Rasija i Kazachstan na dvuchbakovaj asnovie 1 lipienia ŭviaduć u dziejańnie Mytny kodeks Mytnaha sajuza, pry hetym dakumient adkryty dla padpisańnia Biełaruśsiu. Pra heta paviedamiŭ premjer-ministr RF Uładzimir Pucin, jaki 28 maja ŭ Sankt-Pieciarburhu sustreŭsia sa svaim kazachstanskim kaleham Karymam Masimavym. Kiraŭnik biełaruskaha ŭrada Siarhiej Sidorski na pieramovy nie prybyŭ.
«My damovilisia ŭvieści ŭ dziejańnie na dvuchbakovaj asnovie z 1 lipienia Mytny kodeks Mytnaha sajuza. My adkryty dla dałučeńnia Biełarusi da ŭsich pahadnieńniaŭ i rašeńniaŭ, pryniatych u miežach druhoha etapa farmavańnia Mytnaha sajuza», — pryvodzić słovy Pucina RIA Novosti.
Jon taksama paviedamiŭ, što Rasija i Kazachstan damovilisia ŭvieści ŭ dziejańnie 1 lipienia inšyja mižnarodnyja dahavory, što prymajucca ŭ metach raźvićcia pałažeńniaŭ Mytnaha kodeksa: «Nami siońnia padpisany adpaviedny mižnarodny dahavor, jaki daje mahčymaść ruchacca da bolš hłybokaj intehracyi, kali spatrebicca, na dvuchbakovaj asnovie. U padpisanym nami dakumiencie vyznačany paradak prymianieńnia na dvuchbakovaj asnovie ŭsioj dahavorna-pravavoj bazy druhoha etapa Mytnaha sajuza».
Havoračy pra Biełaruś, Pucin zajaviŭ: «My prymajem da ŭvahi roznahałośsi ź Biełaruśsiu, što zastalisia ŭ častcy paradku vypłaty vyvaznych mytnych pošlin, u tym liku na syruju naftu, naftapradukty, i niehatoŭnaść biełaruskich kaleh uvieści raniej uzhodnienyja mytnyja pošliny i pajści na ŭviadzieńnie ŭ dziejańnie druhoha etapa Mytnaha sajuza z 1 lipienia».
Rasijski premjer padkreśliŭ, što hetaje pytańnie adnosicca da farmavańnia Adzinaj ekanamičnaj prastory i nie źviazana z zapuskam miechanizmaŭ Mytnaha sajuza.
Pucin taksama zajaviŭ, što Rasija i Kazachstan buduć uvachodzić u SHA ŭdvaich, kali Minsk nie dałučycca da dahavoraŭ Mytnaha sajuza. «Jak tolki Biełaruś u siabie ŭnutrypravavyja pracedury zakončyć uzhadniać, spadziajusia, u hety ž momant dakumienty padpiša, i my budziem ruchacca ŭ trochbakovym farmacie. Kali nie adbudziecca dałučeńnie, budziem ruchacca ŭdvaich», — zajaviŭ kiraŭnik rasijskaha ŭrada.
Premjer-ministr Kazachstana paviedamiŭ, što pierachodny pieryjad pa ŭmovach uvozu aŭtamabilaŭ hramadzianami krain — udzielnic Mytnaha sajuza budzie dziejničać da momantu padpisańnia śpiecyjalnaha pahadnieńnia ŭ miežach AEP.
U Rasii dziejničajuć faktyčna zabaronnyja myty na ŭvoz patrymanych inšamarak, u Biełarusi dla fizičnych asob ustanoŭleny ablehčany mytny režym. Try krainy damovilisia na pierachodny pieryjad pakinuć raniejšy režym uvozu aŭtamabilaŭ.
Rasija i Kazachstan taksama damovilisia ab stvareńni časovaha sudovaha orhana ŭ miežach Mytnaha sajuza na dvuchbakovaj asnovie sa štab-kvateraj u Astanie. «Dla vyrašeńnia sudovych sprečak, jakija mohuć uźnikać u haspadarčym žyćci, biez hetaha niemahčyma, my damovilisia stvaryć časovy sudovy orhan na dvuchbakovaj asnovie ź miescam raźmiaščeńnia ŭ Astanie», — skazaŭ Pucin.
