Supracoŭniki padraździaleńniaŭ pa narkakantroli i supraćdziejańni handlu ludźmi HUUS Minharvykankama i Centralnaha RUUS kanfiskavali 14 maja na rynku «Ždanovičy» bujnuju partyju videadyskaŭ parnahrafičnaha źmiestu.

Jak paviedamili ŭ HUUS, u pole zroku supracoŭnikaŭ milicyi handlovaja kropka pa prodažy DVD trapiła dva tydni tamu: pastupiła infarmacyja, što tut možna nabyć parnahrafičnaje videa praktyčna na luby hust. Padčas praviadzieńnia pravieračnych mierapryjemstvaŭ źviestki paćvierdzilisia. Vyśvietliłasia, što 24‑hadovy pradaviec sapraŭdy moža prapanavać dastatkova abjomnuju filmateku achvotnym. Pastaŭlaje ž siudy parnahrafičnyja filmy haspadar punkta — 22‑hadovy minčanin. Pryčym u milicyjanieraŭ jość padstavy mierkavać, što pradprymalny małady čałaviek nie tolki realizuje parnahrafiju praz svoj handlovy abjekt, ale i zabiaśpiečvaje filmami dla darosłych kaleh pa biźniesie.

Padčas zatrymańnia pradaŭca i haspadara handlovaha punkta pad pryłaŭkam była znojdziena asobnaja skrynia z 19 videadyskami z parnahrafijaj. U aŭtamašynie haspadara apieratyŭniki znajšli bolš jak 200 dyskaŭ, a ŭ kijosku, jaki vykarystoŭvaŭsia jak skład, — jašče kala 800.

Usiaho kanfiskavana 1.067 dyskaŭ.

Padčas vobysku pa miescy žycharstva haspadara handlovaha punkta ŭ kvatery doma №13 pa vulicy Rusijanava była znojdziena kampjuternaja technika, na jakoj, jak miarkujuć milicyjaniery, i razmnažałasia parnahrafičnaja pradukcyja. Aprača niepasredna kampjutera ź vialikaj kalekcyjaj parnafilmaŭ, u maładoha čałavieka kanfiskavany prynter, na jakim razdrukoŭvalisia malaŭničyja vokładki, śpiecyjalnaje abstalavańnie dla abrezki ŭkładyšaŭ, partyja čystych dyskaŭ.

U dačynieńni da zatrymanych śledčym adździełam papiaredniaha rasśledavańnia Centralnaha RUUS raspačata sprava na padstavie č. 2 art. 343 Kryminalnaha kodeksa (raspaŭsiudžvańnie parnahrafičnych materyjałaŭ).

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?