FSB praviała pieratrusy ŭ Rasavijacyi pa kryminalnych spravach ab niezakonnym vyvadzie z-pad rasiejskaj jurysdykcyi amal 60 hramadzianskich samalotaŭ i viertalotaŭ, paviedamili krynicy «Iźviestij». «Pačynajučy z sakavika 2022 hoda, hetyja barty byli pradadzieny ŭ tym liku ŭ niedružalubnyja krainy, paśla čaho try viertaloty brali ŭdzieł u SVA na baku praciŭnika, a Ił-76 dastaŭlali hruzy z vyklučanymi adkazčykami, kab ich maršruty nielha było adsačyć, ukazała krynica, blizkaja da siłavych struktur», — piša vydańnie.
Mienavita hetaja historyja, imavierna, i pryviała da adstaŭki ŭ vieraśni 2023 hoda Alaksandra Nieradźko, jaki ŭznačalvaŭ Rasavijacyju na praciahu 14 hadoŭ.
Padstavaj dla zaviadzieńnia kryminalnych spraŭ pasłužyła pravierka dziejnaści Rasavijacyi pa dziaržaŭnaj rehistracyi hramadzianskich pavietranych sudoŭ i viadzieńni adpaviednaha rejestra. Mintrans pravioŭ jaje letaś u lipieni. U vyniku vyśvietliłasia, što paśla pačatku vajny supracoŭniki ahienctva niezakonna zdymali z rehistracyi samaloty i viertaloty.
Niekalki niezakonna źniatych z rehistracyi i vyviezienych za miežy Rasii bartoŭ stali akazvać sadziejničańnie Ukrainie padčas vajny, paviedamiŭ adzin z surazmoŭcaŭ «Iźviestij», blizkich da pravaachoŭnych orhanaŭ.
Pavodle jaho słoŭ, razmova idzie ab samalotach Ił-76 i viertalotach Mi-8. Try viertaloty brali ŭdzieł u vajnie na baku praciŭnika, a Ił-76 rabili rejsy z vyklučanymi pryborami. Praktyka adklučeńnia adkazčykaŭ na borcie dazvalaje chavać infarmacyju ab maršrutach, pa jakich bort pieravozić hruzy, takija paloty nie bačnyja, naprykład, na FlightRadar24.
Ił-76 heta samalot, jaki maje stratehičnaje značeńnie padčas uzbrojenych kanfliktaŭ, ličyć były vajskovy piłot i eks-namieśnik ministra hramadzianskaj avijacyi Aleh Śmirnoŭ. U jaho vialikaja dalokaść palotu, i navat kali jon ekspłuatujecca hramadzianskaj avijakampanijaj, jaho možna chutka pieraabstalavać pad pierakidvańnie vielizarnaj kolkaści hruzaŭ vajennaha pryznačeńnia i sotniaŭ sałdat.
— Prodaž takoha vidu transpartu, zdolnaha chutka ździajśniać dastaŭki ŭ lubuju kropku ziamnoha šara ŭzbrajeńnia i sałdat, viadoma, treba abmiežavać — albo na niejki čas, albo ŭ kankretnyja krainy, asabliva niedružalubnyja, jakija mohuć vykarystoŭvać jaho ŭ intaresach Ukrainy, — zajaviŭ Aleh Śmirnoŭ «Iźviestijam». — Kali heta jašče nie zrabili, to heta vialiki niedahlad.
Čytajcie taksama:
Samaloty, jakija laciać pa Polščy kala biełaruskaj miažy, abaviazali być «bačnymi i čutnymi»
Łatvija viarnuła abaviazkovuju słužbu ŭ armii
Jak vyhladajuć samyja vialikija ŭ śviecie mohiłki samalotaŭ VIDEA
