Staršynia Centralnaha savieta BFST «Dynama» Juryj Barodzič raskrytykavaŭ vykazvańni hałoŭnaha treniera chakiejnaj zbornaj Biełarusi Michaiła Zacharava ŭ adras arhanizataraŭ Alimpijskich hulniaŭ u Vankuviery.

«My nie pavinny hańbić krainu paśpiešnymi zajavami», — skazaŭ Barodzič, vystupajučy 18 sakavika na pazačarhovaj kanfierencyi Fiederacyi chakieja. Na jaho dumku, Zacharaŭ nie mieŭ prava davać acenku arhanizataram Alimpijady. Vykazvańni treniera vyklikali niehatyŭny rezanans, adznačyŭ Barodzič.

«Kažu jak jość, niachaj Michaił kryŭdzicca ci nie kryŭdzicca», — skazaŭ kiraŭnik BFST.

Na jaho dumku, takija situacyi nieabchodna praduhledzieć u kantrakcie fiederacyi z hałoŭnym trenieram zbornaj, kab apošni nie mieŭ prava rabić padobnyja zajavy.

Sam Zacharaŭ ličyć, što zrabiŭ pravilna, bo arhanizatary nie zabiaśpiečyli naležnyja ŭmovy chakieistam padčas matču Biełaruś — Šviejcaryja. «U raździavalni nie było ni šafaŭ, ni kresłaŭ, chakieisty chadzili ŭ ahulnuju prybiralniu, da jakoj było mietraŭ 50», — skazaŭ trenier. Pavodle jaho słoŭ, pobač pieraapranałasia žanočaja zbornaja Finlandyi,

«hołych dziaŭčat» adździalała tolki šyrma. Abureńnie chakieistaŭ, pavodle słoŭ Zacharava, było vialikaje, ad złości jany łamali kluški.

«Ja ŭpieršyniu ŭbačyŭ takuju arhanizacyju. U Japonii i Italii, nie chakiejnych krainach, takoha nie było», — zajaviŭ jon.

Jak ličyć Zacharaŭ, hetaja situacyja ŭźnikła tamu, što arhanizatary Alimpijady nie mierkavali, što zbornaj Kanady daviadziecca pravodzić stykavy matč, kab trapić u čverćfinał. Zacharaŭ pierakanany, što ŭ hetym vypadku maŭčać było nielha. «Zaŭsiody treba zastupacca za chakieistaŭ i radzimu», — skazaŭ trenier.

Na heta Barodzič adkazaŭ, što «jość ahulnapryniataja forma pryniasieńnia pratestu». «Pa sutnaści było pravilna, ale pa formie niapravilna», — reziumavaŭ jon.

Padčas Alimpijady ŭ intervju «Sovietskomu sportu» Zacharaŭ, u pryvatnaści, zajaviŭ: «Treba pakazać hetym pieščanym zamorcam, što rasijski chakiej — lepšy ŭ śviecie. A to ŭ nas lubiać kanadski styl pryščeplivać… U kanadcaŭ naohuł hałava nie pracuje. Jany nie ciamiać na lodzie. Dahulalisia da ručki. Zrabili pad siabie kłasny raskład.

Dumali, u čaćviorku macniejšych biez prablem projduć, siabrovak u viosku pryvieźli…

Ja stanu samym ščaślivym čałaviekam na płaniecie, jak tolki jany zakončać z Alimpijadaj» [Chakieisty Kanady ŭrešcie pieramahli ŭ alimpijskim turniry, a ŭ 1/4 finału vynieśli Rasiju 7:3 - NN].

Paśla viartańnia ŭ Minsk Zacharaŭ patłumačyŭ žurnalistam, što jaho vykazvańni vyklikanyja niezdavalniajučymi ŭmovami padrychtoŭki da matču sa Šviejcaryjaj:

«Jany namudryli da takoj stupieni, što my ŭ takija ŭmovy trapili, što jany ni pra kaho nie padumali. Jany dumali, što buduć kanadcy nie ŭdzielničać u hetaj situacyi [stykavym matčy]. Tam usie raździavalni byli zaniatyja. My pierachodzili, raździavalniaŭ nie było. Jak my pieraapranalisia ŭ apošnich matčach, kaniešnie, tak nielha było stavicca. Tam usie łajalisia».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?