Čarhovaja kampanija pa vybarach u miascovyja Saviety deputataŭ startavała. Zdajecca, dla partyjnych lideraŭ źjaviłasia mahčymaść pakazać usiu svaju moc, bo vialikaje, jak viadoma, pačynajecca z małoha.
Pavieł Sieviaryniec, adzin z sustaršyniaŭ arhkamiteta pa stvareńni partyi «Biełaruskaja chryścijanskaja demakratyja»:
— Na bližejšych vybarach u miascovyja Saviety svaju kandydaturu budzie vyłučać adzin z sustaršyniaŭ arhkamiteta pa stvareńni BCHD — Hieorhij Dźmitruk. Taksama ŭ rehijonach buduć vyłučany miascovyja aktyvisty BCHD. Asabista ja pryniaŭ rašeńnie nie vyłučacca na bližejšych vybarach. Nie chaču padmanvać ludziej i kazać im, što budu zajmacca kamunalnymi prablemami. Nie tamu, što nie chaču hetym zajmacca, a tamu, što jość praca ŭ stvarajemaj partyi i na ahulnanacyjanalnym uzroŭni…
Stanisłaŭ Šuškievič, staršynia Biełaruskaj sacyjał‑demakratyčnaj hramady:
— Nie, nichto z kiraŭnictva našaj partyi, u tym liku i ja, nie budzie vyłučać ułasnyja kandydatury na bližejšych vybarach u miascovyja Saviety deputataŭ.
Anatol Laŭkovič, staršynia Biełaruskaj sacyjał‑demakratyčnaj partyi (Hramada):
— Asabista ja nad hetym pytańniem jašče dumaju. Da čaho schilusia — čas pakaža… Kali ŭsio ž taki vyrašu iści na vybary, to budzie mahčymaść samomu testavać situacyju z vybarami, jak kažuć, na ŭłasnym dośviedzie.
Ciarhiej Kalakin, staršynia partyi «Spraviadlivy śviet»:
— Ja na hetyja vybary nie pajdu. Čamu? Nie pajdu, tamu što nie pajdu. Partyjaj pryniata takoje rašeńnie. Zatoje ad «Spraviadlivaha śvietu» na vybary pojdzie moj namieśnik — Valeryj Uchnaloŭ.
Anatol Labiedźka, staršynia Abjadnanaj hramadzianskaj partyi:
— Udzielničać u kampanii jak kandydat ja nie płanuju. Budzie bolš efiektyŭna, kali ja stanu davieranaj asobaj kandydataŭ ad našaj partyi. Uvohule hetaja kampanija ŭ partyi razhladajecca jak prahlad partyjnaha reziervu, i pa ŭsioj krainie budzie dosyć bahata kandydataŭ ad AHP.
Juraś Hubarevič, namieśnik staršyni ruchu «Za Svabodu»:
— Što tyčycca asoby Alaksandra Milinkieviča, to ŭ jakaści kandydata ŭ deputaty jon vyłučacca nie budzie. Alaksandr Uładzimiravič budzie ŭdzielničać u kampanijach najbolš paśpiachovych kandydataŭ ad ruchu. Budzie ich davieranaj asobaj.
Ryhor Kostusieŭ, namieśnik staršyni Partyi BNF:
— Udzieł u hetaj vybarčaj kampanii ŭ jakaści kandydata voźmie staršynia partyi Alaksiej Janukievič. Taksama vyłučać svaju kandydaturu budzie namieśnik staršyni Ihar Lalkoŭ.