Usie hrošy, jakija Biełaruś atrymała ad MVF, zastajucca ŭ Nacyjanalnym banku ŭ reziervie krainy. Pra heta zajaviŭ Alaksandr Łukašenka padčas sustrečy sa studentami i vykładčykami VNU ŭ Mahilovie 27 maja.

«My ž ich nie prajeli. My nie skarystali ich dla vypłaty zarpłat i navat dla rostu vytvorčaści», — cytuje Łukašenku pres‑słužba prezidenta.

Łukašenka zaznačyŭ, što apošnim časam «źjaviłasia šmat śpiekulacyj» vakoł źniešnich zapazyčańniaŭ biełaruskaj dziaržavy. Uładu abvinavačvajuć u tym, što jana viešaje jarmo na šyju budučych pakaleńniaŭ. «Cytujuć maje krytyčnyja vykazvańni dziesiacihadovaj daŭniny adnosna kredytu MVF. Choć siońnia my ŭziali jaho kredyty i kažam dziakuj za toje, što fond padtrymaŭ nas u ciažkuju chvilinu. Što ž adbyłosia? Kali my nie mieli racyi — tady abo zaraz?… Nasamreč nijakaj supiarečnaści tut niama», — skazaŭ prezident.

Jon patłumačyŭ, što dziesiać hadoŭ tamu rekamiendacyi MVF «byli źviazanyja z tym, kab my chutčej raspradali ŭsiu dziaržaŭnuju ŭłasnaść, — heta ž supierlibieralnaja arhanizacyja, jakaja kantralujecca ZŠA».

«Tady nam padkidvali tuju ideałohiju, ad jakoj my adyšli, — skazaŭ Łukašenka. — Ale hetym razam jany pryjšli da nas i, pierš čym vydzielić nam kredyty, detalova vyvučyli ŭsiu krainu i ŭbačyli, što zaraz jany majuć spravu z zusim inšaj dziaržavaj. I jany ŭžo nam nieprymalnyja patrabavańni nie pradjaŭlali».

Prezident vykazaŭ udziačnaść MVF za dapamohu, akazanuju Biełarusi padčas suśvietnaha finansava‑ekanamičnaha kryzisu, i zaznačyŭ toj fakt, što hetaja dapamoha była pradastaŭlena na bolš prymalnych umovach, čym dapamoha z boku najbližejšaha sajuźnika — Rasii.

«Voś my zaŭvažyli, što ŭ hetyja paŭhoda my prytarmazili z rostam zarpłaty, stypiendyj i h.d.», — skazaŭ Łukašenka i patłumačyŭ, što heta było vynikam damoŭlenaści z MVF. «I niadaŭna ja, prymajučy premjer‑ministra z dakładam, nahadaŭ,

što ŭ nas zastałosia zusim mała času, kab padyści da siaredniaj zarpłaty ŭ 500 dalaraŭ pa krainie. My kroŭ z nosa pavinny vykanać hetaje naša abaviazacielstva pierad narodam da kanca 2010 hoda i zrabić spravazdaču pierad Usiebiełaruskim narodnym schodam — kryzisy tut pad uvahu nie biarucca»,

— skazaŭ kiraŭnik dziaržavy. «Ale heta ŭžo budzie za miežami našych damoŭlenaściej z MVF, jakija my dakładna vykonvali», — dadaŭ jon.

«I pradstaŭniki MVF pryjechali da nas znoŭ i kažuć: davajcie vieści dalej pieramovy, my hatovyja vas kredytavać,

bo vy akazalisia samaj prystojnaj dziaržavaj — vy vykanali ŭsio, što abiacali. Ale my kažam: kali vy pradjavicie nam tyja ž umovy, što minułym razam, my nie zmožam ich vykanać.

Bo dla mianie jak prezidenta samaje hałoŭnaje — heta narod i jaho dabrabyt. Jany i heta razumiejuć. I siońnia my ź imi viadziom dyjałoh, viadziom pieramovy. I ja ŭpeŭnieny, što damovimsia ab vielmi vyhadnych umovach», — zajaviŭ prezident.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?