1 červienia Alaksandr Łukašenka płanuje sustrecca ź pieršym vice‑premjeram Rasii Iharam Šuvałavym. Infarmacyja pra sustreču raźmieščana na aficyjnym sajcie biełaruskaha prezidenta.

Temu pieramoŭ pres‑słužba nie paviedamlaje, adnak uličvajučy, što Šuvałaŭ uznačalvaje Kamisiju Mytnaha sajuza Biełarusi, Kazachstana i Rasii, možna mierkavać, što heta buduć pytańni farmiravańnia MS.

***

Nahadajem, 28 maja ŭ Sankt‑Pieciarburhu adbyłasia sustreča kiraŭnikoŭ uradaŭ krain Mytnaha sajuza, jakuju biełaruski bok praihnaravaŭ. Jak rastłumačyŭ pres‑sakratar premjer‑ministra Biełarusi Siarhieja Sidorskaha, sustreča była «niedastatkova padrychtavana».

Tym nie mienš, kiraŭniki ŭradaŭ Rasii i Kazachstana Uładzimir Pucin i Karym Masimaŭ pavodle vynikaŭ sustrečy zajavili, što ich krainy na dvuchbakovaj asnovie ŭvodziać 1 lipienia ŭ dziejańnie Mytny kodeksa Mytnaha sajuza.

«My prymajem da ŭvahi roznahałośsi, što zastalisia ź Biełaruśsiu ŭ častcy paradku vypłaty vyvaznych mytnych pošlin, u tym liku na syruju naftu, naftapradukty, i niehatoŭnaść biełaruskich kaleh uvieści raniej uzhodnienyja mytnyja pošliny i pajści na ŭviadzieńnie ŭ dziejańnie druhoha etapa Mytnaha sajuza z 1 lipienia», — zajaviŭ Pucin.

Razam z tym jon padkreśliŭ: «My adkryty dla dałučeńnia Biełarusi da ŭsich pahadnieńniaŭ i rašeńniaŭ, pryniatych u miežach druhoha etapa farmiravańnia Mytnaha sajuza».

Rasijski premjer taksama zajaviŭ, što Rasija i Kazachstan buduć uvachodzić u Suśvietnuju handlovuju arhanizacyju ŭdvuch, kali Minsk nie dałučycca da dahavoraŭ MS.

«Jak tolki Biełaruś u siabie ŭnutrypravavyja pracedury zakončyć uzhadniać, spadziajusia, u hety ž momant dakumienty padpiša, i my budziem ruchacca ŭ trochbakovym farmacie. Kali nie adbudziecca dałučeńnie, budziem ruchacca ŭdvuch», — skazaŭ Pucin.

29 maja pres‑słužba Savieta ministraŭ Biełarusi raspaŭsiudziła zajavu, u jakoj havorycca pra hatoŭnaść Biełarusi »ŭvieści ŭ dziejańnie ŭ poŭnym abjomie režym adzinaj mytnaj terytoryi Mytnaha sajuza».

«Hruntujučysia na Dahavory ab stvareńni adzinaj mytnaj terytoryi i farmiravańni Mytnaha sajuza ad 6 kastryčnika 2007 hoda, Respublika Biełaruś zachoŭvaje svaju hatoŭnaść da ŭviadzieńnia ŭ dziejańnie ŭ poŭnym abjomie adzinaj mytnaj terytoryi Mytnaha sajuza Respubliki Biełaruś, Respubliki Kazachstan i Rasijskaj Fiederacyi. Biełaruski bok pierakanany, što hetaja praca moža być paśpiachova zavieršana da 1 lipienia 2010 hoda na asnovie vykanańnia raniej pryniatych rašeńniaŭ u miežach Mytnaha sajuza», — havorycca ŭ zajavie.

Razam z tym, padkreślivajecca ŭ zajavie, »Biełaruś zychodzić z taho, što prapanavanyja partniorami pa Mytnym sajuzie vyklučeńni z režymu adzinaj mytnaj terytoryi supiarečać dziejnaj pravavoj bazie Mytnaha sajuza, nie adpaviadajuć mižnarodnym praviłam i nanosiać uron intaresam subjektaŭ haspadarańnia i hramadzian troch dziaržaŭ».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?