11 maja ŭ Minsku adbyłosia štokvartalnaje pasiadžeńnie dyrektaroŭ dyjacezijalnych «Karytas». Stvareńnie adździaleńniaŭ parafijalnych «Karytas» i stratehičnaje płanavańnie dziejnaści dabračynnaha fondu stali klučavymi temami sustrečy.
Pa słovach ks. Viktara Hajdukieviča SDB, dyrektara «Nacyjanalnaha Karytas» u Biełarusi, parafijalnyja adździaleńni dabračynnaha fondu ŭ našaj krainie — «źjava novaja, ale nadzvyčaj aktualnaja i nieabchodnaja». «Vielmi važna akazvać dapamohu apieratyŭna i metanakiravana. Mienavita parafijalnyja adździaleńni «Karytas«, jakija majuć na ŭvazie supracoŭnictva vałancioraŭ z našaj arhanizacyjaj, mohuć stać punktami ažyćciaŭleńnia kankretnaj dapamohi patrabujučym. Pry hetym treba padkreślić, što naš fond akazvaje nie tolki materyjalnuju dapamohu, ale taksama duchoŭnuju, psichałahičnuju. Kožnaja situacyja patrabuje ŭvažlivaha razhladu i adpaviednaha padychodu. Takim čynam, najaŭnaść fondu pry parafii, jaki, moža, na pačatkovym etapie budzie ŭjaŭlać saboj infarmacyjny punkt, kudy možna źviartacca pa dapamohu, paspryjaje aktyvizacyi mabilnaj dapamohi i kankretnaj pracy ź ludźmi», — padkreśliŭ ks. Viktar Hajdukievič.
Adździaleńni «Karytas» užo stvorany pry niekatorych parafijach Hrodzienskaj dyjacezii. Pra ich dziejnaść painfarmavaŭ prysutnych na pasiadžeńni ks. Vital Dabrałovič, dyrektar relihijnaj misii «Karytas» Hrodzienskaj dyjacezii.
U budučym, jak paviedamiŭ ks. Hajdukievič, płanujecca pa ŭsioj krainie stvaryć sietku parafijalnych adździaleńniaŭ fondu na dekanalnym uzroŭni, dziejnaść jakich buduć kaardynavać dyjacezijalnyja «Karytas».
Druhim pytańniem, pastaŭlenym na paradak dnia, stała stratehičnaje płanavańnie dziejnaści «Karytas» u budučyni. «Tut važna zrazumieć, dzie my znachodzimsia, što majem, čaho chočam dasiahnuć i jakija ŭ nas pierśpiektyvy dla hetaha, — adznačyŭ ks. Hajdukievič. — Na maju dumku, tolki pastaviŭšy pierad saboj kankretnyja mety, možna metanakiravana imknucca da ich realizacyi. Pry hetym važna surjozna padyści da vyznačeńnia terminu dasiahnieńnia kankretnaj mety. Nieakreślenaść u časie addalaje vyrašeńnie luboha pytańnia».
Stratehičnamu płanavańniu budzie pryśviečana kanfierencyja «Karytas Biełarusi — pohlad u budučyniu», jakaja adbudziecca ŭ Minsku 7—11 červienia hh. Adkaznyja za manitorynh pracesu — ks. Alfons Frydrych SDB i Štefan Es ź Miunchiena.
