Vydańnie «Ježiednievnik», vyvučyŭšy adpaviednyja spravazdačy haspadarčych sudoŭ Mienska i abłaściej, vyłučyła piać najbolš značnych pradpryjemstvaŭ-bankrutaŭ, jakija ŭ svoj čas byli viadomyja na ŭsiu Biełaruś i zajmali značnaje miesca ŭ asobnych siehmientach rynku. U top-5 uklučany tolki pradpryjemstvy, pa jakich u 2009 hodzie zavieršany likvidacyjnyja vytvorčaści.

«Vuador»

Samaje hučnaje imia ŭ hetym pieraliku — sumiesnaje biełaruska-francuzskaje pradpryjemstva «Vuador».

SP u 1990-ja i ŭ pačatku 2000-ch hadoŭ kantralavała značnuju dolu ałkaholnaha rynku krainy, praz pastaŭki syraviny i zbyt pradukcyi surjozna ŭpłyvała na palityku najbujniejšaha likiora-harełačnaha zavoda krainy — mienskaha «Kryštala».

Haspadar biznesu, Anatol Bandarčuk, pasprabavaŭ vyvieści niekalki nacyjanalnych marak na mižnarodny rynak. Najbolš viadomyja ź ich «Usiasłaŭ Čaradziej» (harełka była pradstaŭlena navat na adnym z uznaharodžańniaŭ «Oskara» ŭ jakaści aficyjnaha napoju mierapryjemstva) i «Mark Šahał».

Chodziać čutki, što Bandarčuk byŭ u siabroŭskich stasunkach z upłyvovym Uładzimiram Kanaplovym. I kali pačalisia niepryjemnaści ŭ apošniaha, jakija kaštavali jamu pasady vice-śpikiera, pajšli prablemy i ŭ uładalnika «Vuadora». A. Bandarčuk navat byŭ vymušany pakinuć krainu.

«Lesdreŭpram»

Brend «Lesdreŭpram», mahčyma, nie taki viadomy šyrokamu kołu našych čytačoŭ. Ale ŭ svoj čas hetaje pradpryjemstva było adnym z najbujniejšych apierataraŭ na lasnym rynku krainy.

Stvorany ŭ 1994 hodzie na bazie dziaržaŭnaha pradpryjemstva «Dziaržlespram», «Lesdreŭpram» atrymaŭ na svoj bałans dolu ŭ budynku, dzie raźmieščany kancern «Biellespapierapram», Nova-Śvieržanski lesazavod, a potym damohsia i statusu śpieceksparciora. Akcyjanierami pradpryjemstva źjaŭlaŭsia pracoŭny kalektyŭ (44,5% akcyj), ZAT «Biełciažmaš» (30,5%, adzin z suuładalnikaŭ — ciapierašni deviełapier Ihar Aniščanka) i Minekanomiki (25%).

Prablemy ŭ pradpryjemstva ŭźnikli ŭ pačatku 2000-ch. Spačatku na častku budynka ŭ centry Mienska pakłała svajo voka ŭsiomahutnaje Upraŭleńnie spravami Łukašenki i ŭ vyniku kanfiskavała jaho ŭ svaju karyść praz sud. Potym AAT pazbaviłasia statusu śpieceksparciora, a ŭ 2005 hodzie ŭ jaho ŭ sudovym paradku kanfiskavali i lesazavod.

«Jukoła Aŭta»

«Jukoła Aŭta» — niekali pieršy i ekskluziŭny pradstaŭnik na biełaruskim rynku «amierykancaŭ». U aŭtacentry kampanii na vulicy Kulman pradavali pieršyja ŭ Biełarusi Chrysler i Dodge.

Suuładalniki chołdynhu «Jukoła» Valeryj Šumski i Artur Zubaryk, syjšoŭšy ŭ naftavy biźnies u Rasiei, pastupova raspradali svaje aŭtamabilnyja aktyvy ŭ Biełarusi. Pa «Jukoła Aŭta» jany viali pieramovy z hałoŭnym biełaruskim aŭtaryjełtaram — «Atłant M». Ale, miarkujučy pa ŭsim, baki nie zmahli damovicca.

«Aviaikor Ink»

Pieršaj kampanijaj, jakaja zajaviła budaŭnictva i ekspłuatacyju pieršaha biźnies-centra kłasa «A» u Biełarusi, było ZAAT «Avijakor Ink». Jano było stvorana ŭ 2001 hodzie, paźniej źjaviŭsia i sam abjekt — centr «Kapitał». Adnak potym u kirujučaj kampanii ŭźnikli prablemy z płaciažami ŭ biudžet, i vynikam jaje prablem stała bankructva, što zaviaršyłasia likvidacyjaj hetaj jurydyčnaj asoby.

«Śfieralizinh»

Lizinhavaja kampanija «Śfieralizinh», jakaja spyniła svajo isnavańnie letaś, cikavaja tym, što jaje zasnavaŭ adzin z samych bahatych biełaruskich biźniesmienaŭ Juryj Čyž. Kampanija była zarehistravanaja ŭ 2001 hodzie i ŭ ciesnaj suviazi z «Biełarusbankam» zajmałasia zabieśpiačeńniem pastavak pramysłovaha abstalavańnia.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?