«Vybaraŭ u Respublicy Biełaruś pa‑raniejšamu niama. I, značyć, niama padstaŭ dla pryznańnia ciapierašniaj vybarčaj kampanii adpaviednaj standartam svabodnych i spraviadlivych vybaraŭ» — z takoj zajavaj vystupili lidery demakratyčnych partyj i ruchaŭ Biełarusi.

«Vyniki, jakija ŭłada abjavić paśla dnia vybaraŭ 25 krasavika 2010 hoda, nie mohuć ličycca adlustravańniem voli biełaruskich vybarščykaŭ», — havorycca ŭ sumiesnaj zajavie.

Jaje aŭtary zaznačajuć, što demakratyčnyja partyi i hramadskija arhanizacyi z samaha pačatku aktyŭna ŭklučylisia ŭ vybarčy praces, vyłučyŭšy bolš jak tysiaču pradstaŭnikoŭ u vybarčyja kamisii. Adnak u ich skład uvajšli nie bolš za 200 pradstaŭnikoŭ apazicyi, što składaje 0,3% ad ahulnaj kolkaści členaŭ vybarčych kamisij.

Aprača taho, na etapie padrychtoŭki da vyłučeńnia kandydataŭ u deputaty apazicyjnymi strukturami byli składzieny śpisy z 2,5 tysiačy patencyjalnych pretendentaŭ.

«Adnak zamiest abiacanaj libieralizacyi ŭłady praciahvali vykarystoŭvać taktyku zapałochvańnia demakratyčnych aktyvistaŭ, členaŭ ich kamand, a taksama hramadzian, jakija pastavili podpisy za vyłučeńnie apazicyjnych kandydataŭ,

— havorycca ŭ dakumiencie. — U vyniku biesprecedentnaha nacisku, jaki ažyćciaŭlali kiraŭniki pradpryjemstvaŭ, arhanizacyj, navučalnych ustanoŭ, supracoŭniki miascovych vykanaŭčych kamitetaŭ, pravaachoŭnych orhanaŭ, padatkovych, finansavych i kantrolnych słužbaŭ, tolki 700 aktyvistaŭ znajšli ŭ sabie mužnaść praciahnuć udzieł u vybarčaj kampanii».

Padčas rehistracyi była adsiejana jašče tracina aktyvistaŭ. U vyniku ŭdzieł u vybarach praciahvajuć mienš jak 500 čałaviek, abo pryblizna 2% ad ahulnaj kolkaści zarehistravanych kandydataŭ, zaznačajecca ŭ zajavie.

Takim čynam, robiać vysnovu pradstaŭniki apazicyi, «ciapierašniaja vybarčaja kampanija, pa sutnaści, ničym pryncypova nie adroźnivajecca ad papiarednich, jakija mižnarodnaja supolnaść nie pryznała svabodnymi i spraviadlivymi». «Instytut vybaraŭ u Biełarusi znachodzicca ŭ tatalnym kryzisie. Vynikam poŭnaj dehradacyi vybarčaj sistemy stała faktyčnaje pryznačeńnie deputataŭ», — havorycca ŭ zajavie.

U metach vychadu z takoj situacyi pradstaŭniki apazicyi čarhovym razam prapanoŭvajuć uładzie pačać abmierkavańnie prapanoŭ ab źmienie vybarčaha zakanadaŭstva i pravaprymianialnaj praktyki.

Zajavu padpisali lidery 13 partyj i hramadskich abjadnańniaŭ, u tym liku Biełaruskaj partyi «Zialonyja», Biełaruskaj partyi žančyn «Nadzieja», Biełaruskaj partyi levych «Spraviadlivy śviet», Biełaruskaj sacyjał‑demakratyčnaj Hramady, Biełaruskaj sacyjał‑demakratyčnaj partyi (Hramada), Partyi BNF, Abjadnanaj hramadzianskaj partyi, ruchu «Za Svabodu», a taksama arhkamitetaŭ pa stvareńni Biełaruskaj sacyjał‑demakratyčnaj partyi (Narodnaja Hramada), Ruchu za svabodnaje raźvićcio pradprymalnictva, partyi «Biełaruskaja chryścijanskaja demakratyja», Partyi svabody i prahresu, Partyi pracoŭnych.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?