Viktar Kaźko atrymaŭ litaraturnuju premiju «Hliniany Viales» za knihu «Bunt niezapatrabavanaha prachu». Raman dziesiać hadoŭ pralažaŭ u vydaviectvie «Mastackaja litaratura». A śviet pabačyŭ letaś u sieryi «Kniharnia «Naša Niva».

Viktar Kaźko, svaboda.org.

Viktar Kaźko, svaboda.org.

«Naša Niva»: Sp. Viktar, čym vam darahaja hetaja kniha?

Viktar Kaźko: Darahaja tym, što ŭvabrała dva baki majho žyćcia, kali nie bolš. Jana ŭvabrała sibirski pieryjad, moj pierajezd u Biełaruś i znajomstva z krainaj, pajezdki pa Paleśsi. I niama roźnicy, udałaja jana ci nie. U niejkaj stupieni, heta častka majho ŭnutranaha žyćcia, žyćcia nieviadomaha nikomu. Choć ja i adkryty, ale ŭ toj samy čas adkryvacca treba da niejkaj stupieni. Niešta ŭ čałavieka pavinna być svajo, patajemnaje, što jon pavinien nieści. Dla mianie jano adkryvałasia mnoju ž u tvorčaści. Bo pra niekatoryja rečy publična skazać prosta niemahčyma, kab ciabie nie ŭspryniali niejkim nienarmalnym: pra tvaje pačućci, pra tvaje adnosiny da rodnych miaścin.

A tvorčaść jak raz daje mahčymaść vykazacca, skazać pra toje, što ty inšym razam navat toiš ad samoha siabie.

«NN»: Letaś u Vas vyjšli dźvie knihi — raman «Bunt niezapatrabavanaha prachu» i kniha publicystyki i ese «Dzikaje palavańnie lichalećcia». Sioleta čym-niebudź «vystralicie»?

VK: Kab heta zaležała ad mianie. U mianie jašče dźvie knižki lažać niavydadzienyja. Apovieści «Moj strach», «Prachožy» — heta toje, što pryadčyniłasia praz publikacyi ŭ časopisach. Ale ja ž nie siadžu, skłaŭšy ruki. Napisanyja jašče niekalki apovieściaŭ. Apošniaja ź ich — «Skaz pra kata, katory śmiajaŭsia». Publikacyi, biezumoŭna, buduć. A vydańnie knižak — heta nadta składanaja reč. I chto moža vydać? Ja ž razumieju, što ŭ siońniašnim našym Sajuzie, jakoha nie vydajuć u dziaržaŭnych vydaviectvach, 500 siabroŭ. Treba ž niešta i na ich dolu pakidać. I pnucca, zajmać hetuju maleńkuju prastoru, što zastałasia dla cełaha «niačesnaha» Sajuza biełaruskich piśmieńnikaŭ, ja nie źbirajusia. Ja nikoli nie imknuŭsia drukavacca ni ŭ časopisach, ni ŭ vydaviectvach.

U mianie nie toj charaktar, kab leźci, zabiahać, nahadvać pra siabie. I kab tusavacca.

Pra knihu «Bunt niezapatrabavanaha prachu» čytajcie tut.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?