Naradžeńnie vaśminoha z hrupy jajek u «jaślach» la padvodnaj hary Tengosed / Fota: Schmidt Ocean Institute
Raznastajnaść i pryhažość žyćcia na našaj płaniecie nie pierastajuć uražvać. Mižnarodnaja navukovaja hrupa z Schmidt Ocean Institute vyjaviła jak minimum čatyry novyja vidy hłybakavodnych vaśminohaŭ padčas dźviuch ekśpiedycyj u 2023 hodzie, padčas jakich navukoŭcy daśledavali padvodnyja hory la cichaakijanskaha ŭźbiarežža Kosta-Ryki.
Fota: Schmidt Ocean Institute
Padčas svajoj pieršaj ekśpiedycyi ŭ červieni 2023 hoda kamanda znajšła dva «dziciačyja sadočki», źviazanyja z hidratermalnymi krynicami. Praz paŭhoda navukoŭcy viarnulisia da hetych vaśminohavych jaślaŭ i pierakanalisia, što jany, zdajecca, aktyŭnyja kruhły hod. Taksama daśledčyki nazirali niekalki inšych novych vidaŭ vaśminohaŭ udalečyni ad hidratermalnych krynic.
Novanarodžany vaśminoh ździajśniaje adno sa svaich pieršych płavańniaŭ u žyćci / Fota: Schmidt Ocean Institute
Adzin z novych vaśminohaŭ źjaŭlajecca pradstaŭnikom hłybakavodnaha rodu Muusoctopus. Jaho vyrašyli nazvać Dorado Octopus u honar pieršapačatkovaha miesca adkryćcia — nievialikaha ahaleńnia skały, jakaja nieaficyjna zaviecca El Dorado Hill. Astatnija try z vyjaŭlenych novych vidaŭ usio jašče apisvajucca kamandaj.
Maci-vaśminohi časta skručvajucca ščupalcami i prysoskami vonki. Daśledčyki miarkujuć, što heta abarončaja pazicyja suprać drapiežnikaŭ. Paśla taho, jak samka vaśminoha adkładaje jajki, jana zaŭsiody dahladaje ich: uvieś čas vientyluje, pramyvajučy strumieniem vady; prybiraje staronnija pradmiety i brud. Na praciahu ŭsiaho pieryjadu raźvićcia jajek samka zastajecca la hniazda bieź ježy i tamu amal zaŭsiody pamiraje paśla vyłupleńnia moładzi. Samki hłybakavodnych vaśminohaŭ mohuć pravodzić pobač z kładkaj niekalki hadoŭ, bo z-za nizkaj tempieratury vady raźvićcio jajek adbyvajecca asabliva doŭha / Fota: Schmidt Ocean Institute
Pakul daśledčyki nazirali, jak tolki mienavita Dorado adkładvaŭ jajki ŭ hidratermalnych krynicach. Adkryćcio dadaje dokazy taho, što rod Muusoctopus evalucyjanavaŭ tak, kab adkładać jajki ŭ ciopłych krynicach na marskim dnie.
Čytajcie taksama:
Čamu vyroščvańnie vaśminohaŭ vyklikaje tak šmat pytańniaŭ
Vaśminohi mohuć naŭmysna kidacca rečami ŭ inšych žyvioł. Navošta jany heta robiać?
