Vital Łapcionak Vitalij Łaptionok Vitaly Laptyonok

Vital Łapcionak. Skryn videa: malina_by / YouTube

Vital Łapcionak skončyŭ Licej BDU, pracavaŭ u TUT.BY, zasnavaŭ Genesis Media, a ciapier uznačalvaje inviestycyjny fond Flyer One Ventures, jaki ŭvachodzić u Genesis.

Pačatak biznesu

Vital zhadvaje, što pieršyja kroki ŭ biznesie jon pačaŭ rabić u 18 hadoŭ, kali vučyŭsia na ekanamičnym fakultecie BDU. Razam ź siabrami jon rabiŭ sajty. Paźniej naradziŭsia sumiesny prajekt z TUT.BY. Spačatku jon razam ź siabrami pryjšoŭ da Juryja Zisiera pa inviestycyi.

«My prapanavali zrabić biełaruski Financial.com. Juryj Anatoljevič padumaŭ i skazaŭ: «Davaj ty heta budzieš rabić razam z nami». I ja pačaŭ heta rabić u ramkach TUT.BY».

Jak zhadvaje Łapcionak, u čas, kali jon pryjšoŭ na partał, tam pracavała čałaviek 30 i raźvivać napramak jamu daviałosia adnamu. Paźniej była stvorana kamanda, jakaja sumiesna z Genesis pačała raźvivać miedyja-biznes u krainach, jakija raźvivajucca, u tym liku ŭ Afrycy. Kali Genesis vykupiŭ svaju dolu ŭ TUT.BY, Vital dałučyŭsia da Genesis.

«TUT.BY — heta ŭsio ž taki biełaruski biznes. Mižnarodnyja ambicyi byli dastatkova ścipłymi. Tamu ja pryniaŭ rašeńnie dałučycca da Genesis, bo ź pieršaha dnia heta byŭ mižnarodny biznes».

Adnosiny ź Juryjem Zisieram

Žurnalist Mikita Miełkazioraŭ pryhadaŭ intervju Juryja Zisiera dev.by, u jakim uładalnik TUT.BY, zhadvajučy proźvišča Łapcionka, zaŭvažyŭ: «Nie ŭsie zachoŭvajuć łajalnaść». Jak Vital stavicca da takich słovaŭ? Niekatoryja nazyvajuć Łapcionka prateže Zisiera, adznačajučy, što jon bačyŭ u chłopcy patencyjał.

Pa słovach Łapcionka, jon ź vialikaj pavahaj stavicca da Juryja Zisiera i taho, što jon zrabiŭ. «U niejkaj miery ciešyć, što majo proźvišča było zhadana. Heta značyć, što jon mianie acaniŭ». Vital dapuskaje, što jaho sychod z TUT.BY moh zasmucić Zisiera. 

«Paśla hetaha my sustrakalisia i dastatkova pa-siabroŭsku razmaŭlali», — zhadvaje Vital.

Aceńvajučy rolu Juryja Zisiera ŭ historyi Biełarusi, Vital adznačyŭ:

«Upeŭnieny, što hetamu čałavieku kali nie pomnik, to peŭnuju kolkaść vulic u novaj Biełarusi možna pryśviacić. Toje, što jon stvaryŭ, było vielmi važnym dla krainy. Mnie racyjanalna składana patłumačyć, ale prajekt TUT.BY sapraŭdy byŭ narodnym miedyja.

Heta niejki ŭnikalny biełaruski fienomien. Ničoha padobnaha ja nie bačyŭ, kab ludzi realna lubili jaho, pačynali dzień z TUT.BY. Ni ŭ koha nie było ŭražańnia, što niechta sprabuje z dapamohaj hetaha miedyja prasunuć niejki punkt pohladu. TUT.BY staraŭsia zaŭsiody być dzieści pasiaredzinie i davać abjektyŭnuju infarmacyju».

Ci ŭ hrašach ščaście?

Pa słovach Łapcionka, dla jaho hrošy — taja reč, jakaja surjozna zdymaje ŭzrovień tryvožnaści, a taksama dazvalaje dapamahać inšym. «Kali ŭ ciabie jość hrošy, ty možaš mocna nie chvalavacca, paśpieješ ty na rejs ci nie».

Biznesoviec zhadvaje, što ŭ svajoj pieršaj zamiežnaj pajezdcy jon z žonkaj zastaŭsia biez hrošaj:

«U nas u Italii prosta fizična skončylisia hrošy. Było vielmi cikavaje adčuvańnie, kali my šukali samuju tannuju picu za 2 jeŭra, prasili tavaryša vysłać hrošy praz Western Union. Ja nie chaču tudy viarnucca».

Vital raspavioŭ, što jon pachodzić z «dastatkova nie zabiaśpiečanaj siamji». I toje, što jon pačaŭ zajmacca biznesam — «heta pra toje, kab nie być biednym».

