Novyja ŭłady Kyrhyzstana buduć nastojvać na ekstradycyi źvierhnutaha prezidenta Kurmanbieka Bakijeva ź Biełarusi. Pra heta zajaviła 11 maja kiraŭnik časovaha ŭrada Roza Atunbajeva.
«Siońnia kiraŭnik Biełarusi Alaksandr Łukašenka ŭziaŭ pad svaju apieku Kurmanbieka Bakijeva. Chaču skazać, što padobnyja dziejańni ŭskładniajuć palityčnuju situacyju ŭ samoj Biełarusi, dzie zaraz aktyŭna pračynajecca apazicyja. Jana žorstka vystupaje suprać palityki Łukašenki. Ja dumaju, što jon sam vinavaty ŭ najaŭnaj situacyi», — cytuje Atunbajevu kirhizskaje infarmahienctva 24.kg.
Atunbajeva padkreśliła, što Bakijeŭ pavinien adkazać za svaje dziejańni pierad narodam Kyrhyzstana. «Nas abvinavačvajuć, što my vypuścili jaho z krainy, ale my pajšli na heta, kab nie dapuścić destabilizacyi situacyi ŭ krainie», — skazała kiraŭnik časovaha ŭrada.
Jak paviedamiŭ žurnalistam na minułym tydni vice‑premjer časovaha ŭrada Azimbiek Nazaraŭ,
6 maja Hienieralnuju prakuratura Kyrhyzstana nakiravała ŭ Hienieralnuju prakuraturu Biełarusi zapyt ab ekstradycyi Kurmanbieka Bakijeva.
4 maja Alaksandr Łukašenka zrabiŭ zajavu, što nie źbirajecca vydavać Bakijeva novym uładam Kyrhyzstana. «Da mianie nichto aficyjna nie źviartaŭsia, — skazaŭ jon. — Ale adrazu chaču aficyjna zajavić: hetyja zvaroty buduć marnyja i źnievažalnyja dla časovaha ŭrada. Prezident Kyrhyzstana znachodzicca pad abaronaj biełaruskaj dziaržavy i prezidenta. Nie treba hetak zvanamu časovamu ŭradu źviartacca z patrabavańniem vydać Bakijeva. Kamu vydać? Ci zachaču ja jašče mieć znosiny z tymi, chto siońnia va ŭładzie ŭ Kirhizii».
