Na 9 sakavika zapłanavana pasiadžeńnie biełaruska‑polskaj hrupy ekśpiertaŭ, jakaja budzie abmiarkoŭvać mahčymyja šlachi vyrašeńnia kanfliktu vakoł Sajuza palakaŭ na Biełarusi (SPB).

Ź biełaruskaha boku hrupu ŭznačalić upaŭnavažany pa spravach relihij i nacyjanalnaściaŭ Leanid Hulaka, z polskaha — namieśnik ministra zamiežnych spraŭ Andžej Kremier.

Aficyjnyja pradstaŭniki abodvuch bakoŭ hetuju infarmacyju nie kamientujuć.

Rašeńnie pra stvareńnie kamisii ekśpiertaŭ pa ŭrehulavańni kanfliktu vakoł SPB było pryniata pavodle vynikaŭ sustrečy prezidenta Biełarusi Alaksandra Łukašenki i ministra zamiežnych spraŭ Polščy Radasłava Sikorskaha 25 lutaha ŭ Kijevie.

«Prezident Biełarusi skazaŭ, što budzie šukać rašeńnie i budzie stvorana hrupa ekśpiertaŭ, jakaja dapamoža znajści vyjście ź situacyi», — paviedamiŭ tady Sikorski.

Jon zaklikaŭ polskich palitykaŭ i ŚMI nie nahniatać atmaśfieru, kab ekśpierty zmahli najbližejšym časam «vypracavać vyjście, karysnaje dla polskaj nacmienšaści ŭ Biełarusi, kab niejki čas palaki zmahli pracavać u aŭtanomnych strukturach, a Polšča i Biełaruś mahli raźvivać ekanamičnyja, kulturnyja i palityčnyja adnosiny».

Pavodle słoŭ Sikorskaha, jon byŭ inicyjataram sustrečy z Łukašenkam,

i heta była hałoŭnaja pryčyna jaho vizitu ŭ Kijeŭ,

dzie 25 lutaha adbyłasia inaŭhuracyja Viktara Janukoviča. Kiraŭnik MZS Polščy taksama adznačyŭ, što zhoda prezidenta Biełarusi na sustreču śviedčyć pra jaho surjoznaje staŭleńnie da polska‑biełaruskich i biełaruska‑ieŭrapiejskich adnosin.

***

Pryčynaj biełaruska‑polskaha kanfliktu stała situacyja vakoł Doma polskaha ŭ Iviancy (Vałožynski rajon Minskaj vobłaści).

Na jaho pretendujuć dva kryły SPB — aficyjnaje, pryznanaje biełaruskimi ŭładami, i nieaficyjnaje, jakoje padtrymlivajecca kiraŭnictvam Polščy. 17 lutaha sud Vałožynskaha rajona abaviazaŭ dyrektara Doma polskaha Teresu Sobal vyzvalić budynak i pieradać jaho kiraŭnictvu miascovaj arhanizacyi zarehistravanaha SPB.

15 i 17 lutaha biełaruskimi pravaachoŭnymi orhanami byli zatrymany niekalki dziesiatkaŭ aktyvistaŭ nieaficyjnaha SPB, a kiraŭniki arhanizacyi — asudžany.

Dziejańni biełaruskich uładaŭ asudziła nie tolki aficyjnaja Varšava, ale i jeŭrastruktury.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?