17 lutaha, u Papialcovuju sieradu, u Katalickim Kaściole raspačaŭsia 40‑dzionny Vialiki post. U pieršy dzień postu vierniki ŭstrymlivajucca ad užyvańnia miasnych stravaŭ, a asoby va ŭzroście ad 14 da 60 hadoŭ, jakija nie majuć ciažkich chvarobaŭ, zaachvočvajucca da ścisłaha postu.

U Papialcovuju sieradu vierniki prymajuć udzieł u śviatoj Imšy, padčas jakoj adbyvajecca pasypańnie hałoŭ popiełam, što simvalizuje časovaje prabyvańnie čałavieka na hetaj ziamli, jaho hrešnaść i słabaść.

Padčas pasypańnia hałovaŭ popiełam ad spalenych vierbačak ź minułaha hoda śviatar kaža: «Kajciesia i viercie ŭ Jevanhielle». Jak adznačaje Śviaty Ajciec Bieniedykt XVI u svaim pasłańni na Vialiki post 2010 hoda, «naviartańnie da Chrysta i viera ŭ Jevanhielle aznačajuć mienavita heta: vyjści ź iluzii samadastatkovaści dla taho, kab adkryć i pryniać svaju patrebu — patrebu ŭ bližnich i Bohu, patrebu Jaho prabačeńnia».

Pieražyvańnie Vialikaha postu — heta malitva, post i miłaścina.

U hety pieryjad celebrujucca nabaženstvy na ŭšanavańnie Muki Pana — Pieśni žalby i Kryžovy šlach, — jakija ŭtrymlivajuć razvažańni pra pakutnuju śmierć Zbaŭcy, što spryjaje duchu pakajańnia.

«Vialiki post — heta čas našaha naviartańnia, — adznačaje Mitrapalit Tadevuš Kandrusievič u sioletnim pasłańni na Vialiki post. — Kaścioł zaklikaje ŭvažliva ŭ śviatle Ducha Śviatoha pahladzieć na siabie, kab lepš razhledzieć i pahłybić naš unutrany śviet, u jakim uvieś čas adbyvajecca baraćba pamiž dabrom i złom».

Mienavita tamu post maje na ŭvazie nie tolki cialesnyja adračeńni (umierkavanaść u ježy, admaŭleńnie ad škodnych zvyčak, ustrymańnie ad udziełu ŭ zabavach), ale najpierš pracu nad saboj i ŭłasnymi niedachopami.

Važny akcent u pieryjad Vialikaha postu Katalicki Kaścioł robić na vielikodnuju spoviedź. Pavodle adnaho z kaściolnych nakazaŭ, viernik pavinien prynamsi raz u hod prystupić da sakramentu pakajańnia. Da vielikodnaj spoviedzi možna prystupić u pieryjad z Papialcovaj sierady da ŭračystaści Spasłańnia Ducha Śviatoha, jakaja adznačajecca ŭ 50‑y dzień paśla Vialikadnia.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?