Čarhovy film Cima Biortana, apošniaja rola Chita Łedžera, novyja reinkarnacyja Robin Huda i Dzivosnakrajovaj Alisy… 6 žachałak i fantastyčna-pryhodnickich stužak-premjer 2010-ha.
 Chit Łedžer |
1. Paśpiachova pakazanaja ŭ pazakonkursnaj prahramie Kanaŭ stužka Tery Hiljama «Fantazium doktara Parnasa» na hetym tydni (z čaćviarha) pryjazdžaje da nas. Jana raspaviadaje pra ŭhodu dyrektara vandroŭnaha cyrka, iluzijanista, z Šatanam i pra padarožžy ŭ paralelnyja suśviety. Tut — aktorskaje suzorje: ad Džoni Depa i Krystofiera Płamiera da sipataha vykanaŭcy bluzaŭ Toma Ŭetsa. I jašče — heta apošniaja rola Chita Łedžera («10 rečaŭ, jakija ja nienavidžu ŭ tabie», «Historyja rycara»). U «Fantaziumie» Łedžer syhraŭ visielnika.
 |
2. «Alisa ŭ krainie cudaŭ». Nieakazačnik Cim Biortan («Edvard Ruki-nažnicy», «Čarli i jaho šakaładnaja fabryka», «Betman»), bačyć śviet na svoj krychu ździacinieły kapył. Ale hetym razam usio budzie pa-darosłamu. Amal. Usie staryja hieroi (Čyrvovaja Karaleva, Biełaja karaleva, Sonia, Čašyrski Kot) mo i zastanucca ŭ svaim uzroście, ale samoj Alisa padraście da 19-ci hadoŭ dy kiniecca na ŭcioki ad svajho nialubaha žanicha.
Naahuł, miarkujučy pa kinapradvieśniku (trejleru), nas čakaje kali nie šmatkałaryjnyja kašmary, dyk prynamsi žachałka-łajt z zaŭsiodnymi mistyčnymi vychadkami Biortana. Aktory — usiudyisny Džoni Dep, a taksama Chiełen Bonem Karter i En Cheteŭej. Čakanaja hetak doŭha premjera - u sakaviku.
 Raseł Kroŭ na zdymkach stužki |
3. Režysior Rydli Skot nikoli nie pakinie svajho ŭlubionaha hładyjatara Raseła Kroŭ. Jon jaho adno pierakinie ŭ časie, pieraapranie suhučna času, i znoŭ prymusić zmahacca za adnaŭleńnie spraviadlivaści. Hetym razam u Šervudskim lesie, suprać siaredniaviečnaha anhlijskaha isteblišmientu. Tak-tak, słaŭny chłopiec «Robin Hud»viartajecca, a poruč ź im rudaja pryhažunia Kiejt Błanšet.
 |
4.«Jak pryručyć cmoka». Hety mulcik zrabili, vidać, kab hladač nie vielmi pałochaŭsia sioleta. Hetaja paciešnaja animacyja pra Chikupa Charendusa Chedaka III, spadkajemca trona karaleŭstva vikinhaŭ, jaki pakutuje na adnu krychotnuju prablemku: jon, u procivahu svaim prodkam, nie hieroj. Navat vypraviŭšysia zabić samaha-samaha, žachliva-zabojčaha, cmoka, Ch.Ch.Ch.-III znachodzić zamiest pačvary biazzubuju reptyliju. Niama čaho rabić: skandynaŭ znajomicca z cmokam, i razam jany rušać na pošuki ŭžo sapraŭdnych pryhodaŭ. My ŭ adkazie za tych, kaho źbirajemsia zabić.
 Šrek i šrekaniaty |
5. «Šrek», jaki vyjšaŭ jak vychodziŭ u kinastudyi «Drymvorks», spaborniku «Dysneja», pakrysie pieratvarajecca ŭ sieryjał, dy ŭ mai viartajecca z čaćviertaj častkaj. Siužet: užo siamiejny, ź dzietkami, Šrek, byccam by pryzvyčaiŭsia da cichamirnaści chatniaha žyćcia, ale sumuje pa nieŭtajmavanych pryhodach ź minułych hadoŭ/sieryjaŭ.
Kab kinucca nazad u ekšen, jon zaklučaje damovu sa złaviesnym karłam, jaki pierakidvaje jaho, moŭ Marfiej Nea, u inšuju realnaść — tam ni dzietak, ni žonki. Havarki aśluk u toj paralelnaj rečaisnaści robicca ŭzvažanym intelektuałam, kot u botach mianiaje šablu na ružovy łuk, a jon i Fijona, jaho lubaja Fijona, nieznajomyja adno adnamu. U dadatak ščyruje cełaje padpolle kazačnych hierojaŭ, jaki sa zbrojaj u rukach zmahajucca za lepšuju dolu dla zialonych pačvaraŭ. Šreka my ŭbačym u mai.
 Sceny z «Masakry». Fota Aleś Kudrycki |
6. I na desiert: ajčynnaja žachałka «Masakra» ad režysiora «Misteryi. Akupacyja» Andreja Kudzinienki.
Kudzinienka ćvierdzić, što zdymaje ŭ styli bulba-horror, pierajmajučy tradycyi fantastyčnych, pieraplecienych z falkłoram tvoraŭ Jana Barščeŭski i Uładzimira Karatkieviča. Ale «Bulba-Chorar» —heta nie tradycyjnaja stužka žachaŭ, «Bulba Chorar» heta kali i strašna, i śmiešna.
Dziejańnie karciny adbyvajecca na fonie paŭstańnia 1863 h. U majontak hrafa Pazurkieviča prybyvaje małady čałaviek, što maje namier vučycca vyjaŭlenčamu mastactvu ŭ Italii, adnak nie maje srodkaŭ i, zadumaŭšy hałavakrutnuju avanturu, pradstaŭlajecca prafiesaram, jaki nibyta pryjechaŭ da Pazurkieviča vyvučać šyrokuju biblijateku hrafa, paralelna paśpiavajučy aktyŭna zalacacca da niaviesty Pazurkieviča, pryhažuni Hanny. Adnak dziŭnyja padziei, što adbyvajucca ŭ majontku, uciahvajuć hościa ŭ vir mistyčnaj i žudasnaj historyi.
Film płanujecca zdać 2 lipienia 2010 hoda. «Masakra» jašče nie ahučanaja, da kanca nie smantažavanaja , ale stvaralniki filmu spadziajucca, što hladač pabačyć jaje jašče sioleta.
