Pra heta zajaviŭ 30 krasavika žurnalistam premjer‑ministr Litvy Andrus Kubilus paśla sustrečy ŭ Vilniusie z kiraŭnikom biełaruskaha ŭrada Siarhiejem Sidorskim.
Pavodle jaho słoŭ, Litva hatova padzialicca technałahičnymi napracoŭkami pa imparcie nafty marskim šlacham.
Kubilus paviedamiŭ, što padčas sustrečy ź Sidorskim jany «šmat razmaŭlali pra supracoŭnictva ŭ halinie transpartavańnia nafty i sumiesnych stratehičnych prajektaŭ». «My viedajem pra płany biełarusaŭ pa imparcie nafty ź Vieniesueły.
My majem technałohii i miarkujem, što Litva tut moža prapanavać vielmi efiektyŭnyja mahčymaści», — zaznačyŭ Kubilus.
Sidorski, jaki napiaredadni naviedaŭ Kłajpiedski port, nie vykazaŭ vialikaha entuzijazmu z hetaj nahody. «Pahladzim prapanovy, jakija ŭžo siońnia majem z paŭnočnych, paŭdniovych i zachodnich kirunkaŭ pa pastaŭcy takoj nafty na našy pierapracoŭčyja zavody», — skazaŭ jon.
Biełaruski premjer źviarnuŭ uvahu, što port u Kłajpiedzie pracuje tolki na vychad, a nie na ŭvachod naftavych praduktaŭ. Tym časam terminał u Butynhie, jaki moža prymać naftu, pavodle jaho słoŭ, na hety momant zahružany.
«Najbližejšym časam my ŭzvažym usie kamiercyjnyja «za» i «suprać», — skazaŭ Sidorski, pachvaliŭšysia, što Biełaruś aktyŭna zajmajecca naftavymi raspracoŭkami jak u Iranie, tak i ŭ Vieniesuele.
«My zdabyvajem tam svaju naftu i budziem jaje pastaŭlać na pierapracoŭku ŭ Biełaruś», — zaznačyŭ jon.
Pry hetym kiraŭnik biełaruskaha ŭrada nie skazaŭ, kali płanujecca pastaŭka druhoj partyi vieniesuelskaj nafty, bo «heta ž nie hulni, a surjozny biźnies».
«Pierapracujem pieršuju partyju nafty, pahladzim usiu łahistyku, abiarem šlach i budziem prymać nastupny tankier», — skazaŭ Sidorski na raźvitańnie.
Abodva premjery padkreślili, što Biełaruś i Litva paśladoŭna naroščvajuć supracoŭnictva ŭ łahistycy, meblevaj pramysłovaści, transparcie, enierhietycy, i vykazali žadańnie, «kab čynoŭniki nie pieraškadžali biźniesu damaŭlacca».
