27 maja ŭ Minsk prybyŭ staršynia Papskaj rady pastyrstva rabotnikaŭ śfiery achovy zdaroŭja arcybiskup Zyhmund Zimoŭski.
U aeraporcie vatykanskaha ijerarcha sustreli Apostalski nuncyj u Biełarusi arcybiskup Marcin Vidavič, biskup Viciebski Uładzisłaŭ Blin, dapamožny biskup Minska‑Mahiloŭskaj archidyjacezii Antoni Dziamjanka, Apostalski Vizitarar dla hreka‑katolikaŭ Biełarusi Archimandryt Siarhiej Hajek, sakratar Apostalskaha nuncyja ks. Kryśpin Dubiel.
Hałoŭnaja meta vizitu arcybiskupa Zimoŭskaha ŭ Biełaruś — udzieł u IV Mižnarodnaj miedycynskaj kanfierencyi «Prablemy lekarskaj etyki ŭ sučasnym śviecie», jakaja adbudziecca 29 maja ŭ Viciebsku. Na kanfierencyi, što pravodzicca Viciebskaj dyjacezijaj sumiesna ź Viciebskim dziaržaŭnym miedycynskim univiersitetam, staršynia vatykanskaha viedamstva vystupić z dakładam na temu «Kaštoŭnaść čałaviečaha žyćcia ŭ śviatle navučańnia Kaścioła».
U miežach vizitu ŭ Biełaruś arcybiskup Zimoŭski naviedaje niekatoryja parafii ŭ Viciebsku, a ŭ niadzielu, 30 maja, uznačalić celebracyju śviatoj Imšy ŭ kaściole Najśviaciejšaj Trojcy ŭ Hłybokim.
Zavieršycca vizit staršyni Papskaj rady ŭ Biełaruś 30 maja.
