«Dakumient nielha siońnia ŭsprymać jak niešta celnaje. Da 1 traŭnia budzie pryniaty šerah aktaŭ, prapanovaŭ Savietam ministraŭ, u jakich hetyja ćmianyja na siońnia momanty buduć bolš dakładna prapisanyja»,
— zajaviła staršynia HA «Biełaruskaja asacyjacyja žurnalistaŭ» Žanna Litvina padčas pres‑kanfierencyi 8 lutaha.
Pres-kanfierencyja ładziłasia Biełaruskaj asacyjacyjaj žurnalistaŭ z nahody padpisańnia Łukašenkam ukaza «Ab mierach pa ŭdaskanaleńni vykarystańnia nacyjanalnaha siehmienta sietki Internet»:
«Mianie bolš za ŭsio tryvožyć toje pałažeńnie va ŭkazie, u jakim havorycca, što Apieratyŭna‑analityčnamu centru pry Administracyi prezidenta sumiesna ź Ministerstvam suviazi daručana raspracavać paradak abmiežavańnia dostupu da sajtaŭ», — padkreśliła Žanna Litvina.
U novym zakonie Apieratyŭna‑analityčny centr maje prava zajmacca apieratyŭna‑vyšukovaj dziejnaściu, maje prava kantralavać pierapisku.
«Ustupić u siłu miechanizm vielmi surjozny i niepradkazalny ŭ baraćbie ź infarmacyjaj toj jakaja nie padabajecca»,— miarkuje staršynia BAŽ.
«My za plačyma majem dośvied prymianieńnia zakonu ab ekstremiźmie. Kali infarmacyjnyja materyjały, dyskiety i knihi, i navat časopis «ARCHE», zarehistravany Ministerstvam infarmacyi, ‑‑ mahli stać padstavaj dla zaviadzieńnia sudovaj spravy. Usio heta moža vypłyć i ŭ našaj situacyi, padčas vybarčaj kampanii», ‑‑ vykazała zakłapočanaść Žanna Litvina.
Aproč novaha zakonu, Biełaruskaja asacyjacyja žurnalistaŭ nahadvaje i pra inšyja ŭžo znajomyja biełarusam znaki biady. Nieŭzabavie pačnucca vybarčyja kampanii, pieradusim, kampanija pa vybarach prezidenta. Nie vyklučana, što niezaležnyja ŚMI znoŭ zaznajuć mocny cisk. Prykładam, u 2001 h. paśla vybaraŭ źnikła amal pałova hramadska‑palityčnych niezaležnych hazietaŭ. Adny začynialisia pad prymusam, inšyja vymušany byli sami zakančvać svaju dziejnaść.
Paśla kampanii 2006 hoda 19 hramadska‑palityčnych haziet byli pazbaŭleny mahčymaści raspaŭsiudžvacca ŭ sistemach raspaŭsiudu Biełpošty i Biełsajuzdruku, padkreślivajuć u BAŽy.
