Da abmiežavalnych mier Jeŭrasajuza ŭ dačynieńni da biełaruskich čynoŭnikaŭ dałučylisia vosiem trecich krain, paviedamlaje 11 maja pres‑słužba Rady ES.
Jeŭrasajuz pryvitaŭ hetaje rašeńnie Ałbanii, Bośnii i Hiercahaviny, Isłandyi, Lichtenštejna, Makiedonii, Narviehii, Charvatyi i Čarnahoryi.
Hetyja krainy dałučylisia da rašeńnia Rady ES ad 15 śniežnia 2009 hoda, kali ŭ chodzie techničnaj pracedury da 31 kastryčnika 2010 hoda była pradoŭžana zabarona na ŭjezd u krainy ES 41 biełaruskamu čynoŭniku.
Da hetaj ža daty było pradoŭžana prypynieńnie sankcyj u dačynieńni da ŭsich, akramia piaci, pradstaŭnikoŭ aficyjnaha Minska. Paśla zakančeńnia hetaha pieryjadu pytańnie ab sankcyjach budzie razhledžana z ulikam situacyi ŭ Biełarusi.
Jak paviedamlałasia, śpis nieŭjaznych byŭ adkryty ŭ 2004 hodzie, tudy trapili čatyry padazronyja ŭ dačynieńni da palityčnych źniknieńniaŭ u 1999—2000 hadach — eks‑ministr unutranych spraŭ Uładzimir Navumaŭ, były dziaržsakratar Rady biaśpieki Viktar Šejman, były kiraŭnik MUS Juryj Sivakoŭ i były kamandzir bryhady śpiecyjalnaha pryznačeńnia ŭnutranych vojskaŭ MUS Dźmitryj Paŭličenka.
Paśla parłamienckich vybaraŭ u śniežni 2004 hoda śpis byŭ pašyrany za košt kiraŭnika Centrvybarkama Lidzii Jarmošynaj, a taksama Juryja Padabieda, jaki tady ŭznačalvaŭ połk milicyi śpiecyjalnaha pryznačeńnia.
U krasaviku 2006 hoda śpis byŭ pašyrany da 37 čałaviek, adkaznych, na dumku ES, za parušeńnie pravoŭ čałavieka padčas prezidenckaj kampanii. U jaho byli ŭklučany prezident Alaksandr Łukašenka, na toj momant kiraŭnik prezidenckaj administracyi Hienadź Niavyhłas, jaho namieśniki Natalla Piatkievič i Anatol Rubinaŭ, ministr adukacyi Alaksandr Radźkoŭ, eks‑ministr infarmacyi Uładzimir Rusakievič, ministr justycyi Viktar Hałavanaŭ, staršynia Biełteleradyjokampanii Alaksandr Zimoŭski, były staršynia Pałaty pradstaŭnikoŭ Uładzimir Kanaploŭ, člen cavieta respubliki Mikałaj Čarhiniec.
U kastryčniku 2006 hoda śpis pavialičyŭsia da 41 čałavieka: nieŭjaznymi stali sudździa suda Maskoŭskaha rajona Minska Alaksiej Rybakoŭ i dziaržabvinavaŭca Siarhiej Bortnik — za pryhavor eks‑kandydatu ŭ prezidenty Alaksandru Kazulinu, a taksama sudździa suda Centralnaha rajona Minska Leanid Jasinovič i dziaržabvinavaŭca Andrej Mihun — za pryhavor aktyvistam niezarehistravanaj arhanizacyi «Partniorstva».
U kastryčniku 2008 hoda ES vyrašyŭ časova prypynić sankcyi ŭ dačynieńni da 36 čynoŭnikaŭ.
U śpisie nieŭjaznych zastalisia Jarmošyna, Navumaŭ, Šejman, Sivakoŭ i Paŭličenka.
