Marlen Dytrych

Marlen Dytrych

Halivud ciapier nie adzin taki. 52 hady paśla taho, jak u Łos-Anželesie była zasnavanaja viadomaja Aleja Zorak, Bierlin taksama asnadzicca ŭłasnaj alejaj, na jakoj buduć uviekaviečanyja imiony dziejačaŭ kino. Na bierlinskaj alei, jakaja pralahaje pobač z Muziejam kino na Padstdam-štrase, buduć napisanyja imiony tolki tych aktoraŭ i režysioraŭ, jakija zrabili svoj uniosak mienavita ŭ niamiecki kiniematohraf. Pieršaja, čyjo imia chočuć uviekaviečyć u asfalcie —lehiendarnaja Marlen Dytrych, uraženka Berlinu. Aleju prademanstrujuć na hetym tydni padčas Bierlinskaha kinafestu, jaki sioleta adznačaje 60 hadoŭ.

Marlen Dytrych, jakaja naradziłasia ŭ 1901 h., prydbała suśvietnuju słavu dziakujučy hałoŭnaj roli ŭ mieładramie «Błakitny anioł» u 1930 h., ale ŭ dzień premjery imihravała ŭ ZŠA, dzie ŭziała ŭdzieł u niekalkich halivudskich kasarobach. Niahledziačy na ŭprošvańni ministra prapahandy fašystoŭskaje Niamieččyny Jozefa Hiebielsa Marlen Dytrych nie pahadziłasia viarnucca na baćkaŭščynu, adreahavaŭšy na zaprosiny: «Ja nie našu karyčnievaha». Pamiorła Marlen Dytrych u 1992 h.

Na Alei pobač z Dytrych vyhravirujuć imiony 39 inšych vybitnych dziejačoŭ kinamastactva, siarod jakich: amierykaniec Kviencin Tarancina, čyj apošni film «Biassłaŭnyja bajstruki» častkova zdymaŭsia ŭ Niamieččynie, i ŭ dadatak siužetna zakranaje padziei Druhoj Suśvietnaj, režysior Fryc Łanh (stvaralnik maciery ŭsich fantastyčnych antyŭtopijaŭ, stužki «Mietrapolis»), niemiec tureckaha pachodžańnia Facich Akin (aŭtar viadomaj trahikamiedyi «Hałavoj ab ścienku» pra žyćcio tureckich imihrantaŭ u FRN), a taksama aktory aŭstryjskaha pachodžańnia Romi Šnajder i Arnold Švarcenehier.

Aleja adčynicca dla publičnaha ahladu (i špacyru) tolki ŭ vieraśni, i štohod da jaje buduć dadavać dziesiać novych imionaŭ žyvych i spačyłych aktoraŭ i kinadziejačaŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?