Siońnia va Ukrainie prajšoŭ druhi tur prezidenckich vybaraŭ. Za prava zaniać vyšejšuju dziaržaŭnuju pasadu zmahalisia ciapierašniaja prem'jer-ministarka49-hadovaja Julija Cimašenka i lider apazicyjnaj Partyi rehijonaŭ, były kiraŭnik urada 59-hadovy Viktar Janukovič. Ekzit-poły dajuć pieramohu Janukoviču ź pieravahaj u 3–4% hałasoŭ.

Hałasavańnie ŭ vioscy Zimnaja Vada, što pad Lvovam.

Hałasavańnie ŭ vioscy Zimnaja Vada, što pad Lvovam.

Ukraina znoŭ padzialiłasia nadvoje. Ale kantrolny pakiet na hety raz pierajšoŭ na ŭschod.

Zhodna z vynikami ŭsich apytańniaŭ na vychadzie z učastkaŭ pieramahaje lider apazicyi Viktar Janukovič. Ekzit-poły ładzili 6 roznych ahienctvaŭ. Pavodle ŭsich sacyjołahaŭ, Janukovič nabiraje 49–50% hałasoŭ. Za Cimašenku prahałasavali 44–46% vybarcaŭ.

Zaŭtra prychilniki Janukoviča majuć sabrać masavy mitynh u Kijevie, kab prademanstravać padtrymku svajmu kandydatu. Siońnia ž 1500 milicyjantaŭ uziali pad uzmocnienuju achovu dziaržaŭnyja ŭstanovy stalicy.

Štaby Janukoviča j Cimašenki abvinavačvajuć supiernikaŭ u parušeńniach vybarčaha zakanadaŭstva. Adnak Kamitet vybarcaŭ Ukrainy na hety raz nie ŭbačyŭ značnych adstupleńniaŭ ad zakona.

U pieršym tury, jaki prajšoŭ 17 studzienia z udziełam 18 kandydataŭ, Janukovič nabraŭ 35,32% hałasoŭ, Cimašenka — 25,05%. Dziejny prezident Viktar Juščanka atrymaŭ 5,45% hałasoŭ i zaniaŭ piataje miesca. Jaŭka vybarščykaŭ skłała 66,76%.

Cimašenka — vydatnaja pramoŭca — zdoleła źmienšać adstavańnie ad supiernika, ale nie zdahnała jaho. Suprać jaje hulała pahanaja ekanamičnaja situacyja. Ukraina pieražyvaje ekanamičny kryzis najciažej u Jeŭropie. Akramia taho, asłabiłasia sistema kiravańnia. Tak, va ŭkrainskich haradach słaba prybirajuć śnieh. Jość harady, dzie žycharam nie padajecca haračaja vada.

Siaredni zarobak va Ŭkrainie — adzin z najnižejšych u Jeŭropie. Horš zarablajuć tolki ŭ Małdovie i na Kaŭkazie.

Janukoviča padtrymali poŭdzień i ŭschod Ukrainy, Cimašenku — centr i zachad.

Vybary prachodziać va ŭmovach palityčnaha i ekanamičnaha kryzisu. Abodva kandydaty vykazvajuć upeŭnienaść u svajoj pieramozie. U pryvatnaści, pavodle słoŭ Janukoviča, jon raźličvaje na dva prezidenckija terminy, kab realizavać svaje zadumy. Cimašenka zajaviła, što ŭ vypadku falsifikacyj jaje prychilniki «hatovy dać adpor», jaki jaje sapiernik «nie bačyŭ navat u 2004 hodzie». Jana rezka raskrytykavała ŭchvaleńnie 2 lutaha Viarchoŭnaj radaj papravak ŭ zakon ab vybarach prezidenta, zhodna ź jakimi vybarčyja kamisii, u pryvatnaści, paŭnamocnyja prymać rašeńni biez kvorumu ŭ dźvie traciny jaje členaŭ. ABSIE asudziła źmienu vybarčaha zakanadaŭstva pamiž dvuma turami.

Papiarednija prezidenckija vybary ŭ 2004 hodzie prajšli ŭ try tury. U pieršym pieramohu atrymali lider apazicyjnaj kaalicyi «Siła naroda» Viktar Juščanka (39,90%) i prem'jer-ministr Viktar Janukovič (39,26%). U druhim tury, pavodle aficyjnych źviestak, bolš hałasoŭ nabraŭ Janukovič (49,46% suprać 46,61% u Juščanki). Prychilniki apazicyjnaha kandydata vyjšli na vulicy ŭ znak pratestu suprać falsifikacyj. Masavyja vystupleńni ŭ Kijevie i inšych haradach centra i zachadu krainy atrymali nazvu «aranžavaja revalucyja», simvałam jakoj stała płošča Niezaležnaści — Majdan — u stalicy. Zhodna z rašeńniem Viarchoŭnaha suda Ukrainy byŭ pryznačany treci tur, jaki vyjhraŭ Juščanka (51,99% hałasoŭ suprać 44,20%).

Jak ustanoŭlena zakonam ab vybarach prezidenta Ukrainy, pieramožcam budzie pryznany toj. chto «pavodle vynikaŭ paŭtornaha hałasavańnia atrymaŭ bolšuju, čym druhi kandydat, kolkaść hałasoŭ vybarščykaŭ, što ŭziali ŭdzieł u hałasavańni».

Pavodle mierkavańnia biełaruskaha palitołaha Valeryja Karbaleviča, adnosiny Biełarusi i Ukrainy zastanucca raniejšymi niezaležna ad taho, chto stanie prezidentam hetaj krainy. «U nas z Ukrainaj niama i nie było mocnych prablem, a kali i byli jakijaści nieparazumieńni, to, ja spadziajusia, jany byli źniaty padčas niadaŭniaha vizitu Łukašenki va Ukrainu. Adnosiny zastanucca siabroŭskimi i partniorskimi», — ličyć palitołah.

Janukovič u časie kampanii abiacaŭ zachavać demakratyčnyja dasiahnieńni apošnich hadoŭ i ŭličyć pamyłki minułaha. Vybary taksama pakazali, što palaryzacyja Ukrainy zhładžvajecca vielmi pavoli. Vyniki kandydataŭ u votčynie supiernikaŭ vyraśli proci 2004 hoda ŭsiaho na niekalki pracentaŭ hałasoŭ. Janukovič admoviŭsia ad rusafilskaj rytoryki i zavajavaŭ častku vybarcaŭ na zachadzie krainy. Hetak, jon atrymaŭ 42% hałasoŭ u Zakarpaćci, 37% — na Žytomirščynie i 9% — u sercy Haliččyny, Lvoŭskaj vobłaści.

U svaju čarhu, Julija Cimašenka starałasia zavajavać simpatyi žycharoŭ uschodu. Jana paźbiahała antyrasiejskich vypadaŭ i naładžvała suviazi z Maskvoj. U vyniku za jaje prahałasavali 16% vybarcaŭ Kryma, 10% žycharoŭ Sievastopala i 6% u ajčynie Janukoviča, Danieckaj vobłaści. Čas pavoli vyrablaje źjadnanuju ŭkrainskuju nacyju.

Hladzicie taksama fotarepartaž Julii Daraškievič z Kijeva

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?