Ahnieška Pivar. Fota: staronka Agnieszka Piwar / Facebook
Žurnalistka Ahnieška Pivar adkryta vykazvaje prarasijskija pohlady, padtrymlivaje antyŭkrainskija nastroi ŭ polskim hramadstvie i raspaŭsiudžvaje ŭstanoŭki pucinskaj prapahandy. U adnym z rasśledavańniaŭ Gazeta Wyborcza adniesła jaje da liku «pucinskich ahientaŭ chaosu», jakija atručvajuć infarmacyjnuju prastoru Polščy.
Sama Pivar na hetuju publikacyju adreahavała pastom u fejsbuku:
«Jaŭrei z «Haziety Vyborčaj» nikoli nie prabačać mnie napisańnia artykuła pad nazvaj «Novy Ijerusalim — prychavanaja meta vajny na Ukrainie?» Tamu jany buduć praciahvać napadać na mianie z roznych nahodaŭ».
Chto hetaja žurnalistka?
Jak paznačaje Pivar na svaim sajcie, jana naradziłasia ŭ 1982 hodzie ŭ Vierchniaj Silezii. Baćka pachodzić ź Vilenščyny. Ahnieška skončyła fakultet fiłasofii Urocłaŭskaha ŭniviersiteta i aśpiranturu pa žurnalistycy ŭ Papskaj teałahičnaj akademii ŭ Krakavie. Siarod jaje sacyjalnaj aktyŭnaści paznačana pasada sakratarki Katalickaj asacyjacyi žurnalistaŭ.
Jak śćviardžaje Pivar, u 2015-2022 hadach jana była žurnalistkaj štotydniovika Myśl Polska (vydańnie, jakoje vyłučajecca jaskravaj antyzachodniaj skiravanaściu).
Pry hetym, pavodle jaje słoŭ, za svaje artykuły, intervju i repartažy žurnalistka «nikoli nie atrymlivała ni kapiejki», zhadžajučysia «publikavacca biaspłatna», tamu što žurnalistyka — jaje «žyćciovy zapał», a sam redaktar nie padviarhaŭ jaje materyjały cenzury.
Miescam ža stałaj pracy ŭ Pivar byŭ archiŭ polskaha telebačańnia. Ciapier jana pazicyjanuje siabie jak niezaležnaja žurnalistka.
Ahnieška Pivar zjaŭlajecca aŭtarkaj knihi «Ubačanaje z Maskvy, i nie tolki» i suaŭtarkaj takich knih, jak «Biełaruś. Anatomija kryzisu», «Ukraina ŭ ahni — kamu patrebna hetaja vajna?», «Stračanaja vajna. Kanflikt va Ukrainie, bienieficyjary i bankruty».
Sumnieŭnyja znajomstvy
U 2017 hodzie Pivar z hrupaj polskich žurnalistaŭ naviedała Čačniu.
«Niama havorki ab hiendarnaj ideałohii, ahresiŭnych fieministkach, žančynapadobnych mužčynach, ŁHBT-ruchach i inšych padobnych adchileńniach. (…) Čačenskija mužčyny mocnyja, vielmi mužnyja, spartovyja, apranutyja pa-mužčynsku», — dzialiłasia jana svaimi ŭražańniami.
Jak piša Wyborcza, kaŭkazskuju pajezdku polskich žurnalistaŭ apłaciŭ Fond padtrymki hramadskaj dypłamatyi, zadačaj jakoha zjaŭlajecca «sadziejničańnie i farmavańnie spryjalnaha klimatu (…) dla Rasii za miažoj». U jaho apiakunskuju radu ŭvachodziać byłyja kiraŭniki i ahienty KDB i rektar adnoj z raźviedškoł.
Hałoŭnym sponsaram zjaŭlajecca Kanstancin Małafiejeŭ, jakoha nazyvajuć «pucinskim pravasłaŭnym aliharcham». Pierakanany vorah fieminizmu, pravoŭ ŁHBT, razvodaŭ i abortaŭ užo šmat hadoŭ znachodzicca ŭ śpisie biznesmienaŭ, jakija padpadajuć pad sankcyi ES i ZŠA.
«Novaja hazieta» pisała, što mienavita Małafiejeŭ braŭ udzieł u raspracoŭcy pieršapačatkovaha płana dałučeńnia Ukrainy, jaki byŭ pradstaŭleny ŭ Kreml u lutym 2014 hoda.
Ahnieška Pivar. Fota: staronka Agnieszka Piwar / Facebook
Akramia hetaha, Ahnieška Pivar była naziralnicaj na parłamienckich vybarach u Azierbajdžanie ŭ lutym 2020 hoda i całkam čakana vysoka acaniła ich arhanizacyju.
Jak paźniej vyśvietliŭ žurnalist Radiozet, misija pa nazirańni była arhanizavana niejkim Janušam N., aryštavanym u 2021 hodzie pa abvinavačańni ŭ špijanažy. Jon pradstaŭlaŭsia supracoŭnikam ABSIE, ale nasamreč (heta vyśvietliłasia tolki paśla zatrymańnia) im nie zjaŭlaŭsia. Hałoŭnaj jaho zadačaj było ŭstalavać kantakt z palitykami i žurnalistami, jakija mahli b słužyć intaresam Rasii.
Ź Janušam N. Pivar znajomaja jak minimum z 2016 hoda, kali źniała dakumientalny film pra bajkierski kłub «Načnyja vaŭki», udzielnikaŭ jakoha ŭ 2015 hodzie nie puścili ŭ Jeŭropu. Adnym z prychilnikaŭ kłuba ŭ Polščy byŭ jakraz Januš N.
