Kamisiju pa viartańni stvaryli ŭ lutym 2023 hoda. Uznačaliŭ jaje hienprakuror Andrej Švied. Siarod tych, chto vyrašaje losy emihrantaŭ, — teleprapahandyst Ryhor Azaronak, kolišni kiraŭnik fiederacyi chakieja, a ciapier «sienatar» Dźmitryj Baskaŭ, pierabiežčyk z apazicyi, zasnavalnik «Kruhłaha stała demakratyčnych sił» Juryj Vaskrasienski, prapahandyst Vadzim Hihin.

Pavodle apošnich apubličanych źviestak ad Hienprakuratury, u kamisiju pa viartańni ź lutaha pa vierasień pastupiła bolš za 100 zvarotaŭ. Zajaŭki prymali da 31 śniežnia 2023 hoda.

Vidavočna, što łukašysty raźličvali na kudy vyšejšyja ličby. 

Kamu dali spakojna pryjechać

Na BT pakazvali minčuka Filipa Davydava. Jon udzielničaŭ u pratestach, udaryŭ pa milicejskaj mašynie, źjechaŭ, a paśla vyrašyŭ viarnucca. Jak jon raskazvaŭ u siužecie, na miažy pakazaŭ kopiju rašeńnia kamisii pa viartańni.

Filip Davydaŭ. Skryn videa BT

Filip Davydaŭ. Skryn videa BT

«Ja kali źviarnuŭsia ŭ kamisiju, dumaŭ, što nie pasadziać, ale daduć niejki abo ŭmoŭny termin, abo chatniuju chimiju. Ja nie raźličvaŭ tak, što ja pryjedu, mianie nichto nie budzie čapać, što ja budu spakojna hulać pa vulicach», — kazaŭ jon.

Doktar-artapied Alaksandr Pipkin u 2022-m źjechaŭ u Hiermaniju, ale mienš čym praz hod viarnuŭsia ŭ Biełaruś.

Artapied Alaksandr Pipkin. Skryn videa BT

Artapied Alaksandr Pipkin. Skryn videa BT

U siužecie BT Alaksandr Marksavič, doktar z bolš jak 20-hadovym stažam, raskazvaŭ, što ŭ Hiermanii, kab dasiahnuć takoha ž uzroŭniu, jaki byŭ u jaho ŭ Biełarusi, treba prajści doŭhi šlach. Atrymaŭšy dazvoł na pracu, pieršy čas možna pracavać tolki asistentam doktara.

U siužecie zhadvałasia, što jon byŭ u Kaardynacyjnaj radzie (najchutčej, razmova pra pašyrany skład rady). Ale paśla heta stała niecikava, u nijakaj dziejnaści KR doktar nie ŭdzielničaŭ.

Pavodle jaho słoŭ, jon chacieŭ vyjści z arhanizacyi, kali kryminalnaja sprava była zaviedzienaja, ale miechanizmu vychadu nie było.

«Mnie chočacca zajmacca svajoj lubimaj spravaj», — kazaŭ Pipkin pra svaje płany ŭ Minsku.

Praz kamisiju pa viartańni pryjechała z Polščy maci pamiłavanaha Ramana Pratasieviča. U sakaviku 2023 hoda jana padała zvarot u kamisiju i ŭžo ŭ mai viarnułasia.

«Ja atrymała adkaz, što ŭ dačynieńni da mianie niama ni kryminalnych, ni administracyjnych parušeńniaŭ», — kazała Natalla Pratasievič.

Na kaho zaviali spravu

Viadomy šerah vypadkaŭ, kali tyja, chto viartaŭsia na radzimu praz kamisiju, usio adno traplali pad sud i atrymlivali realnyja terminy.

Adzin z prykładaŭ — 30-hadovy Ihar Niemirovič. U jaho vypadku fakt viartańnia praz kamisiju nie pryznali «biezumoŭnaj padstavaj dla vysnovy pra jaho raskajańnie». 

Zhodna ź viersijaj abvinavačvańnia, 10 žniŭnia 2020 hoda Ihar Niemirovič raźmiaściŭ u instahramie fota z tekstam, jaki «ŭ nieprystojnaj formie prynižaje honar i hodnaść Alaksandra Łukašenki».

Ilustracyjny zdymak. Fota: skrynšot ź videa

Ilustracyjny zdymak. Fota: skrynšot ź videa

Sudździa Maryja Alifiaruk pryznačyła bieraściejcu adzin hod kałonii va ŭmovach ahulnaha režymu.

Siarhiej Piatrulevič z Vaŭkavyska viarnuŭsia dadomu praz kamisiju, paśla čaho ŭ intervju na ANT raspaviadaŭ, jak składana žyć u Polščy i jak ty tam nikomu nie patrebny. 

Fota: skrynšot ź videa ANT

Fota: skrynšot ź videa ANT

Kryminalnuju spravu na žychara Vaŭkavyska pavodle dvuch artykułaŭ Kryminalnaha kodeksu nie spynili.

