Punkt ananimnaha ankietavańnia ŭ kramie «Akijan» na vulicy Kazłova. Čarhi da jaho pakul niama.
Ankieta.
Z 1 pa 4 červienia ŭ stvoranaja pry Administracyi Łukašenki respublikanskaja mižviedamasnaja hrupa zładzić u šerahu rajonaŭ stalicy pravierku pracy dziaržaŭnych orhanaŭ i padnačalenych im arhanizacyj. Pravierka achopić Kastryčnicki, Partyzanski, Pieršamajski i Maskoŭski rajony Minska. Dziela hetaha buduć naładžanyja pryjomy ŭ administracyjach rajonaŭ, haračyja linii.
Dla atrymańnia dadatkovaj infarmacyi z 1 pa 4 červienia ŭ hramadskich miescach vyšejaznačanych rajonaŭ buduć raźmieščanyja skryni z błankami ananimnych ankiet. Zajšoŭšy ŭ kramu, ci raźlikova-daviedačny centr ŽEU, možna za adno paviedamić pra prablemy, jakija isnujuć u rajonie, dy paskardzicca na niedachopy ŭ pracy miascovych orhanaŭ ułady.
Dziejnaść mižviedamasnaj hrupy nie abmiažujecca čatyrma rajonami stalicy. Maštabnyja pravierki achopiać usie abłasnyja centry, a taksama šerah ministerstvaŭ.
Maštabnaja akcyja, zładžanaja Administracyjaj, pa svajoj skiravanaści nahadvaje hramadskuju kampaniju «Havary praŭdu». Kampanija, jakaja ŭ pieršuju čarhu cikavicca prablemami rehijonaŭ, stavić sabie metu «znajści dakładnuju infarmacyju ab situacyi ŭ krainie i jaje apublikavać». Varta adznačyć, što nieŭzabavie paśla startu kampanii «Havary praŭdu» BRSM abviaściŭ pra svaju akcyju — «Zadaj pytańnie prezidentu». Z 14 krasavika pa 25 maja ŭ navučalnych ustanovach pa ŭsioj krainie byli vystaŭlenyja admysłovyja skrynki dla pytańniaŭ da kiraŭnika krainy.
«Praca hramadskaj kampanii «Havary praŭdu» apynułasia nadzvyčaj praduktyŭnaj: spačatku jaje skapijavali kamsamolcy z BRSM, ciapier inicyjatyvu pierachapili ich starejšyja siostry i braty z Administracyi», — adreahavaŭ na čarhovy manitorynh lider kampanii Uładzimir Niaklajeŭ. Jon padkreśliŭ, što ŭ kampanii ŭ zapasie jość jašče bahata idej, što datyčnych svabody słova, svabody sumleńnia, vybaru i h.d. «Kali tendencyja ź pierajmańniem hetych idej na samym viersie budzie praciahvacca, to mahčyma my chutčej damožamsia pastaŭlenych metaŭ», — skazaŭ Niaklajeŭ.
