Rasija papiaredziła Jeŭrapiejski Sajuz, što pastaŭki nafty ŭ Słavakiju, Vienhryju i Čechiju mohuć skaracicca praz płany Ukrainy pavialičyć płatu za tranzit. Ab hetym u paniadziełak paviedamiŭ premjer-ministr Słavakii Robiert Fica.

Adnak u adroźnińnie ad minułahodniaj situacyi z pastaŭkami rasijskaha hazu ŭ Jeŭropu, novy enierhietyčny kanflikt Rasii i Ukrainy nie pavinien vyklikać vialikich prablem u zhadanych krainach – ich naftavyja reziervy dastatkovyja, kab pieračakać zimu.

Vienhierskaja naftahazavaja kampanija MOL Nyrt zajaviła, što atrymała apaviaščeńnie ad rasijskaj «Transnafty», što adsutnaść tranzitnych damoŭ z «Ukrtransnaftaj» moža pryvieści da skaračeńnia pastavak nafty ŭ Centralnuju Jeŭropu pačynajučy z 1 studzienia.

Mahčymaść pierabojaŭ u pastaŭkach syroj nafty moža źjavicca «u suviazi sa sprečkaj pamiž hetymi dvuma krainami (Rasijaj i Ukrainaj)» – zajaviŭ spadar Fica.

Nahadajem, što minułaj zimoj pa padobnych pryčynach byli spynienyja pastaŭki hazu, što vyklikała vialikija ciažkaści ŭ enierhietyčnaj śfiery krain Centalnaj Jeŭropy.

«Ale ŭ adroźnieńnie ad hazavaha kryzisu ŭ studzieni minułaha hoda, lubyja mahčymyja pieraboi ŭ pastaŭkach nafty mohuć być kampiensavanyja pastaŭkami praz alternatyŭnyja maršruty» – adznačaje słavacki premjer-ministr.

Dola rasijskaj nafty ŭ Słavakii składaje 90% ad unutranaha popytu. Alternatyvaj mohuć stać pastaŭki z vykarystańniem čyhunki. Adnak nieabchodnaści ŭ hetym pakul niama. Ministr pramysłovaści Słavakii Lubamir Jachnatek zapeŭniŭ, što kraina maje naftavyja zapasy, jakich chopić bolš čym na try miesiacy.

Češskaja Respublika taksama padrychtavałasia da skaračeńnia pastavak nafty z Rasii. Aficyjny pradstaŭnik Ministerstva pramysłovaści Čechii Tomaš Bartoŭski adznačyŭ, što «my prajšli praz anałahičnyja situacyi ŭ 2008 i 2007 hadach i tamu my hatovyja».

Čechija mienš zaležyć ad rasijskaj nafty, čym Słavakija. Pramysłovaść hetaj krainy na 30% zabiaśpiečvajecca naftaj z porta Tryjest, kudy taja dastaŭlajecca ź Piersidskaha zaliva. Adnak u vypadku nieabchodnaści, pastaŭki syraviny pa hetym šlachu mohuć zadavolić patreby ŭsioj češskaj haspadarki. Što praŭda, na heta patrebny niekatory čas.

Padobnaja situacyja i ŭ Vienhryi. Naftavych reziervaŭ hetaj krainy dastatkova na 90 dzion. Dla pavieličeńnia pastavak syraviny z adryjatyčnaha nakirunku budzie dastatkova miesiaca. U takoj situacyi, skaračeńnie pastavak nafty Rasijaj u krainy Centralnaj Jeŭropy moža kaštavać dla Kramla vielmi doraha. Kali Vienhryja i Čechija pieraaryjentujucca na paŭdniovy nakirunak, to ich rynki buduć stračanymi dla Rasii.

AP, pavodle The Wall Street Journal

Клас
0
Панылы сорам
0
Ха-ха
0
Ого
0
Сумна
0
Абуральна
0