Tak prakamientavaŭ BiełaPAN pryniatuju napiaredadni rezalucyju pres‑sakratar MZS Biełarusi Andrej Savinych.
«Pieršaje aznajamleńnie z tekstam pakidaje adčuvańnie, što hety dakumient byŭ pryniaty impulsiŭna, pad upłyvam vypadkovych faktaraŭ ci vahańniaŭ palityčnaj kanjunktury. PARIE havoryć ab svajoj prychilnaści da dyjałohu ź Biełaruśsiu i tut ža prymaje rašeńnie prypynić usie kantakty», — zaŭvažyŭ pres‑sakratar.
U hetaj situacyi, padkreśliŭ Savinych, pazicyja biełaruskaha boku vyhladaje bolš paśladoŭnaj:
«My razhladajem dyjałoh jak srodak vyrašeńnia ŭsich isnujučych pytańniaŭ, dasiahnieńnia parazumieńnia i raźličvajem, što našy partniory taksama pryjduć da takoha vyvadu».
Nahadajem, 29 krasavika PARIE pryniała rezalucyju, jakaja praduhledžvaje prypynieńnie kantaktaŭ ź Biełaruśsiu na vysokim uzroŭni. U hałasavańni ŭziali ŭdzieł 67 deputataŭ, 58 ź ich prahałasavali za pryniaccie rezalucyi, šeść — suprać, troje ŭstrymalisia (usiaho ŭ PARIE 318 deputataŭ).
U rezalucyi ŭkazana na «niedastatkovy prahres» Biełarusi ŭ halinie adpaviednaści standartam Rady Jeŭropy. U pryvatnaści, havorycca ŭ dakumiencie, u respublicy «ŭ atmaśfiery sakretnaści» byli pryviedzieny ŭ vykanańnie dva śmiarotnyja pryhavory, kali skarhi asudžanych razhladaŭ Kamitet AAN pa pravach čałavieka. Adznačajucca taksama vypadki parušeńnia ŭ Biełarusi pravoŭ polskaj nacyjanalnaj mienšaści i adsutnaść mižnarodnych naziralnikaŭ na vybarach u miascovyja saviety.
U dakumiencie vykazvajecca škadavańnie ŭ suviazi z «niedastatkovaj palityčnaj volaj biełaruskich uład raździalić kaštoŭnaści Rady Jeŭropy». Pry hetym u rezalucyi ŭtrymlivajecca zaklik pradoŭžyć dyjałoh ź Biełaruśsiu.
Biełaruś — adzinaja kraina ŭ Jeŭropie, u jakoj dahetul prymianiajecca śmiarotnaja kara. U červieni 2009 hoda Parłamienckaja asambleja Rady Jeŭropy pryniała rezalucyju ab viartańni parłamientu Biełarusi statusu śpiecyjalnaha zaprošanaha ŭ asamblei pry ŭmovie ŭviadzieńnia ŭ krainie maratoryja na śmiarotnuju karu. Da ŭviadzieńnia maratoryja taksama zaklikaje Jeŭrasajuz. Heta — adna z umoŭ admieny vizavych sankcyj u dačynieńni da biełaruskich čynoŭnikaŭ, jakija ES pradoŭžyŭ da kastryčnika 2010 hoda.