«Jeść bajki pra biednaść u spałučeńni sa ščaściem. Ale ja baču, što hrošy i ščaście spałučajucca. Byli daśledavańni pra toje, što ŭzrovień ščaścia paśla 100 tysiač u hod nie ŭzdymajecca. Ale pa novych daśledavańniach, jon raście da ŭzroŭniu pałovy miljona ŭ hod. Jość usio ž zaležnaść pamiž ščaściem i hrašyma. I častka hetaj zaležnaści vyznačajecca tym, što niejak mienš pieražyvaješ».

Ci moža sabie dazvolić jachtu

Łapcionak adznačaje, što ŭ jaho niama jachty. «Mnie asabliva nie chočacca jachty. Mnie padajecca, jachta — heta takaja reč, jakaja stvorana dla taho, kab ty moh niekudy patracić hrošy, kali ich u ciabie vielmi šmat. Tamu što ŭ śviecie vielmi mała rečaŭ, jakija kaštujuć stolki, kolki jachta».

Na pytańnie, ci moža jon ciapier dazvolić sabie jachtu, biznesoviec z uśmieškaj adkazaŭ:

«Pytańnie pamieru. Nievialikuju moža być». I patłumačyŭ: «Pra heta jość vielmi razumnaja dumka. Vielmi važna razumieć svoj pamier. Kali ty kupiš niešta, što tabie nie vielmi treba, heta pryniasie tabie tolki niaščaści, prablemy i dadatkovyja vydatki». Vital imkniecca nie rabić takich pakupak.

Łapcionak raduje siabie pajezdkami: «Da vajny ŭ nas była nievierahodnaja pajezdka ŭ Kieniju na safary. Ja liču, kali ty možaš svajmu dziciaci padaryć tydzień sa słanami, ziebrami i inšymi žyviołami, to heta nievierahodnaja, kłasnaja historyja. Dziela hetaha i varta zarablać».

Pra žyćcio ŭ kamforcie

Vital adznačaje, što ŭ jaho jość peŭny ŭzrovień vydatkaŭ na danaty. Pa jaho słovach, «chacieć niejkija vialikija pakupki, kali jość patreba ŭ dapamozie, heta nie zusim pravilnaja reč u biahučaj situacyi».

Ciapier Łapcionak žyvie ŭ Varšavie na zdymnaj kvatery. Ale asnoŭnaja baza jaho biznesu znachodzicca ŭ Partuhalii. Adsutnaść nieruchomaści, pa słovach Vitala, pavyšaje jaho mabilnaść. U Kijevie ŭ jaho była nieruchomaść. Va Ukrainu Łapcionak čas ad času pryjazdžaje. Tam zastałasia častka biznesu.

Vital ličyć, što «vielmi niedarečnaja reč padymać svoj uzrovień žyćcia kožny raz, jak pavyšajecca tvoj uzrovień dachodu. U niejki momant treba zrabić tak, kab tvoj uzrovień žyćcia ros trochi pavolniej za dachod».

U biznesoŭca jość bary ŭ Varšavie, Kijevie i Lisabonie. Jon ličyć heta inviestycyjami ŭ kamjunici. «Heta sposab kamunikacyi ź vialikaj kolkaściu vielmi kłasnych ludziej, jakija prychodziać da ciabie ŭ hości. Apieracyjna ja hetym nie zajmajusia. Hetym zajmajucca ci maje partniory, ci maja žonka. Ja inviestuju i chadžu tudy jeści i pić».

«Kali havaryć surjozna, jość niejkaja imaviernaść taho, kali štučny intelekt zabiare va ŭsich nas rabotu, to intertejmient stanie vielmi važnaj častkaj našaha žyćcia i biznesu. Mahčyma, heta adbudziecca ŭ pierśpiektyvie troch piacihodak. Ciapier heta bolš jak chobi. Kali pahladzieć histaryčna, to ŭ 19 stahodździ volnaha času nie było zusim. Ź ciaham času jaho stanaviłasia ŭsio bolej. Dumaju, što hety trend praciahniecca i ŭ budučyni»,

— tłumačyć biznesoviec.

Ci mianiaje žyćcio status miljaniera

Vital nie chavaje taho fakta, što zjaŭlajecca miljanieram. Ale ŭ jaho niama ni viertalotaŭ, ni parka aŭtamašyn.

«U mianie mašyna Volvo XC90. Vydatnaja mašyna. Mnie bolš padabajecca inviestavać u niejkija startapy. Ja inviestavaŭ piersanalna ŭ peŭnuju kolkaść startapaŭ, u jakija nie inviestavaŭ fond. Ja zajmajusia niejkim naboram dabračynnych inicyjatyŭ».

Pry hetym Łapcionak adznačaje, što biznes — heta štodzionnaja praca: «Heta nie fiestyval, a ciažkaja historyja».

Čytajcie jašče:

Jak zarabić u Biełarusi: sakretami dzielacca ŭładalniki chostełaŭ, kaviarniaŭ, vytvorcy cacak i virtualnych hulniaŭ

Startapy pamirajuć, a inviestary ich nie ratujuć

Damien tut.by kančatkova zabrali va ŭładalnikaŭ

Клас
23
Панылы сорам
4
Ха-ха
1
Ого
1
Сумна
2
Абуральна
3