U paniadziełak, 1 sakavika, Litoŭskaja hienprakuratura paviedamiła, što atrymała infarmacyju pra toje, što biełaruskija prakurory dapytali Uładzimira Uschopčyka. Spadar Uschopčyk, pavodle litoŭskich prakuroraŭ, 13 studzienia 1991 hoda addaŭ zahad stralać pa biazzbrojnych ludziach u Vilni. Vydać jaho Biełaruś admaŭlajecca.

Hienprakuratura Litvy śćviardžaje, što joju atrymanyja źviestki pra toje, što «stvarajucca jurydyčnyja pieradumovy dla źmieny kvalifikacyi złačynnaj dziejnaści

ŭ złačynstva suprać čałaviectva i vajennyja złačynstvy»,

u takim vypadku nie budzie dziejničać 20‑hadovy termin daŭniny, jaki skančajecca ŭ nastupnym hodzie.

«Adkazy na takija pytańni mahčymyja tolki ŭ kancy rasśledavańnia», — skazaŭ prakuror Rałandas Tylindzis, adkazvajučy na pytańnie, ci mohuć vynieści zavočny prysud pa hetaj spravie.

Zaraz skazać, jakim budzie kančatkovaje rašeńnie, było b niaŭdziačnaj spravaj, bo prakuror źviazany mnostvam mižnarodnych i litoŭskich zakanadaŭčych aktaŭ, jakija abaviazvajuć šanavać nie tolki prezumpcyju nievinavataści, ale i zachoŭvać u tajamnicy dasudovaje rasśledavańnie, a taksama ŭličvać inšyja abstaviny», — skazaŭ Tylindzis.

Prakuror Rałandas Tylindzis prama nie paćvierdziŭ, što prakurory vyrašyli pierakvalifikavać złačynstva z zabojstva ŭ złačynstva suprać čałaviečnaści i vajennaje złačynstva, adnak skazaŭ, što

«atrymanyja źviestki stvarajuć pieradumovy dla źmieny kvalifikacyi złačynstva z usimi vyciakajučymi nastupstvami».

Prakuror zajaviŭ, što nie moža nazvać dakładny čas praviadzieńnia dopytu Uschopčyka.

Hienprakuratura ŭ svaim paviedamleńni adznačaje, što dopyt Uschopčyka paśla ekstradycyi Mikołasa Burakiavičusa i Juozasa Jarmałavičusa — heta

«adzin z najvažniejšych vypadkaŭ, kali jurydyčnaje supracoŭnictva abiacaje važkija zruchi ŭ spravie 13 studzienia».

U pačatku studzienia 2010 hoda Hienprakuratura Biełarusi dasłała dakumient, u jakim paviedamiła, što nie maje namieru vydavać Litvie Uschopčyka i Juonienie.

Biełaruskaja hienprakuratura zajaviła, što «dziejnaść padazravanych, jakija kiravalisia zakonami SSSR, jana aceńvaje jak imknieńnie abaranić kanstytucyjny ład toj dziaržavy i jaje terytaryjalnuju cełasnaść, i pa hetaj pryčynie nie moža akazać pravavuju dapamohu».

MZS Litvy ŭručyŭ Biełarusi notu ŭ suviazi z tym, što Hienprakuratura RB admoviłasia akazać Litvie dapamohu ŭ rasśledavańni spravy 13 studzienia. Litva choča pryciahnuć da adkaznaści hramadzian Biełarusi — hienierała Uładzimira Uschopčyka i Stanisłavu Juonienie. Pa słovach Tylindzisa, nijakich novych źviestak pra Juonienie nie pastupała.

Prezident Litvy Dala Hrybaŭskajcie nazvała dopyt Uschopčyka ŭ Biełarusi dobraj navinoj da 20‑hodździu Śviata 11 sakavika.

«Kanstruktyŭny palityčny dyjałoh daje vyniki, i toj fakt, što Uschopčyka dapytali, i źjavilisia pieradumovy dla pierakvalifikacyi spravy tak, kab pa im nie dziejničaŭ termin daŭniny — heta vielmi dobraja navina da 20‑hodździu 11 sakavika, — skazaŭ pres‑sakratar Hrybaŭskajcie Linas Balsis, pieradajučy słovy prezidenta.

Pavodle Balsisa, kiraŭnik krainy spadziajecca na toje, što «narešcie ŭ prakuratury źjavicca mahčymaść pakončyć z hetaj spravaj».

Na pytańnie ab tym, ci budzie prezident Alaksandr Łukašenka zaprošany ŭ Litvu na jubilej adnaŭleńnia niezaležnaści, Balsis skazaŭ:

«Rašeńnie budzie pryniata ŭ bližejšy čas».

Hrybaŭskajcie ŭ svoj čas zhadvała, što pytańnie zaprašeńnia Łukašenki na ŭračystaści ŭ Vilniu budzie vyrašacca,

kali adbudziecca pierałom u spravie 13 studzienia.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?