Advakat Mikałaja Aŭtuchoviča Pavieł Sapiełka nie spadziajecca na toje, što sud vyniesie jaho padabaronnamu spraviadlivy prysud. Pra heta jon zajaviŭ 17 krasavika padčas sudovych sprečak u Viarchoŭnym sudzie Biełarusi.

Jak zajaviŭ Sapiełka, heta stała zrazumieła jamu «ź pieršych dzion pačatku pracesu». «Na žal, sud pryniaŭ estafietu śledstva, i maksimalna abmiežavaŭ bok abarony ŭ pošukach dokazaŭ nievinavataści svaich padabaronnych», — skazaŭ advakat.

«Ja moh by napisać pratesty na dziejańni suda, ale ja nie staŭ hetaha rabić, nie staŭ skardzicca,

tamu što rašeńnie Viarchoŭnaha suda kančatkovaje i abskardžańniu nie padlahaje. Skarha ŭ paradku nahladu zvyčajna zakančvajecca adpiskami», — dadaŭ jon.

***

Nahadajem, Viarchoŭny sud razhladaje kryminalnuju spravu, pa jakoj u jakaści abvinavačvanych prachodziać Aŭtuchovič, Uładzimir Asipienka, Alaksandr Łaryn i Michaił Kazłoŭ. Pieršych troch abvinavačvajuć u padrychtoŭcy terarystyčnaha akta ŭ dačynieńni da namieśnika ministra pa padatkach i zborach Vasila Kamianko i byłoha staršyni Hrodzienskaha abłvykankama Uładzimira Saŭčanki. Aŭtuchoviča i Asipienku taksama abvinavačvajuć u arhanizacyi padpału doma byłoha načalnika Vaŭkavyskaha RAUS Siarhieja Kacuby ŭ 2004 hodzie. Padpałkoŭnik milicyi Kazłoŭ, były kiraŭnik UBAZ pa Hrodzienskaj vobłaści, abvinavačvajecca ŭ tym, što viedaŭ pra płany padrychtoŭki terarystyčnaha akta, ale nie pryniaŭ mier pa jaho praduchileńni.

16 krasavika prakuror Eldar Safaraŭ zapatrabavaŭ pryhavaryć Aŭtuchoviča da 20 hadoŭ kałonii ŭzmocnienaha režymu z kanfiskacyjaj majomaści.

Asipienku i Łaryna prakuror zapatrabavaŭ pryhavaryć da 11 hadoŭ pazbaŭleńnia voli ŭ kałonii ŭzmocnienaha režymu. Dla Michaiła Kazłova jon zapytaŭ try hady kałonii ahulnaha režymu biez prava zajmać kirujučyja pasady.

Advakat Sapiełka taksama zajaviŭ, što pry rasśledavańni spravy Aŭtuchoviča i Asipienki supracoŭniki śledčych orhanaŭ ažyćciavili šerah dziejańniaŭ, jakija nosiać prykmiety złačynstva. Razmova idzie pra fakty psichałahičnaha i maralnaha cisku na śviedak z metaj ahavaryć Aŭtuchoviča, patłumačyŭ Sapiełka. «Hetyja dziejańni nosiać prykmiety składu złačynstva», — zajaviŭ advakat.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?