Alaksandr Łukašenka daručyŭ raspracavać zakon ab prachodžańni ŭ Biełarusi alternatyŭnaj słužby ŭ adpaviednaści z 57-m artykułam Kanstytucyi krainy. Jak paviedamlaje pres-słužba prezidenta, takoje daručeńnie było dadziena 18 lutaha paśla taho, jak kiraŭnik dziaržavy zasłuchaŭ dakład dziaržsakratara Rady biaśpieki Leanida Malcava.
«Kiraŭnik Rady biaśpieki adznačyŭ, što «pa hetaj temie šmat roznych insinuacyj». «Miž tym u Biełarusi alternatyva terminovaj słužby dziejničaje. Naprykład, akramia terminovaj słužby, jość słužba ŭ reziervie, jakaja ź`iaŭlajecca alternatyŭnaj, — skazaŭ Leanid Malcaŭ. — Junaki taksama atrymlivajuć voinskija śpiecyjalnaści na vajennych fakultetach i vajennych kafiedrach u navučalnych ustanovach, a zatym termin ich słužby składaje ŭsiaho šeść miesiacaŭ».
Malcaŭ taksama prainfarmavaŭ ab dziejnym miechaniźmie vyzvaleńnia ad terminovaj słužby. Rašeńnie ab vyzvaleńni na zakonnych padstavach ad słužby moža prymać prezident. Adpaviedna štohod vydajecca ŭkaz, na padstavie jakoha dajucca adterminoŭki, u tym liku dla tych hramadzian, jakija pa svaich relihijnych pierakanańniach nie mohuć brać u ruki zbroju. Jak skazaŭ Malcaŭ, heta 50—60 čałaviek štohod za čas pryzyvu.
Na paviedamleńnie ab tym, što Łukašenka daručyŭ padrychtavać zakon ab alternatyŭnaj słužbie, užo adreahavała hramadzianskaja kampanija «Za alternatyŭnuju hramadzianskuju słužbu ŭ Biełarusi».
Jana vitała rašeńnie kiraŭnika dziaržavy. «My raźličvajem na toje, što praces padrychtoŭki zakonaprajekta budzie publičnym, budzie zabiaśpiečana mahčymaść udziełu hramadskich zacikaŭlenych sub`iektaŭ u raspracoŭcy zakonaprajekta, a taksama, što tekst zakonaprajekta budzie raspracavany ŭ adpaviednaści ź mižnarodnymi standartami, z ulikam madelnaha zakona SND «Ab alternatyŭnaj (pazavajskovaj) słužbie», — havorycca ŭ zajavie hramadzianskaj inicyjatyvy.
U dakumiencie nahadvajecca, što siońniašniamu rašeńniu prezidenta papiaredničali sudy nad Dźmitryjem Smykam, Andrejem Cianiutam, Ivanam Michajłavym, Jaŭhienam Jakavienkam, jakija nastojvali na realizacyi prava na alternatyŭnaje prachodžańnie vajennaj słužby i realizacyi artykuła 57 Kanstytucyi Respubliki Biełaruś. Sudovyja pracesy atrymali šyroki hramadski rezanans.
Kampanija «Za alternatyŭnuju hramadzianskuju słužbu ŭ Biełarusi» taksama nahadała, što 26 studzienia staršynia Kanstytucyjnaha suda Biełarusi Piotra Mikłaševič publična zajaviŭ ab nieabchodnaści pryniaćcia zakona ab alternatyŭnaj słužbie.
