Praź miesiac pravyja buduć mieć svajho kandydata na prezidenckija vybary.
1 červienia na pasiadžeńni Rady Biełaruskaha niezaležnickaja błoku była zaćvierdžanaja pracedura abrańnia adzinaha kandydata, paviedamiŭ «NN» namieśnik staršyni Ruchu «Za Svabodu» Juraś Hubarevič.
«Byli čatyry prapanovy — ad Ruchu «Za Svabodu», BCHD, Partyi BNF i «Maładoha frontu». Dla pryniaćcia pracedury treba, kab za jaje prahałasavali dźvie traciny subjektaŭ kaalicyi (to bok 6 arhanizacyj). Prajšła tolki prapanova ad BNF», — zaznačaje Ju.Hubarevič.
Pavodle hetaj prapanovy, acenku kandydata buduć rabić kalehii vybarcaŭ, jakija miarkujecca stvaryć va ŭsich abłaściach krainy i Minsku. Kalehii buduć stvoranyja ź liku rehijanalnych aktyvistaŭ arhanizacyj, jakija vyłučajuć svajho kandydata. Kančatkovyja ž vyniki padviadzie padlikovaja kamisija, u jakuju ŭvojduć pa adnamu pradstaŭniku ad usich subjektaŭ BNB.
«Ciaham dvuch tydniaŭ pavinny być ułahodžanyja techničnyja momanty, a na praciahu miesiaca my pavinny vyjści na adzinaha kandydata. Vielmi dobra, što pracedura była pryniataja», — kaža Ju.Hubarevič.
Tym nie mienš, BCHD i «Małady front» nie całkam padtrymlivajuć prapanavany prajekt. «Siońnia ŭ nas było składanaje pasiedžańnie, adnak ja rady, što adna z pracedur usio ž pryniataja za asnovu, — kamientuje pasiedžańnie sustaršynia BCHD Vital Rymašeŭski. — Heta toj krok, jaki vyviedzie z tupika pieramovy subjektaŭ BNB nakont adzinaha kandydata. Ja spadziajusia, što ŭ bližejšy čas buduć uniesienyja praŭki, i BNB abvieścić ab zaćviardžeńni pracedury».
Ad subjektaŭ BNB kandydatami ŭ prezidenty vyłučanyja Alaksandr Milinkievič (Ruch «Za Svabodu»), Vital Rymašeŭski (BCHD), Ryhor Kastusioŭ (Partyja BNF).
