Pa‑mulavinsku vusatyja hastarbajtery Lonik i Hienik, byłyja vykładčyki babrujskaha VNU, pryjechali rabić ramonty ŭ Maskvu. Jany jaŭna nie ŭ temie:
na dušavuju kabinku dumajuć, što heta lift; mlejuć, pabačyŭšy madelek na podyumie. Jašče jany marać zakałacić 500 RUR, kab doma kupić na ich ahraharadok. Raniej biełarusy žyli zamožna, čamu zarukaj byli załatyja jajki vialikaha kniazia Alhierda (tyja samyja, ź jakimi jon na Vialikdzień 1370 h. vypraŭlaŭsia ŭ pachod na Maskvu). Ale jajki vykraŭ rasijski aliharch, i biełarusy ad halečy ratujucca zarobkami ŭ RF. U Maskvie taksama jość dobryja ludzi: jany dapamahajuć biełarusam viarnuć jajki. Urešcie — chepi‑end, tancy, fiejervierk…
Zamianicie biełaruskich hastarbajtaraŭ na tadžykskich, a Alhierda — na Čynhischana i atrymajecie siužet filma «Jajki losu».
Jon składzieny na asnovie repryzaŭ z telepieradačy «Naša Russia».
Pieradačy, dzie ŭ paradyjnym vyhladzie pakazvajucca prablemy hramadstva, jość u mnohich krainach. Naprykład, anhlijskaja
nazyvajecca «Maleńkaja Brytanija». Ale aŭtary «Rašy» i «Jajek» nie prapanujuć Rasii śmiajacca ź siabie. Jany imitujuć hety śmiech. Kali zabaroniena kpić z Pucina (možna zhubić licenziju), kali nielha korpacca ŭ rasijskich kompleksach i fobijach (možna zhubić kasu), daviadziecca śćvierdzicca za rachunak inšaha, słabiejšaha. I šlifanuć siužet naŭmysna nieprystojnymi, «nižej pojasu», žartami.U filmie juvielirna dakładna pieradadzieny nierv i atmaśfiera sučasnaj Rasii.
Čaho zusim niama ŭ zmałpavanaj, ale bieskanfliktnaj «Našaj Biełarašy». U «Jajkach losu» padadzieny dakładny źlepak z rečaisnaści: u procistaŭleńni mocy ź niemačču pieršaja zaŭsiody pieramahaje z sytaj uśmieškaj. Humar filmu možna nazvać humaram bota na horle.
Jalejny Baskaŭ u «Jajkach» hraje samoha siabie. Jon rasściłajecca pierad sponsaram‑aliharcham. Samaironija, zdavałasia b? Ale ŭ hety samy momant Baskaŭ na našych vačach i za našy ž hrošy šlifuje svoj imidž, daskanalić miedyjnuju ŭsiobakovaść.
A kali adzin z hierojaŭ, siaredniestatystyčny mužyk, niby žartam pačynaje kpić ź nierasijskich proźviščaŭ u finalnych tytrach, ty čuješ, nakolki jon heta ŭsurjoz.
