25 lutaha dyrektar «Rasatama» Siarhiej Kiryjenka, namieśnik prem'jer-ministra Siarhiej Ivanoŭ i hubiernatar Hieorhij Baos uračysta zakłali padmurak budučaj AES.

Dva błoki pa 1150 MVt buduć kaštavać 5 młrd jeŭra, rasijcy chočuć zapuścić pieršy ŭ 2016 hodzie, druhi — na dva hady paźniej.

«Rasatam» — dziaržaŭnaja kampanija, adkaznaja za jadravuju enerhietyku ŭ Rasii, — upieršyniu ŭ historyi prapanavała zamiežnym inviestaram trymać 49% akcyj u pradpryjemstvie.

Aficyjna abviaściła pra svajo žadańnie ŭdzielničać tolki ispanskaja Iberdrola. Kiryjenka dadaŭ, što siarod kandydataŭ u inviestary — kampanii z Hiermanii. Partniory buduć abranyja ŭ 2011 hodzie.

«Zavod budzie dastaŭlać elektraenerhiju i ŭ Kalininhradskuju vobłaść, ale ŭ asnoŭnym na ekspart, — kaža pradstaŭnik kampanii, — u krainy Bałtyi, Polšču i Hiermaniju.

Adnak Kalininhradskaja vobłaść maje ciapier naŭprostaje złučeńnie tolki ź Litvoj, a praź jaje — z astatniaj častkaj Rasii i Biełaruśsiu. Ciapier budujecca kluč pamiž Polščaj i Litvoj. My chočam, kab pabudavali jašče adzin — pamiž Polščaj i Kalininhradskaj vobłaściu.
U Polščy budaŭnictva zapavolvajecca praz prablemy z ułaśnikami ŭčastkaŭ, na jakich musiać być prakładzienyja kabieli. „My pra heta viedajem, tamu prapanujem budavać kluč nižej za ŭzrovień mora, pamiž Kalininhradam i Elblonham“.

Polskija słužbovyja asoby nieaficyjna paviedamlajuć, što jany bajacca dalejšaha pavieličeńnia zaležnaści ad impartu enerhanośbitaŭ z Rasii i jak vyniku — mahčymaści enerhietyčnaha šantažu. Rasijcy zapeŭnivajuć, što elektryčnaść — nie haz, pastaŭki jakoha mohuć być prypynienyja ŭ luby čas. Padčas vajny z Asiecijaj u minułym hodzie našyja elektrastancyi ŭ Hruzii pracavali narmalna», — kaža pradstaŭnik kampanii.

Jon dadaje, što jany hatovyja dać inviestaram miescy ŭ radzie dyrektaraŭ kampanii, jakoj budzie naležać elektrastancyja: «Ale my možam nie čakać zhody Polščy, a prakłaści kabiel da Hiermanii ŭzdoŭž hazapravodu Nord Stream».

Heta budzie kaštavać 1,2 młrd jeŭra, ale pradstaŭnik rasiejskaj kampanii kaža, što Kalininhradskaja AES budzie kankurentazdolnaj, bo Hiermanija da 2030 hodu płanuje začynić svaje jadravyja elektrastancyi, a novych stancyj, što pracujuć na vuhali, nie płanujecca. Novyja stancyi buduć pracavać hałoŭnym čynam ad hazu i enerhii vietru, a atamnaja enerhija tańniejšaja za ich.

Najbolš zacikaŭlenyja ŭ budaŭnictvie stancyi ŭ Kalininhradzie litoŭcy. 1 studzienia 2010 hodu ŭ adpaviednaści z pahadnieńniem ź Jeŭrasajuzam była začynienaja Ihnalinskaja AES. Rašeńnie pra jaje zakryćcio było pryniataje jašče ŭ 2004 hodzie, ale z taho času Vilnia zrabiła niašmat, kab pabudavać novuju elektrastancyju.
Litoŭcy kažuć, što razmaŭlali ź piaćciu zacikaŭlenymi inviestarami, ale nieviadoma, ci zdoleje Litva, što pieražyvaje kryzis, sabrać hrošy na novuju elektrastancyju. Usio mienš i mienš šancaŭ na toje, što da prajektu dałučycca Polšča, jakaja zasiarodziłasia na budaŭnictvie ŭłasnaj elektrastancyi.

Pavodle dadzienych kansultacyjnaj kampanii «Rotšyld», u rehijonie budzie popyt na elektraenerhiju ad abiedźviuch stancyj.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?