Ź siońniašniaha dnia taryfy na tranzit rasijskaj nafty praz terytoryju Biełarusi i transpartavańnie nafty na biełaruskija NPZ pavialičany na 11%.

Pieralik taryfaŭ praviedzieny ŭ adpaviednaści z zaćvierdžanaj Biełaruśsiu i Rasijaj mietodykaj pa źmianieńni taryfaŭ na pasłuhi pa transpartavańni nafty. Heta mietodyka ŭvajšła ŭ pakiet dakumientaŭ ab umovach pastaŭki ŭ Biełaruś rasijskaj nafty, padpisany 27 studzienia ŭ Maskvie.

Raniej taryfy na pampavańnie nafty pa terytoryi Biełarusi vyznačalisia ŭ jeŭra, ciapier jany ŭstanoŭleny ŭ rasijskich rublach.

Pamiery taryfaŭ aficyjnyja krynicy pakul nie abjaŭlajuć.

28 studzienia pieršy vice‑premjer Biełarusi Uładzimir Siamaška adznačyŭ, što «biełaruski bok maje mahčymaść značna pavialičyć taryf na pampavańnie nafty ŭžo ŭ kastryčniku hetaha hoda». Baki zaćvierdzili mietodyku raźliku koštu tranzitu, jakaja dazvalaje raźličyć raschody i pradjavić ich rasijskamu boku, skazaŭ jon. Pieršy vice‑premjer dadaŭ, što ŭ vypadku kali Rasija nie pahodzicca z raźlikami biełaruskaha boku, praduhledžana štohadovaje pavyšeńnie staŭki na tranzit rasijskaj nafty na pamier inflacyi ŭ Rasii plus 3%. «Navat heta źjaŭlajecca vielmi značnaj sumaj», — padkreśliŭ Siamaška.

Nahadajem, pa vynikach pieramoŭ u Maskvie Biełaruś i Rasija harantavali bieśpierabojnuju pastaŭku nafty ŭ Jeŭropu. «Rasijski i biełaruski baki paćviardžajuć svaju prychilnaść da pryncypaŭ mižnarodnaj enierhabiaśpieki i harantujuć stabilnyja ŭmovy tranzitu nafty praz terytoryju Rasijskaj Fiederacyi i Respubliki Biełaruś», — havorycca ŭ sumiesnaj zajavie Uładzimira Siamaški i vice‑premjera RF Ihara Siečyna.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?