Arhanizacyja Dahavora ab kalektyŭnaj biaśpiecy (ADKB) zaklikaje ŭsie krainy, jakija vałodajuć jadziernaj zbrojaj, dałučycca da namahańniaŭ Rasii i ZŠA i bolš aktyŭna rabić svoj uniosak u razzbrajenčy praces. Pra heta havorycca ŭ sumiesnaj zajavie dziaržaŭ — členaŭ ADKB pa vynikach niefarmalnaha samita, jaki prajšoŭ 8 maja ŭ padmaskoŭnaj rezidencyi «Horki».
Udzielniki samita vitali padpisańnie dahavora pamiž RF i ZŠA ab mierach pa dalejšym skaračeńni i abmiežavańni stratehičnych nastupalnych uzbrajeńniaŭ i adznačyli pryncypovaje značeńnie zamacavańnia ŭ dakumiencie ŭzajemasuviazi pamiž stratehičnymi nastupalnymi i stratehičnymi abarončymi ŭzbrajeńniami.
«Dziaržavy — členy ADKB razhladajuć hetaje pahadnieńnie jak važny elemient architektury mižnarodnaj biaśpieki, jaki adlustroŭvaje istotny ŭniosak Rasii i ZŠA ŭ spravu jadziernaha razzbrajeńnia i nieraspaŭsiudžvańnia», — havorycca ŭ zajavie.
U dakumiencie zaznačajecca, što novy dahavor zamianiaje adno sa značnych u historyi pahadnieńniaŭ u śfiery razzbrajeńnia — dahavor pamiž SSSR i ZŠA ab skaračeńni i abmiežavańni stratehičnych nastupalnych uzbrajeńniaŭ ad 1991 hoda (DSNV).
Lidery krain ADKB adznačyli, što razam z RF i ZŠA ŭdzielnikami DSNV źjaŭlalisia Biełaruś, Kazachstan i Ukraina.
«Histaryčnaja rola zhadanaha dahavora była b niapoŭnaj biez značnych namahańniaŭ pa jaho realizacyi, pryniatych hetymi dziaržavami», — zaznačajecca ŭ dakumiencie.
U zajavie havorycca, što dobraachvotnaja admova Biełarusi, Kazachstana i Ukrainy ad jadziernaj zbroi i dałučeńni da Dahavora ab nieraspaŭsiudžańni jadziernaj zbroi ŭ jakaści dziaržaŭ, jakija nie vałodajuć jadziernaj zbrojaj, dabratvorna adbilisia na stratehičnaj stabilnaści ŭ cełym.
U dakumiencie padkreślivajecca važnaść paćviardžeńnia RF i ZŠA harantyj biaśpieki Biełarusi, Kazachstanu i Ukrainie.
