Ministerstva justycyi miarkuje, što arhkamitet pa stvareńni partyi »Biełaruskaja chryścijanskaja demakratyja» (BCHD) parušyŭ paradak praviadzieńnia ŭstanoŭčaha źjezda.
Pra heta 16 lutaha ŭ Viarchoŭnym sudzie pry razhladzie pazova BCHD da Miniusta ab nierehistracyi partyi paviedamiŭ pradstaŭnik Miniusta Jaŭhien Kakuša.
Pavodle jaho słoŭ, u dakumientach, padadzienych zasnavalnikami BCHD u Miniust, paviedamlajecca, što va ŭstanoŭčym źjeździe partyi ŭziali ŭdzieł 311 delehataŭ. «Vybaračnaja pravierka pakazała, što čaćviora z hetych delehataŭ u źjeździe nie ŭdzielničali. Takim čynam, dakumienty, pieradadzienyja ŭ Miniust, nie adpaviadajuć sapraŭdnaści», — zajaviŭ Kakuša.
Aprača taho, paviedamiŭ jon, na padstavie daviedak, atrymanych z adździełaŭ unutranych spraŭ,
16 čałaviek nie zarehistravany pa adrasach, adznačanych va ŭstanoŭčych dakumientach, a ŭ dačynieńni da jašče 13 dapuščany niedakładnyja napisańni ich proźviščaŭ i dat naradžeńnia.
Niekatoryja ludzi sa śpisu zasnavalnikaŭ BCHD zajavili, što nie źjaŭlajucca zasnavalnikami arhanizacyi.
Kakuša zajaviŭ, što ŭ Miniust pavinny padavacca dakumienty dakładnymi źviestkami, a pakolki ŭ dakumientach BCHD dapuščany niedakładnaści, aprača taho, mandatnaja kamisija nie pravieryła paŭnamoctvy delehataŭ źjezda, to hetyja pamyłki nosiać niepapraŭčy charaktar, i admova Miniusta ŭ rehistracyi BCHD poŭnaściu abhruntavana.
U adkaz na heta pradstaŭnik arhkamiteta pa stvareńni BCHD Vital Rymašeŭski zajaviŭ, što ŭ dakumientach, padadzienych u Miniust, ukazvajecca nie miesca rehistracyi abo prapiski, a miesca pražyvańnia čałavieka. Niedakładnaści ŭ napisańni proźviščaŭ i dat naradžeńnia možna vypravić.
«Tyja, chto zajavili, što jany nie źjaŭlajucca zasnavalnikami BCHD, zrabili heta pad naciskam.
Što da źjezda, to jon byŭ lehitymny i pry prysutnaści bolš jak pałovy delehataŭ čatyry čałavieki roli nie adyhryvajuć. I navat kali pryniać pretenzii Miniusta pa 37 zasnavalnikach BCHD z padadzienaha śpisu ŭ 1.051 čałaviek — usio roŭna zasnavalnikaŭ partyi bolš za tysiaču, i Miniust pavinien byŭ jaje zarehistravać», — miarkuje Rymašeŭski.
Rymašeŭski taksama zajaviŭ chadajnictva ab vykliku ŭ sud śviedak z boku arhkamiteta pa stvareńni BCHD. Sud hetaje chadajnictva zadavoliŭ i ŭ druhoj pałovie dnia 16 lutaha pačnie apytańnie śviedak.