Mužčynu vinavacili ŭ paklopie na pradstaŭnika ŭčastkovaj vybarčaj kamisii (art. 188 KK) i abrazie pradstaŭnika ŭłady (art. 369 KK). Sud jon čakaŭ pad padpiskaj ab niavyjeździe. Na momant zapisu intervju ŭ vieraśni 2023 hoda sprava znachodziłasia na «dadatkovym razhladzie ŭ Śledčym kamitecie».

Dalejšy los mužčyny nieviadomy. 

«Heta taki typ ludziej, što nie buduć raicca z pravaabaroncami»

Dakładnaja kolkaść ludziej, jakija źviarnulisia ŭ kamisiju pa viartańni i paśla hetaha adpraviłasia za kraty, nieviadomaja.

Pravaabaroncy adznačajuć, što ludzi, jakija viartajucca praz kamisiju, da ich nie źviartajucca. 

«Heta taki typ ludziej, što nie buduć raicca z pravaabaroncami, bo majuć nadzieju na pazityŭny vynik. Tamu, na žal, my daviedvajemsia pastfaktum pra takija vypadki», — kaža stvaralnica Dissidentby Maryna Kasinierava.

Jak zatrymlivajuć pa viartańni

Kali havaryć nie tolki pra viartańnie praz kamisiju, to zdaralisia i inšyja zatrymańni. Z apošnich prykładaŭ — vypadak ź bieraściejcam, jaki bolš za hod pražyŭ za miažoj, ale vyrašyŭ sustreć Novy hod doma i byŭ zatrymany.

Jašče adna niadaŭniaja historyja — z Alaksandram Kulikovym. Mužčyna źjechaŭ za miažu praz palityčny pieraśled, ale paźniej viarnuŭsia ŭ Biełaruś, bo siłaviki paabiacali, što jamu budzie abranaja miera pakarańnia, nie źviazanaja z pazbaŭleńniem voli.

Mužčynu zatrymali prosta na miažy. 

Jak paviedamlali pravaabaroncy, jamu prysudzili try hady kałonii za kamientary ŭ ekstremisckich čatach. Ź siužeta dziaržTB stała viadoma, što Kulikoŭ, aproč hetaha, pad śledstvam pa padazreńni ŭ najmictvie i ŭdziele ŭ dziejnaści terarystyčnaj arhanizacyi.

Adnych prymajuć na miažy, inšych — pa miescy žycharstva (toj fakt, što nie zatrymlivajuć adrazu na pahraničnym kantroli, tłumačycca adsutnaściu takoj nieabchodnaści i banalnaj niazručnaściu).

Važna, što čałaviek moža navat nie zdahadvacca, što na radzimie im cikaviacca siłavyja orhany. 

Kiraŭnik «Bajpoła» Alaksandr Azaraŭ raniej tłumačyŭ «Našaj Nivie»:

«Kali apieratyŭniki ź liku supracoŭnikaŭ MUS ci KDB vyznačajuć asobu, jakuju treba zatrymać, to jany pačynajuć prahladać źviestki, dzie znachodzicca hety čałaviek. Siłaviki praviarajuć čałavieka pa bazie, dzie zachoŭvajucca źviestki pra pierasiačeńnie miažy, hladziać łakacyju jahonaha telefona. Kali jany razumiejuć, što patrebny im čałaviek užo źjechaŭ za miažu, to nie zavodziać na jaho kryminalnaj spravy, a pierš za ŭsio paviedamlajuć u pamiežny kamitet, što takoha hramadzianina treba pastavić na kantrol pierasiačeńnia miažy». 

Ilustracyjny zdymak. Fota: skrynšot ź videa

Ilustracyjny zdymak. Fota: skrynšot ź videa

Toje, što siłaviki čaściej za ŭsio nie zavodziać spraŭ na tych, chto ŭžo znachodzicca za miažoj, Azaraŭ tłumačyŭ tym, što apieratyŭnikam prosta nie patrebnyja hetyja «visiaki».

«U kožnaha apieratyŭnika jość śpis takich asob, na jakich jany ŭžo sabrali patrebnuju infarmacyju i pastavili ich na kantrol pierasiačeńnia miažy.

Kali niechta sa śpisa pryjazdžaje ŭ Biełaruś, to, užo majučy padrychtavany materyjał, siłaviki źviartajucca pa sankcyju prakurora na vobšuk, zatrymlivajuć čałavieka i pieradajuć materyjały ŭ Śledčy kamitet dla zaviadzieńnia kryminalnaj spravy. Takim čynam u ich atrymlivajucca dobryja pakazčyki pa vykryvalnaści «złačynstvaŭ».

Čytajcie taksama: 

«A kali tabie ŭ**ać pa hałavie?» Dziaŭčyna pryjechała ŭ Biełaruś zamianić pašpart — i apynułasia za kratami. Voś jaje historyja

Pa viartańni z-za miažy zatrymali bieraściejca, jaki pryjechaŭ u Biełaruś na śviaty

Клас
5
Панылы сорам
25
Ха-ха
1
Ого
2
Сумна
1
Абуральна
20