niešta novaje i darahoje, bo ŭ sučasnych darahich elektrakarach realny zapas chodu składaje 300—500 kiłamietraŭ.

U takim vypadku možna zaradžacca pa dva razy na tydzień. Biudžetny elektrakar davodzicca zaradžać amal štodnia, i heta, napeŭna, budzie napružvać, kali niama svajoj razietki», — miarkuje Kiryła.

Inšym važnym punktam, pra jaki musiać nie zabyvać tyja, chto pryhladajecca da kupli elektramabila sa ścipłym zapasam chodu, mužčyna nazyvaje najaŭnaść druhoj mašyny ŭ siamji.

«U žonki aŭto dyzielnaje, tamu ŭ dalnija pajezdki my naturalna jeździm na im, bo na «Lifie» ŭ pramym sensie słova daloka nie zajedzieš».

Dośvied uładalnika premijalnaha aŭto

Inšy čytač vałodaje darahim elektramabilem premijalnaha siehmientu. Zapas chodu na papiery ŭ jaho aŭto składaje 450 kiłamietraŭ.

«U realnaści mašyna zdolnaja prajechać kala 400 km. Toje, što zajaŭlajuć vytvorcy, — faktyčna niedasiažny pakazčyk. Prajechać zajaŭleny kiłamietraž nie atrymlivałasia navat z ulikam taho, što ja kuplaŭ hety aŭtamabil novym», — kaža Cimafiej.

Ilustracyjnaje fota: Getty Images / Viaframe

Ilustracyjnaje fota: Getty Images / Viaframe

Tym nie mienš, čytač kaža, što jon całkam zadavoleny nabytkam, bo elektramabil, pa jaho słovach, doryć niezabyŭnyja emocyi.

«Dynamika razhonu nie paraŭnalnaja z mašynami sa zvyčajnym ruchavikom. Navat kali razhladać sučasnyja darahija mahutnyja aŭtamabili, jakich da elektramabila ŭ mianie było niamała».

U adroźnieńnie ad uładalnika Nissan Leaf, Cimafiej zaradžaje aŭtamabil tolki na hramadskich stancyjach. Na zaradku zajazdžaje 1—2 razy na tydzień.

«Z zapasam chodu ŭ 400 kiłamietraŭ na takim aŭto možna biez prablem pierasoŭvacca nie tolki ŭ miežach horada i navakolla, ale i pa ŭsioj Biełarusi. Poŭnaj zaradki chopić, kab dajechać u luby kutočak krainy».

Čytač raspaviadaje, što adnojčy ciaham sutak prajechaŭ na svaim elektramabili biez małoha 1000 kiłamietraŭ.

Ź jaho słoŭ, 30 chvilin zaradki chapaje na 100 kiłamietraŭ prabiehu.

Ilustracyjnaje fota: Getty Images / Witthaya Prasongsin

Ilustracyjnaje fota: Getty Images / Witthaya Prasongsin

«Naturalna, što kali b heta byŭ aŭtamabil z ruchavikom, to ja prajechaŭ by hety kiłamietraž na hadzinu-paŭtary chutčej, ale kali heta nie pajezdka ŭ adzin bok, a tudy i nazad, to možna skazać, što taki aŭtamabil prydatny, kab jeździć na davoli dalokuju adlehłaść. Hałoŭnaje nie sutyknucca z tym, što zaradka, na jakuju ty raźličvaŭ, budzie zaniataja ci nie budzie pracavać ź niejkich techničnych prablem, što časam zdarajecca».

Što tyčycca vydatkaŭ na zaradku, to, pa słovach surazmoŭcy, u pieraliku na bienzin atrymlivajecca toje samaje, što jeździć na aŭto, jakoje spažyvaje 4 litry na 100 kiłamietraŭ, što ŭ pryncypie niemahčyma dla aŭto takoha kłasu.

«Navat kali ŭ maroznyja dni batarei budzie chapać maksimum na 300 kiłamietraŭ, to heta budzie kala 6 litraŭ na sotniu. Adnak ekanomija na palivie — heta chutčej dadatkovy bonus, a nie asnoŭnaja pryčyna kupli takoha aŭto, bo kazać pra ekanomiju na palivie, kali kuplaješ aŭto za takija hrošy, niejak nie łahična. Premijalny elektramabil — heta chutčej pra emocyi i zadavalnieńnie, a nie pra ekanomiju na palivie».

Dośvied uładalnicy Tesla Model 3

Alona ŭžo dva hady karystajecca Tesla Model 3. Pa słovach dziaŭčyny, u letni pieryjad jana zaradžaje aŭtamabil raz na tydzień, časam dva.

Ilustracyjny zdymak. Fota: Getty Images/martin-dm

Ilustracyjny zdymak. Fota: Getty Images/martin-dm

«Na poŭnaj zaradcy možna prajechać kala 360—380 kiłamietraŭ, u zaležnaści ad umoŭ nadvorja i stylu jazdy. Z padzieńniem tempieratur zapas skaračajecca. Asabliva prykmietna, kali na vulicy minus 10 i nižej, tady zapas chodu skaračajecca pracentaŭ na 40».

Čytačka kaža, što nie adčuvaje prablem ź niedachopam zaradnych stancyj, choć na ŭsialaki vypadak starajecca nie pakidać zapas chodu mienšy za 50—60 kiłamietraŭ.

Treba zaŭždy pamiatać, što heta nie aŭto na bienzinie, jakoje možna zapravić za niekalki chvilin i jechać kudy zaŭhodna, bo navat na «chutkich» zaradkach na «zapraŭku» spatrebicca kala dźviuch hadzin. Tamu za čas karystańnia elektramabilem u mianie ŭvajšło ŭ zvyčku, što kali zapas mienšy za 100 kiłamietraŭ, to treba padumać pra zaradku», — kaža Alona.

Čytajcie taksama: 

U Biełarusi vystavili na prodaž Mercedes-Benz W124 za 54 000 dalaraŭ. Za što prosiać takija hrošy

Paraŭnali ceny na aŭtazapčastki ŭ Biełarusi, Polščy i Litvie. Roźnica ŭražvaje

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?