Druhim padazronym siabram Ahnieški Pivar Radiozet nazyvaje ruskaha prapahandysta Leanida Śvirydava, jaki ŭ 2015 hodzie byŭ vysłany z Polščy. Letaś zabarona na ŭjezd u Šenhienskuju zonu pa prośbie polskaj kontrraźviedki jamu była praciahnutaja jašče na piać hadoŭ.
U siabrach u Pivar taksama zasnavalnik polskaj prakramloŭskaj partyi «Źmiena» Matevuš Piskorski, jakoha abvinavačvajuć u špijanažy na karyść Rasii i Kitaja.
Žurnalistka ŭvieś čas śćviardžaje, što nie biare hrošaj za svaje žurnalisckija materyjały. Jak zaŭvažaje aŭtar artykuła ŭ Radiozet, u Polščy ciažka znajści kahości, chto va ŭzroście 40 hadoŭ u jakaści supracoŭnika nišavych ŚMI mieŭ by mahčymaść uziać udzieł u spansavanych pajezdkach u Azierbajdžan, Sočy, Maskvu ci Karabach. Pry hetym jaje pracy ŭ internecie možna znajści tolki ŭ srodkach masavaj infarmacyi i partałach, jakija publikujuć prapahandyscki prarasijski kantent.
Biełaruski śled
U lipieni 2021 hoda Ahnieška Pivar atrymała akredytacyju i pajechała ŭ Minsk, dzie ŭziała ŭdzieł i zadała svajo pytańnie ŭ «Vialikaj razmovie» z Łukašenkam. Paśla hetaha žurnalistka napisała:
«Ja łukašenkafiłka, bo polskaść zachavałasia na Haradzienščynie, a nie ŭ zaniapałaj i demaralizavanaj Varšavie, źniaviečanaj viasiołkavymi anučami».
Ahnieška Pivar u Pałacy Niezaležnaści ŭ Minsku. Fota: staronka Agnieszka Piwar / Facebook
A ŭ fejsbuku jana padzialiłasia svaimi ŭražańniami:
«Biełaruś u mianie asacyjujecca z čyścinioj, niavinnaściu i naturalnaj ježaj. A zaraz padumajcie, što było b, kali b padstupny płan zachodnich intryhanaŭ, jakija sprabavali zładzić tam Majdan i žadali zrynuć biełaruskuju ŭładu, uviančaŭsia pośpiecham».
Ahnieška Pivar razam z meram Hrodna Miečysłavam Hojem, namieśnicaj mera Zojaj Kuleša i kiraŭnikom Hrodzienskaha adździaleńnia Sajuza palakaŭ u Biełarusi Kazimiram Znajdzinskim. Žnivień 2021 h. Fota: staronka Agnieszka Piwar / Facebook
Navinoj ab atrymańni akredytacyi Pivar padzialiłasia na svajoj staroncy ŭ fejsbuku. Kiraŭnica telekanała «Biełsat» Ahnieška Ramašeŭskaja-Huzy pierapościła jaje paviedamleńnie z kamientarom:
«Jość čym pachvalicca… Sapraŭdy… U toj čas, jak sumlennyja žurnalisty znachodziacca ŭ turmie, a zasłužanaja Biełaruskaja asacyjacyja žurnalistaŭ (BAŽ) likvidujecca, žurnalistka Myśli Polskiej chvalicca… Adkul takija biarucca?.. Pahladzieła jaje profil u internecie — rehularna apłačvanaja maskoŭskaja najmitka».
Pivar padała ŭ sud na Ramašeŭskuju-Huzy i praź niekatory čas, pavodle jaje słoŭ, pazbaviłasia svajho adzinaha miesca pracy, a polskija śpiecsłužby zabłakavali dostup da jaje błoha.
Sioleta 6 śniežnia kiraŭnica «Biełsata» pryniesła publičnyja prabačeńni za svaje słovy. A niezadoŭha da hetaha ŭ siecivie zjaviŭsia piersanalny sajt žurnalistki.
«Pry žadańni ja biez prablem mahu atrymać pres-akredytacyju ŭ Biełarusi (u adroźnieńnie ad žurnalistaŭ «Biełsat TB»), dziakujučy čamu mahu jeździć tudy, paznavać krainu znutry i jaje ludziej»,
— pisała Pivar na svaim sajcie, a na staroncy ŭ fejsbuk vychvalałasia paštoŭkaj ad Łukašenki da 8 sakavika.
Paštoŭka ad Łukašenki. Fota: staronka Agnieszka Piwar / Facebook
Jak adznačajuć ekśpierty, praca takich žurnalistaŭ, jak Pivar, nadzvyčaj važnaja dla stvareńnia i raspaŭsiudžvańnia rasijskaj prapahandy. Jany dziejničajuć nie ŭ adzinočku, ich supravadžaje sietka, jakaja raspaŭsiudžvaje ich kantent. U vyniku polski internet navodnieny rasijskaj dezynfarmacyjaj i prapahandaj. I, jak demanstrujuć apytańni hramadskaj dumki, hetaja prapahanda stanovicca ŭsio bolš efiektyŭnaj u zachopie rozumaŭ polskich hramadzianaŭ.
Čytajcie jašče:
Apieracyja «Dvajnik»: jak dziejničaje rasijskaja prapahanda
Rasijskija hastralory inscenirujuć antyŭkrainskija mitynhi ŭ Jeŭropie — Le Monde
