Lider Ruchu «Za Svabodu» Alaksandr Milinkievič staŭ piatym apazicyjnym palitykam, jaki abviaściŭ ab svaim udziele ŭ prezidenckich vybarach. Jakija mocnyja i słabyja baki hetych kandydataŭ? «NN» praciahvaje cykł «5+5‑»
1. Dośvied
+ Milinkievič moža stać pieršym apazicyjnym palitykam, jaki budzie ŭdzielničać u dvuch vybarach zapar. Jon nie złamaŭsia paśla kampanii 2006 hoda, zastaŭsia ŭ palitycy. Heta vyhodna adroźnivaje jaho ad Domaša i Hančaryka. Kali ŭdasca dobra ŭsio praanalizavać, to sioletniuju kampaniju Milinkievič užo budzie rabić z ulikam pamyłak i chibaŭ minułaj. Aproč vybarčaha dośviedu, Milinkievič maje i dośvied kiraŭnika. U svoj čas jon źjaŭlaŭsia namieśnikam staršyni Hrodzienskaha harvykankama. Praŭda, užo doŭhi čas jon źjaŭlajecca aficyjna biespracoŭnym.
— Dośvied parazy. Možna doŭha havaryć, što vybary byli sfalšavanymi, što heta ŭvohule nie byli vybary, ale za Milinkievičam ciahniecca šlejf parazy ź minułaj kampanii. A kali ŭzhadać, to i z domašaŭskaj taksama, kali Milinkievič byŭ kiraŭnikom štaba kandadyta. Pry hetym, za jahonaj śpinaj staić moładź, jakaja takoha sumnaha dośviedu jašče nie mieła. Zrešty, u sporcie časta tak zdarajecca, što parazy spara¬džajuć zdarovuju złość i prahu revanšu. U svoj čas Milinkievič byŭ čempijonam BSSR pa baskietbole.
2. Viadomaść
+ Milinkievič zastajecca samym viadomym apazicyjnym palitykam z najvyšejšym rejtynham. Heta zasłuha tych vybaraŭ. Važnym było tuju viadomaść i paznavalnaść nie razhubić. Z hetaj metaj palityk praciahvaje jeździć pa krainie, sustrakacca ź ludźmi. Milinkievič uvieś hety pamižvybarny čas zastavaŭsia adzinym palitykam, što rehularna jeździŭ u rehijony.
— Uzrost. Milinkievič užo try hady jak piensijanier. Asabliva minusam heta vyhladaje, kali ŭličyć, što kankurenty pa apazicyjnym łahiery maładziejšyja na dziesiać, a to i na 25 hadoŭ. Adamkusa ŭ Litvie abrali kali jamu było ŭžo bolš za 70 hadoŭ, ale ŭ nas nie Litva ź jaje demakratyčnymi pracedurami. Zdaroŭje ŭ lidera Ruchu «Za Svabodu» taksama ŭžo nie jak u maładości. Letaś palityk pieranios apieracyju, a potym cełaje leta byŭ vymušany prachodzić reabilitacyju ŭ rodnych Bierštach.
3. Intelihient
+ U adroźnieńnie ad mnohich inšych apazicyjanieraŭ, Milinkievič maje vyrazny archietyp, heta vobraz «kandydata‑intelihienta». Jon nibyta ŭvasablaje saboj jeŭrapiejski vybar biełarusaŭ. Zaŭsiody elehantny, prystojny, vytrymany. Hetym Milinkievič pryvablivaje mnohich vybarcaŭ. Časta havorycca, što, kab pieramahčy Łukašenku, patrebnaja absalutna procilehłaja spakojnaja siła. I Milinkievič najlepš padychodzić pad hetyja krytery.
— Nierašučaść. Ad savieckaha intelihienta ŭ Milinkieviča zastałasia nierašučaść. Jon doŭha abdumvaje svaje rašeńni, jany jamu dajucca ciažka. Pryniać spantannaje jarkaje rašeńnie — heta nie pra Milinkieviča. U ekstremalnych situacyjach palityk časta hublajecca i nie viedaje, jaki varyjant raźvićcia padziej bu¬dzie pravilnym. Razam z tym, palityk umieje trymać udar, što ŭžo nieadnarazova dakazvaŭ.
4. Prahrama
+ Jašče za dzieviać miesiacaŭ da vybaraŭ Milinkievič prezientavaŭ tezisy svajoj pieradvybarčaj kampanii. Mienavita ź joj palityk budzie hrukacca da sercaŭ vybarcaŭ. Ničoha asabliva novaha ŭ joj niama, ale chto skazaŭ, što musić być? Pieradvybarčyja prahramy padobnyja va ŭsim śviecie. Milinkievič užo viedaje, z čym jon pojdzie na vybary, inšyja — jašče nie.
— Adsutnaść charyzmy. U apazicyjnych aktyvistaŭ narastaje rasčaravańnie praz šmathadovaje biezvynikovaje zmahańnie z dyktaturaj. I kab pieramahčy hetuju paniavierku, jany chacieli b pabačyć mocnaha lidera, jaki daść nadzieju na pieramohu. Patrebien drajv, u Milinkieviča jaho niama. Rytoryka amal nie źmianiłasia z času minułaj kampanii. Padčas jahonaha vystupu na prezientacyi ciahnuła na son, a na pytańni jon pačynaŭ adkazvać tak zdaloku i abciakalna, što niekatoryja paśpiavali zabycca, pra što pytalisia.
5. Padtrymka
+ Z usich apazicyjanieraŭ Milinkievič maje najbolšaje pryznańnie za miežami Biełarusi. Za apošnija piać hadoŭ jon zastavaŭsia tvaram biełaruskaj apazicyi na Zachadzie. Pravodziŭ dziasiatki sustreč ź jeŭrapiejskimi kiraŭnikami, parłamientarami, maralnymi aŭtarytetami.
— Adsutnaść kansalidacyi ŭ apazicyi. Pa ŭsim vyhladaje, što apazicyjnyja siły pojduć na vybary šmatlikimi kałonami (Milinkievič, Michalevič, Rymašeŭski, Sańnikaŭ, Niaklajeŭ…). Aktyvisty ŭ takoj situacyi nie viedajuć, na kaho buduć pracavać. Kamanda Michaleviča budzie zdolnaja pieraciahnuć častku staroj hvardyi Milinkieviča. Niaklajeŭ masava pierabraŭ da siabie rehijanalny aktyŭ. Samym ža kryŭdnym budzie, kali nivodzin z hetych kandydataŭ tak i nie zmoža sabrać 100 tysiač podpisaŭ.
