18 lutaha ŭ Viciebsku byŭ zatrymany milicyjaj bolš čym na dźvie hadziny aktyvist KCHP‑BNF Barys Chamajda za raspaŭsiudžvańnie partyjnaha časopisa «Biełaruskija viedamaści».
Jak paviedamiŭ Chamajda, jaho zatrymali ŭ centry horada pad markaj pravierki litaratury i pieryjadyčnych vydańniaŭ, jakija jon realizoŭvaŭ. «Pradstaŭniki pravaachoŭnych orhanaŭ admovilisia aznajomicca z vydańniami na miescy i zaprasili mianie prajechać u Čyhunačny RAUS horada», — skazaŭ Chamajda.
Pavodle jaho słoŭ, uvahu supracoŭnikaŭ milicyi pryciahnuli 17 numaroŭ «Biełaruskich viedamaściej» 2008—2009 hadoŭ vypusku, jakija vydaje ŭ Varšavie staršynia KCHP‑BNF Zianon Paźniak. Pakolki heta vydańnie drukujecca ŭ Polščy, supracoŭniki milicyi vyrašyli jaho kanfiskavać i nakiravać u ideałahičny adździeł Viciebskaha abłvykankama na ekśpiertyzu nakont mahčymaści raspaŭsiudžvańnia časopisa, adznačyŭ Chamajda.
Paśla taho jak jon admoviŭsia padpisvać pratakoł ab kanfiskacyi časopisaŭ i zapatrabavaŭ kopiju dakumienta, Chamajdu vyzvalili i viarnuli ŭsie numary vydańnia.
Svajo zatrymańnie palityk źviazvaje z vybarami ŭ miascovyja saviety. «Ułady bajacca słoŭ praŭdy, ź jakimi sa staronak «Biełaruskich viedamaściej» źviartajecca da ludziej Zianon Paźniak», — skazaŭ Chamajda.
