Vajennasłužačyja Pavietrana‑desantnych vojskaŭ Rasii voźmuć udzieł va ŭračystaściach, jakija projduć u Breście 9 maja ŭ aznamienavańnie 65‑hodździa Pieramohi ŭ Vialikaj Ajčynnaj vajnie.
Jak paviedamiła ŭpraŭleńnie pres‑słužby i infarmacyi Ministerstva abarony RF, rasijskuju armiju na vajennym paradzie na płoščy cyrymanijałaŭ miemaryjalnaha kompleksu «Bresckaj krepaść‑hieroj» i centralnych vulicach Bresta buduć pradstaŭlać 85 vajennasłužačych 104‑ha hvardziejskaha desantna‑šturmavoha Čyrvanaściažnaha pałka 76‑j hvardziejskaj desantna‑šturmavoj Čarnihaŭskaj Čyrvanaściažnaj dyvizii. Hetaje złučeńnie dysłakavana ŭ Pskovie.
Desantniki prybuduć u Brest 8 maja sa svajoj štatnaj strałkovaj zbrojaj. Forma adzieńnia na paradzie budzie palavaja.
Pieravozka asabovaha składu paradnaha raźliku budzie arhanizavanaja čyhunačnym transpartam. Adjezd nazad zapłanavany na 9 maja.
Płanujecca, što biełaruskija vajskoŭcy voźmuć udzieł u paradzie 9 maja na Čyrvonaj płoščy ŭ Maskvie. Adnak, jak paviedamili ŭ pres‑słužbie Ministerstva abarony, zahadu kiraŭnika vajennaha viedamstva, jakim pavinien być vyznačany skład paradnaha raźliku, jašče nie było. Pavodle nieaficyjnaj infarmacyi, u Maskvu adpraviacca kala 70 vajennasłužačych 5‑j bryhady śpiecyjalnaha pryznačeńnia (Marjina Horka, Minskaja vobłaść).
