Dzień Jeŭropy 9 maja ŭ Biełarusi adśviatkujuć kinafiestyvalem i fotavystavaj, paviedamlaje pres‑słužba pasolstva Vialikabrytanii, jakaja pradstaŭlaje Ispaniju, što staršynstvuje ŭ Jeŭrasajuzie.
Z 10 maja pa 4 červienia da ŭvahi hledačoŭ buduć prapanavanyja 17 filmaŭ z 16 krain: Biełarusi, Bałharyi, Vialikabrytanii, Vienhryi, Hiermanii, Danii, Italii, Irłandyi, Łatvii, Litvy, Polščy, Finlandyi, Francyi, Čechii, Šviecyi i Estonii.
Pakazy projduć u kinateatrach Minska, Mahilova i Babrujska. U stalicy ŭsie stužki možna budzie ŭbačyć biaspłatna.
Fiestyval adkryjecca 10 maja pakazam u minskim kinateatry «Pieramoha» biełaruskaj stužki «Raka žyćcia».
Prahrama ŭklučaje filmy samych roznych žanraŭ — ad kazak da histaryčnych dram. Finansavaja padtrymka fiestyvalu akazana pradstaŭnictvam Jeŭrasajuza ŭ Minsku i 15 pasolstvami krain ES. Mierapryjemstva pravodzicca pry padtrymcy Ministerstva kultury Biełarusi.
Adnačasova z kinafiestyvalem projdzie fotavystava «Jeŭropa našymi vačyma». Bolš za 170 biełaruskich fatohrafaŭ pradstavili na konkurs kala paŭtary tysiačy fatahrafij, zroblenych u roznych jeŭrapiejskich krainach. Lepšyja pracy buduć pakazanyja ŭ halerei kinateatra «Pieramoha».
Hledačy zmohuć addać svaje hałasy za pracy, jakija najbolš spadabalisia. Pieramožca, jaki atrymaŭ najbolšuju kolkaść hałasoŭ, budzie ŭznaharodžany padčas cyrymonii zakryćcia fiestyvalu 17 maja.
Pieršy fiestyval u honar Dnia Jeŭropy prajšoŭ u Biełarusi ŭ 2005 hodzie.
U krainach ES Dzień Jeŭropy adznačajuć taksama jak Dzień Rabiera Šumana ŭ honar histaryčnaj dekłaracyi, aŭtaram jakoj byŭ hety francuzski dziaržaŭny dziejač.
