Za studzień—luty 2010 hoda salda źniešniaha handlu tavarami i pasłuhami pa mietadałohii płaciežnaha bałansu skłałasia admoŭnym u 132,8 młn. dalaraŭ, paviedamlaje Nacyjanalny statystyčny kamitet. Pavodle vynikaŭ studzienia hety pakazčyk byŭ stanoŭčym i składaŭ 123,7 młn. dalaraŭ.
Abjom źniešniaha handlu tavarami i pasłuhami za studzień—luty skłaŭ 8,3 młrd. dalaraŭ, što na 17,4% bolš, čym u studzieni—lutym 2009 hoda, u tym liku ekspart — 4,1 młrd. (na 31,2% bolš), impart — 4,2 młrd. (na 6,6% bolš).
Pavodle mietadałohii handlovaha bałansu, što ŭličvaje źviestki Dziaržaŭnaha mytnaha kamiteta, admoŭnaje salda źniešniaha handlu tavarami
sfarmiravałasia ŭ pamiery 469 młn. dalaraŭ (u studzieni—lutym 2009 hoda — minus 1 młrd. 129 młn.).
Za dva pieršyja miesiacy 2010 hoda ŭ krainu ŭvieziena pramiežkavych tavaraŭ (enierhanośbity, syravina, materyjały i kamplektavalnyja) amal na 3 młrd. dalaraŭ (na 13,1% bolš, čym za studzień—luty 2009 hoda). Ekspart pramiežkavych tavaraŭ skłaŭ 2,3 młrd. dalaraŭ, što na 26,7% bolš za ŭzrovień studzienia—lutaha 2009 hoda.
Prykładna 40% vartasnaha abjomu ekspartu i 53% impartu pramiežkavych tavaraŭ składajuć enierhietyčnyja tavary. Na źniešni rynak ich pastaŭlena na 913,9 młn. dalaraŭ, što na 10,4% mienš, čym u studzieni—lutym 2009 hoda. Impart enierhietyčnych tavaraŭ skłaŭ 1 młrd. 594,6 młn. dalaraŭ, pavialičyŭšysia na 5,3%. Salda źniešniaha handlu enierhanośbitami skłałasia admoŭnaje ŭ abjomie 680,7 młn. dalaraŭ.
Stanoŭčaje salda handlu spažyvieckimi tavarami ŭ studzieni—lutym 2010 hoda dasiahnuła 130,5 młn. dalaraŭ (u studzieni—lutym 2009 hoda — minus 115,4 młn. dalaraŭ).
Źniešni handal charčovymi tavarami ŭ hety pieryjad charaktaryzavaŭsia stanoŭčym značeńniem salda, vieličynia jakoha skłała 223,2 młn. dalaraŭ. U paraŭnańni sa studzieniem—lutym 2009 hoda salda pavialičyłasia na 155,5 młn. dalaraŭ.
Nahadajem, pavodle vynikaŭ 2009 hoda admoŭnaje źniešniehandlovaje salda handlu tavarami i pasłuhami dasiahnuła 5,5 młrd. dalaraŭ, chacia, zhodna z prahnozam, hety pakazčyk nie pavinien byŭ pieravysić 1,5 młrd. dalaraŭ. Pavodle prahnozu na 2010 hod, admoŭnaje salda źniešniaha handlu tavarami i pasłuhami nie pavinna pieravysić 4 młrd. 370 młn. dalaraŭ.
