Urad Šviecyi pradoŭžyć «padtrymku adkrytaj i demakratyčnaj Biełarusi». Pra heta zajaviŭ kiraŭnik šviedskaha MZS Karł Bild, pradstaŭlajučy 17 lutaha ŭ parłamiencie krainy źniešniepalityčnuju stratehiju na 2010 hod.
U svaim vystupleńni, jakoje raźmieščana na sajcie ŭrada Šviecyi, Bild ukazaŭ, što «situacyja ŭ Biełarusi praciahvaje vyklikać zaniepakojenaść, nie ŭ apošniuju čarhu ŭ śfiery pravoŭ čałavieka».
Kiraŭnik MZS Šviecyi zaznačyŭ, što Lisabonskaje pahadnieńnie, jakoje ŭstupiła ŭ siłu, nadaje źniešniaj palitycy krainy maksimalnuju jeŭrapiejskuju pierśpiektyvu, što dabaŭlaje adkaznaści i mahčymaściaŭ.
Siarod pryjarytetaŭ Bild nazvaŭ: umacavańnie roli ES jak hłabalnaha hulca, kankretyzacyja i realizacyja palityki «Uschodniaje partniorstva» i stratehii «Rehijon Bałtyjskaha mora», prasoŭvańnie ŭstojlivaj hłabalizacyi, zasnavanaj na demakratyi, pravach čałavieka, mižnarodnych zakonach, praca ź nievyrašalnymi palityčnymi sprečkami ŭ sistemie AAN.
U 2010 hodzie ŭrad Šviecyi zrobić svoj uniosak u dalejšaje stanaŭleńnie Uschodniaha partniorstva, kab prasoŭvać reformy i jeŭrapiejskuju intehracyju ź bližejšymi susiedziami ES na ŭschodzie. «Našy pryjarytetnyja śfiery: finansavaja padtrymka nieabchodnych reform u krainach‑partniorach, sproščanyja mahčymaści dla pracy ŭ ES i padarožžy ŭ ES, libieralizacyja handlu i pavyšeńnie roli hramadzianskaj supolnaści» — zajaviŭ šviedski ministr.
Prahrama «Uschodniaje partniorstva» inicyjavana Polščaj i Šviecyjaj u 2008 hodzie. Jana praduhledžvaje palityčnaje zbližeńnie i ekanamičnuju intehracyju krain‑udzielnic: 27 dziaržaŭ ES i šaści partnioraŭ — Azierbajdžana, Armienii, Biełarusi, Hruzii, Małdovy i Ukrainy.
